ಅಕ್ಕಿ, ಬೇಳೆ ಕಾಳು, ಹಣ್ಣು, ತರಕಾರಿ, ಖಾದ್ಯ ತೈಲ, ಇಂಧನ ಸೇರಿ ಹಲವು ಅಗತ್ಯ ವಸ್ತುಗಳ ಬೆಲೆ ಏರಿಕೆಯಾಗಿದ್ದು, ಇದರೊಂದಿಗೆ ರಾಜ್ಯದಲ್ಲಿ ತೆಂಗಿನಕಾಯಿ ದರ ಕೂಡ ಏರಿಕೆಯಾಗಿದೆ,
ಮಾರುಕಟ್ಟೆಯಲ್ಲಿ ಕೆಜಿ ತೆಂಗಿನ ಕಾಯಿ ದರ 75ರಿಂದ 86 ರೂಪಾಯಿಗೆ ಏರಿಕೆಯಾಗಿದ್ದು, ಜನಸಾಮಾನ್ಯರು ಕಂಗಾಲಾಗಿದ್ದಾರೆ. ಕಳೆದ ಮೂರು ವರ್ಷಗಳಿಂದ ತೆಂಗಿನಕಾಯಿ ದರ ಏರುಗತಿಯಲ್ಲೇ ಇದೆ. 2022- 23ರ ವೇಳೆಗೆ ಮಾರುಕಟ್ಟೆಯಲ್ಲಿ ಕೆಜಿ ತೆಂಗಿನ ಕಾಯಿಗೆ 18 ರಿಂದ 20 ರೂಪಾಯಿ ದರವಿತ್ತು. 2024ರಲ್ಲಿ 30 ರಿಂದ 35 ರೂ. 2025ರ ಆರಂಭದಲ್ಲಿ 60 ರಿಂದ 65 ಏರಿಕೆಯಾಗಿತ್ತು. ಇದೀಗ 75 ರೂ.ವರೆಗೆ ಮಾರಾಟವಾಗುತ್ತಿದ್ದು, ಗ್ರಾಹಕರಿಗೆ ಬೆಲೆ ಏರಿಕೆ ಬಿಸಿ ತಟ್ಟಿದೆ.
ಕೆಲವೆಡೆ ತೆಂಗಿನಕಾಯಿ ದರ 40 ರೂ., 50 ರೂ., 60 ರೂ.ಇದ್ದು, ಮತ್ತೆ ಕೆಲವೆಡೆ 80 ರೂ.ವರೆಗೂ ಮಾರಾಟವಾಗುತ್ತಿದೆ. ತೆಂಗಿನಎಣ್ಣೆ ದರ ಕೂಡ ಏರಿಕೆಯಾಗಿದೆ. ತೆಂಗಿನ ಎಣ್ಣೆ ದರ ಲೀಟರ್ ಗೆ 340 ರಿಂದ 360 ರೂ.ಗೆ ಏರಿಕೆಯಾಗಿದ್ದು, ಅಡುಗೆಗೆ ತೆಂಗಿನ ಎಣ್ಣೆ ಬಳಸುವವರಿಗೆ ಬಿಸಿ ತಟ್ಟಿದೆ.
ರಾಜ್ಯ ಮತ್ತು ಹೊರ ರಾಜ್ಯಗಳಲ್ಲಿ ತೆಂಗಿನ ಇಳುವರಿ ಕುಸಿತವಾಗಿದೆ. ಮಾರುಕಟ್ಟೆಗೆ ಕಡಿಮೆ ಪ್ರಮಾಣದಲ್ಲಿ ತೆಂಗಿನಕಾಯಿ ಬರುತ್ತಿದೆ. ಇನ್ನು ಎಳನೀರಿಗೆ ಭಾರೀ ಬೇಡಿಕೆ, ಹೆಚ್ಚಿನ ಬೆಲೆ ಇರುವುದರಿಂದ ಬಹುತೇಕ ಬೆಳೆಗಾರರು ಎಳನೀರು ಮಾರಾಟ ಮಾಡುತ್ತಾರೆ. ತೋಟಗಳಿಗೆ ಬಂದು ವ್ಯಾಪಾರಿಗಳು ಎಳನೀರು ಖರೀದಿ ಮಾಡುವುದರಿಂದ ತೆಂಗಿನಕಾಯಿ ಕಡಿಮೆಯಾಗಿದೆ. ರೋಗ, ತಾಪಮಾನ ಇತರೆ ಕಾರಣಗಳಿಂದಲೂ ಇಳುವರಿ ಕುಸಿತವಾಗಿ ಬೇಡಿಕೆ ಹೆಚ್ಚಿದೆ ಎನ್ನಲಾಗಿದೆ.
