ಬೆಂಗಳೂರು: ಆನ್‌ಲೈನ್‌ನಲ್ಲಿ ಆಹಾರ ಆರ್ಡರ್ ಮಾಡುವಾಗ ಫುಡ್ ಬೆಲೆಯಷ್ಟೇ ಅಲ್ಲದೆ ಹಲವು ರೀತಿಯ ಶುಲ್ಕಗಳು ಸೇರಿಕೊಳ್ಳುತ್ತವೆ. ಇದೀಗ ₹26ರ ಫುಡ್ ಆರ್ಡರ್‌ಗೆ ₹30 ಜಿಎಸ್‌ಟಿ ವಿಧಿಸಿರುವುದನ್ನು ಪ್ರಶ್ನಿಸಿದ ಗ್ರಾಹಕರೊಬ್ಬರ ಪೋಸ್ಟ್ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಕಾರಣವಾಗಿದೆ.
₹26ರ ಆರ್ಡರ್‌ಗೆ ₹30 ಜಿಎಸ್‌ಟಿ ಹೇಗೆ?
“ಆರ್ಡರ್‌ನಲ್ಲಿರುವ ವಸ್ತುಗಳ ಬೆಲೆಯೇ ₹26 ಇದ್ದಾಗ ಜಿಎಸ್‌ಟಿ ₹30 ಹೇಗೆ?” ಎಂಬುದು ಗ್ರಾಹಕರ ಪ್ರಶ್ನೆಯಾಗಿತ್ತು. ಸಾಮಾನ್ಯವಾಗಿ ಬಿಲ್‌ನಲ್ಲಿ ಕಾಣಿಸುವ ಅಂತಿಮ ಮೊತ್ತವನ್ನೇ ಆಧಾರವಾಗಿಟ್ಟುಕೊಂಡು ಗ್ರಾಹಕರು ತೆರಿಗೆ ಲೆಕ್ಕಾಚಾರವನ್ನು ಅರ್ಥಮಾಡಿಕೊಳ್ಳುತ್ತಾರೆ. ಆದರೆ ಫುಡ್ ಡೆಲಿವರಿ ಬಿಲ್‌ನಲ್ಲಿ ಆಹಾರದ ಬೆಲೆಯ ಜೊತೆಗೆ ಬೇರೆ ಬೇರೆ ಶುಲ್ಕಗಳೂ ಸೇರಿರುತ್ತವೆ.
https://x.com/adi_daga/status/2100590795325915284
ಸ್ವಿಗ್ಗಿಯ ನಿಯಮಗಳ ಪ್ರಕಾರ, ಆರ್ಡರ್‌ಗೆ ಡೆಲಿವರಿ ಶುಲ್ಕ, ಹ್ಯಾಂಡ್ಲಿಂಗ್ ಶುಲ್ಕ, ಕನ್ವೀನಿಯನ್ಸ್ ಶುಲ್ಕ, ಪ್ಲಾಟ್‌ಫಾರ್ಮ್ ಶುಲ್ಕ ಮತ್ತು ಪ್ಯಾಕೇಜಿಂಗ್ ಶುಲ್ಕ ಸೇರಿದಂತೆ ವಿವಿಧ ಶುಲ್ಕಗಳು ಅನ್ವಯಿಸಬಹುದು. ಇವುಗಳ ವಿವರವನ್ನು ಆರ್ಡರ್ ಮಾಡುವ ಮುನ್ನ ಪಾವತಿ ಪ್ರಕ್ರಿಯೆಲ್ಲಿ ನೋಡಬಹುದು.
ಸ್ವಿಗ್ಗಿ ಕೊಟ್ಟ ಉತ್ತರವೇನು?
ಗ್ರಾಹಕರ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಸ್ವಿಗ್ಗಿ, ಈ ಪ್ರಕರಣದಲ್ಲಿ ಜಿಎಸ್‌ಟಿ ಲೆಕ್ಕಾಚಾರವನ್ನು ಡಿಸ್ಕೌಂಟ್ ನಂತರದ ಬೆಲೆಯ ಬದಲು ಮೂಲ ಬೆಲೆಯ (Original Price) ಆಧಾರದ ಮೇಲೆ ಮಾಡಲಾಗಿದೆ ಎಂದು ತಿಳಿಸಿದೆ.
ಅಂದರೆ, ಗ್ರಾಹಕರಿಗೆ ಅಂತಿಮವಾಗಿ ಕಾಣುವ ₹26ರ ಬೆಲೆಯನ್ನು ಮಾತ್ರ ಪರಿಗಣಿಸದೆ, ಆಫರ್ ಅನ್ವಯಿಸುವುದಕ್ಕೂ ಮುನ್ನ ಇದ್ದ ಮೂಲ ಬೆಲೆಯನ್ನು ತೆರಿಗೆ ಲೆಕ್ಕಾಚಾರದಲ್ಲಿ ಪರಿಗಣಿಸಲಾಗಿದೆ ಎಂದು ಕಂಪನಿ ಹೇಳಿದೆ.ಸ್ವಿಗ್ಗಿ ತನ್ನ ಪ್ರತಿಕ್ರಿಯೆಯಲ್ಲಿ “ಮೂಲ ಬೆಲೆಯ ಮೇಲೆ ಲೆಕ್ಕಹಾಕಲಾಗಿದೆ ” ಎಂದು ಸ್ಪಷ್ಟಪಡಿಸಿದೆ.
ಬಿಲ್‌ನಲ್ಲಿ ಆಹಾರದ ಬೆಲೆ ಮಾತ್ರ ಇರಲ್ಲ
ಫುಡ್ ಡೆಲಿವರಿ ಆ್ಯಪ್‌ಗಳಲ್ಲಿ ಗ್ರಾಹಕರು ಗಮನಿಸುವುದು ಸಾಮಾನ್ಯವಾಗಿ ಆಹಾರದ ಬೆಲೆ ಮತ್ತು ಡಿಸ್ಕೌಂಟ್. ಆದರೆ ಪಾವತಿ ಪ್ರಕ್ರಿಯೆಗೆ ಬಂದಾಗ ಡೆಲಿವರಿ, ಪ್ಯಾಕೇಜಿಂಗ್, ಪ್ಲಾಟ್‌ಫಾರ್ಮ್ ಶುಲ್ಕ ಸೇರಿದಂತೆ ಹಲವು ಮೊತ್ತಗಳು ಸೇರಿರಬಹುದು.
ಇತ್ತೀಚೆಗೆ ಇಂತಹ ಹೆಚ್ಚುವರಿ ಶುಲ್ಕಗಳ ಕುರಿತು ಸ್ವಿಗ್ಗಿ ಬಿಲ್‌ಗಳು ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಬರುತ್ತಿರುವುದು ಹೊಸದೇನಲ್ಲ. ಸೆಪ್ಟೆಂಬರ್ 2026ರಲ್ಲೂ ರೆಸ್ಟೋರೆಂಟ್‌ನಲ್ಲಿ ₹230 ಇದ್ದ ಊಟ ಸ್ವಿಗ್ಗಿನಲ್ಲಿ ₹436 ಆಗಿರುವುದನ್ನು ತೋರಿಸುವ ಬಿಲ್ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು.
₹26ರ ಆಹಾರದ ಬೆಲೆ ಮತ್ತು ₹30ರ GST ಅನ್ನು ಮಾತ್ರ ಹೋಲಿಸಿದರೆ ಬಿಲ್‌ನ ಸಂಪೂರ್ಣ ಲೆಕ್ಕ ಅರ್ಥವಾಗುವುದಿಲ್ಲ. ಐಟಂ ಬೆಲೆ, ರಿಯಾಯಿತಿ, ವಿತರಣಾ ಶುಲ್ಕ, ಪ್ಲಾಟ್‌ಫಾರ್ಮ್ ಶುಲ್ಕ, ಪ್ಯಾಕೇಜಿಂಗ್ ಶುಲ್ಕ ಮತ್ತು ತೆರಿಗೆ ವಿರಾಮಎಲ್ಲವನ್ನೂ ಒಟ್ಟಿಗೆ ನೋಡಿದಾಗ ಮಾತ್ರ ಅಂತಿಮ ಮೊತ್ತ ಹೇಗೆ ಬಂದಿದೆ ಎಂಬುದು ಸ್ಪಷ್ಟವಾಗುತ್ತದೆ.ಈ ಘಟನೆ ಡಿಸ್ಕೌಂಟ್ ಬಳಿಕದ ಬೆಲೆಯ ಮೇಲೆ ಜಿಎಸ್‌ಟಿ ಲೆಕ್ಕ ಹಾಕಬೇಕೇ ಅಥವಾ ಮೂಲ ಬೆಲೆಯನ್ನು ಆಧರಿಸಬಹುದೇ ಎಂಬ ಚರ್ಚೆಯನ್ನೂ ಮತ್ತೆ ಮುನ್ನೆಲೆಗೆ ತಂದಿದೆ.
