ಕನ್ನಡ ಕಿರುತೆರೆಯ ಜನಪ್ರಿಯ ಸಂಗೀತ ರಿಯಾಲಿಟಿ ಶೋ ‘ಜೀ ಕನ್ನಡ’ದ ‘ಸರಿಗಮಪ ಲಿಟಲ್ ಚಾಂಪ್ಸ್’ ಸೀಸನ್ ಅದ್ಧೂರಿಯಾಗಿ ಮುಕ್ತಾಯಗೊಂಡಿದೆ. ತಿಂಗಳುಗಳ ಕಾಲ ನಡೆದ ಸುದೀರ್ಘ ಸಂಗೀತ ಪಯಣದ ಅಂತಿಮ ಮಹಾಸಂಗ್ರಾಮದಲ್ಲಿ ಮಂಗಳೂರಿನ ಬಾಲಪ್ರತಿಭೆ ಅಶ್ಮಿತ್ ಈ ಬಾರಿಯ ಚಾಂಪಿಯನ್ ಆಗಿ ಹೊರಹೊಮ್ಮಿದ್ದಾರೆ.
ಗಾಯನದ ಜೊತೆಗೆ ವಯೊಲಿನ್ ವಾದನದಲ್ಲೂ ಅಪಾರ ನೈಪುಣ್ಯ ಹೊಂದಿರುವ ಅಶ್ಮಿತ್, ತೀರ್ಪುಗಾರರು ಹಾಗೂ ಕೋಟ್ಯಂತರ ವೀಕ್ಷಕರ ಮನಗೆದ್ದು ವಿನ್ನಿಂಗ್ ಟ್ರೋಫಿ ಜೊತೆಗೆ 20 ಲಕ್ಷ ರೂಪಾಯಿ ನಗದು ಬಹುಮಾನವನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಗಾಯಕಿ ಇಂದು ನಾಗರಾಜ್ ಅವರ ಮಾರ್ಗದರ್ಶನದಲ್ಲಿ ಬೆಳೆದ ಅಶ್ಮಿತ್ ಅವರ ಈ ಗೆಲುವು ಕರಾವಳಿಯ ಸಂಗೀತ ಪ್ರಿಯರಿಗೆ ಹೆಮ್ಮೆಯ ಕ್ಷಣ ತಂದಿಟ್ಟಿದೆ.
ಮಂಗಳೂರಿಗೆ ಡಬಲ್ ಧಮಾಕ:
ಅಂತಿಮ ಸುತ್ತಿನ ವರೆಗೂ ಅಶ್ಮಿತ್‌ಗೆ ಪ್ರಬಲ ಪೈಪೋಟಿ ನೀಡಿದ ಮಂಗಳೂರಿನ ಮತ್ತೊಬ್ಬ ಪ್ರತಿಭಾವಂತ ಗಾಯಕ ಅಚಿಂತ್ಯ ರೈ ‘ಮೊದಲ ರನ್ನರ್ ಅಪ್’ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದಾರೆ. ಗಾಯನದ ಜೊತೆಗೆ ಮಿಮಿಕ್ರಿಯಲ್ಲೂ ಪ್ರೇಕ್ಷಕರನ್ನು ರಂಜಿಸಿದ ಅಚಿಂತ್ಯ ಅವರಿಗೆ ಟ್ರೋಫಿ ಹಾಗೂ 15 ಲಕ್ಷ ರೂಪಾಯಿ ನಗದು ಬಹುಮಾನ ಸಿಕ್ಕಿದೆ. ಈ ಮೂಲಕ ಈ ಬಾರಿಯ ಫಿನಾಲೆಯಲ್ಲಿ ಮಂಗಳೂರಿಗೆ ಪ್ರಮುಖ ಎರಡೂ ಪ್ರಶಸ್ತಿಗಳು ಒಲಿದಂತಾಗಿವೆ.
ಫಿನಾಲೆ ತಲುಪಿದ್ದ 6 ಬಾಲಪ್ರತಿಭೆಗಳು:
ಅಶ್ಮಿತ್ (ಮಂಗಳೂರು): ಗಾಯನ ಮತ್ತು ವಯೊಲಿನ್ ಜುಗಲ್ಬಂದಿಯಿಂದ ಮೋಡಿ ಮಾಡಿ ಚಾಂಪಿಯನ್ ಪಟ್ಟಕ್ಕೇರಿದ ಬಹುಮುಖ ಪ್ರತಿಭೆ.
ಅಚಿಂತ್ಯ ರೈ (ಮಂಗಳೂರು): ಅದ್ಭುತ ಗಾಯನ ಹಾಗೂ ಮಿಮಿಕ್ರಿ ಕೌಶಲ್ಯದೊಂದಿಗೆ ರನ್ನರ್ ಅಪ್ ಪ್ರಶಸ್ತಿ ಪಡೆದ ಗಾಯಕ.
ಮಹನ್ಯ ಗರು ಪಾಟೀಲ್: ಉತ್ತರ ಕರ್ನಾಟಕದ ಜಾನಪದ ಮತ್ತು ಶಾಸ್ತ್ರೀಯ ಶೈಲಿಯ ಮಿಶ್ರಣದಿಂದ ಗಮನಸೆಳೆದ ಕಂಠ.
ಹರುಷ್ ನವೀನ್‌ಕೃಷ್ಣ: ಹಿರಿಯ ನಟ ಶ್ರೀನಿವಾಸಮೂರ್ತಿ ಅವರ ಮೊಮ್ಮಗ ಹಾಗೂ ನಟ ನವೀನ್ ಕೃಷ್ಣ ಅವರ ಪುತ್ರ. ಕುಟುಂಬದ ಕಲಾ ಪರಂಪರೆಯ ನಡುವೆಯೂ ಸ್ವಂತ ಪರಿಶ್ರಮದಿಂದ ಫಿನಾಲೆ ತಲುಪಿದ ಪ್ರತಿಭೆ.
ಜಯಲಕ್ಷ್ಮಿ: ವಿಶಿಷ್ಟ ಧ್ವನಿ ಹಾಗೂ ಗಾಯನ ಶೈಲಿಯಿಂದ ‘ಚಿನ್ನದ ಕಂಠ’ ಎಂಬ ಮೆಚ್ಚುಗೆಗೆ ಪಾತ್ರರಾದ ಸ್ಪರ್ಧಿ.
ಅವ್ಯುಕ್ತ್ (ಬೆಂಗಳೂರು): ಶಾಸ್ತ್ರೀಯ ಗಾಯನದ ಪ್ರಬುದ್ಧತೆಯಿಂದ ಪ್ರೇಕ್ಷಕರನ್ನು ರಂಜಿಸಿದ ಬಾಲಕ.
ಎರಡು ಹಂತಗಳಲ್ಲಿ ನಡೆದ ಅಂತಿಮ ಸಂಗ್ರಾಮದಲ್ಲಿ ಪ್ರತಿಯೊಬ್ಬ ಸ್ಪರ್ಧಿಯೂ ವಿಭಿನ್ನ ಶೈಲಿಯ ಗಾಯನ ಪ್ರದರ್ಶಿಸಿದ್ದರಿಂದ ತೀರ್ಪುಗಾರರಿಗೂ ವಿಜೇತರನ್ನು ಆಯ್ಕೆ ಮಾಡುವುದು ದೊಡ್ಡ ಸವಾಲಾಗಿತ್ತು. ಅಂತಿಮವಾಗಿ ವಯೊಲಿನ್ ನಾದ ಹಾಗೂ ಗಾಯನದ ಮೂಲಕ ಗಮನಸೆಳೆದ ಅಶ್ಮಿತ್ ಗೆಲುವಿನ ಕಿರೀಟ ಧರಿಸಿದ್ದಾರೆ.
