ಸಿಂಗಾಪುರ ಸರ್ಕಾರವು ತನ್ನ ರಾಜಕೀಯ ನಾಯಕರ ವೇತನ ವ್ಯವಸ್ಥೆಯನ್ನು ಪರಿಷ್ಕರಿಸಲು ನಿರ್ಧರಿಸಿದ್ದು, ಪ್ರಧಾನಮಂತ್ರಿ ಲಾರೆನ್ಸ್ ವೋಂಗ್ ಅವರ ವಾರ್ಷಿಕ ಆಧಾರಿತ ವೇತನವು (ಬೆಂಚ್‌ಮಾರ್ಕ್ ಸ್ಯಾಲರಿ) 3.6 ಮಿಲಿಯನ್ ಸಿಂಗಾಪುರ ಡಾಲರ್‌ಗಳಿಗೆ (ಸುಮಾರು 26.9 ಕೋಟಿ ರೂಪಾಯಿ) ಏರಿಕೆಯಾಗಲಿದೆ. ಈ ಬೆಳವಣಿಗೆಯೊಂದಿಗೆ ಸಿಂಗಾಪುರ ಪ್ರಧಾನಿ ವಿಶ್ವದಲ್ಲೇ ಅತ್ಯಂತ ಹೆಚ್ಚಿನ ವೇತನ ಪಡೆಯುವ ಸರ್ಕಾರದ ಮುಖ್ಯಸ್ಥ ಎನಿಸಿಕೊಳ್ಳಲಿದ್ದಾರೆ. ಈ ಮೊತ್ತವು ಅಮೆರಿಕ ಅಧ್ಯಕ್ಷರು ಸೇರಿದಂತೆ ಜಿ7 ರಾಷ್ಟ್ರಗಳ ನಾಯಕರ ವೇತನಕ್ಕಿಂತಲೂ ಬಹುವಿಷ್ಟು ಹೆಚ್ಚಾಗಿದೆ.
ಪ್ರಧಾನಿಯ ಬೃಹತ್ ವೇತನಕ್ಕಿಂತಲೂ ಹೆಚ್ಚಾಗಿ, ರಾಜಕಾರಣಿಗಳ ಸಂಬಳವನ್ನು ನಿಗದಿಪಡಿಸಲು ಸಿಂಗಾಪುರ ಅನುಸರಿಸುವ ನಿರ್ದಿಷ್ಟ ಸೂತ್ರವು ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದಿದೆ.
ವೇತನ ನಿಗದಿಯ 3 ಪ್ರಮುಖ ಹಂತಗಳು:
-
ಟಾಪ್ 1,000 ಗಳಿಕೆದಾರರ ಆದಾಯ ಪರಿಶೀಲನೆ: ಸಿಂಗಾಪುರದಲ್ಲಿ ಅತಿ ಹೆಚ್ಚು ಆದಾಯ ಗಳಿಸುವ ಉನ್ನತ 1,000 ನಾಗರಿಕರ ಪಟ್ಟಿಯನ್ನು ಮೊದಲು ಆಧಾರವಾಗಿ ತೆಗೆದುಕೊಳ್ಳಲಾಗುತ್ತದೆ. ಅತ್ಯಂತ ಶ್ರೀಮಂತರ ಕಾರಣದಿಂದ ಸರಾಸರಿ ಆದಾಯದಲ್ಲಿ ಏರುಪೇರಾಗುವುದನ್ನು ತಪ್ಪಿಸಲು ಈ ಗುಂಪಿನ ‘ಮಧ್ಯಮ ಪ್ರಮಾಣದ ಆದಾಯವನ್ನು’ (ಮಿಡಿಯನ್ ಇನ್‌ಕಮ್) ಪರಿಗಣಿಸಲಾಗುತ್ತದೆ. ಖಾಸಗಿ ವಲಯವನ್ನು ತೊರೆದು ರಾಜಕೀಯಕ್ಕೆ ಬರುವ ಸಾಮರ್ಥ್ಯವುಳ್ಳ ವ್ಯಕ್ತಿಗಳ ಗಳಿಕೆಯ ಮೌಲ್ಯವನ್ನು ಗುರುತಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ.
-
ಶೇಕಡಾ 40 ರಷ್ಟು ರಿಯಾಯಿತಿ ಕಡಿತ: ಉನ್ನತ ಗಳಿಕೆದಾರರ ಆದಾಯವನ್ನು ನೇರವಾಗಿ ರಾಜಕಾರಣಿಗಳಿಗೆ ನೀಡಲಾಗುವುದಿಲ್ಲ. ಸಾರ್ವಜನಿಕ ಸೇವೆಯ ಉದಾತ್ತ ಉದ್ದೇಶವನ್ನು ಗೌರವಿಸಿ ಮತ್ತು ಸಾರ್ವಜನಿಕ ಜೀವನಕ್ಕಾಗಿ ತಕ್ಕ ಮಟ್ಟಿನ ಆರ್ಥಿಕ ತ್ಯಾಗವನ್ನು ಕಾಯ್ದುಕೊಳ್ಳಲು ಆ ಮೊತ್ತದಲ್ಲಿ ಶೇಕಡಾ 40 ರಷ್ಟು ಕಡಿತಗೊಳಿಸಲಾಗುತ್ತದೆ. ಈ ಕಡಿತದ ನಂತರ ಆರಂಭಿಕ ಹಂತದ ಸಚಿವರ (ಎಂಟ್ರಿ-ಲೆವೆಲ್ ಮಿನಿಸ್ಟರ್) ವಾರ್ಷಿಕ ವೇತನವು 1.8 ಮಿಲಿಯನ್ ಸಿಂಗಾಪುರ ಡಾಲರ್ ತಲುಪುತ್ತದೆ.
-
ಪ್ರಧಾನಮಂತ್ರಿಗೆ ದುಪ್ಪಟ್ಟು ವೇತನ: ಸಚಿವರ ವೇತನದ ಮಾನದಂಡವನ್ನು ಆಧಾರವಾಗಿಟ್ಟುಕೊಂಡು ಅದನ್ನು ಪ್ರಧಾನಿಗೆ ಎರಡರಷ್ಟು ನಿಗದಿಪಡಿಸಲಾಗುತ್ತದೆ. ಅಂದರೆ ಸಚಿವರ 1.8 ಮಿಲಿಯನ್ ಸಿಂಗಾಪುರ ಡಾಲರ್ ವೇತನವನ್ನು ದುಪ್ಪಟ್ಟುಗೊಳಿಸಿ ಪ್ರಧಾನಿಗೆ 3.6 ಮಿಲಿಯನ್ ಸಿಂಗಾಪುರ ಡಾಲರ್ (ಸುಮಾರು 26.9 ಕೋಟಿ ರೂಪಾಯಿ) ಎಂದು ನಿಗದಿಪಡಿಸಲಾಗುತ್ತದೆ.
ಖಾಸಗಿ ವಲಯದಲ್ಲಿದ್ದುಕೊಂಡು ಅಪಾರ ಅನುಭವ ಮತ್ತು ನಾಯಕತ್ವ ಗುಣ ಹೊಂದಿರುವ ಅತ್ಯುತ್ತಮ ಪ್ರತಿಭೆಗಳನ್ನು ಸರ್ಕಾರಿ ಆಡಳಿತಕ್ಕೆ ಆಕರ್ಷಿಸಲು ಈ ವ್ಯವಸ್ಥೆ ಅಗತ್ಯ ಎಂಬುದು ಸಿಂಗಾಪುರದ ಸ್ಪಷ್ಟ ನಿಲುವು. ಜೊತೆಗೆ, ಅತ್ಯಂತ ಪಾರದರ್ಶಕ ಹಾಗೂ ಸ್ಪರ್ಧಾತ್ಮಕ ವೇತನ ನೀಡುವ ಮೂಲಕ ನಾಯಕರಲ್ಲಿ ಭ್ರಷ್ಟಾಚಾರದ ಮನೋಭಾವವನ್ನು ತಡೆಗಟ್ಟಬಹುದು ಎಂಬುದು ಆ ದೇಶದ ವಾದವಾಗಿದೆ.
