ಬೆಂಗಳೂರು: ಪ್ರಾಚೀನ ಕಾಲದಲ್ಲಿ ವಿನಿಮಯ ಪದ್ಧತಿ ಅಥವಾ ಬಾರ್ಟರ್ ಸಿಸ್ಟಮ್ (Barter System) ಚಾಲ್ತಿಯಲ್ಲಿತ್ತು. ರಾಗಿ ಕೊಟ್ಟು ಭತ್ತ ಪಡೆಯುವ, ಅಕ್ಕಿ ಕೊಟ್ಟು ಬೇಳೆ ಪಡೆಯುವ ಕಾಲವದಾಗಿತ್ತು. ಇಂದಿನ ಆಧುನಿಕ ಯುಗದಲ್ಲಿ ಪ್ರತಿಯೊಂದಕ್ಕೂ ಹಣವೇ ಮೂಲಾಧಾರ. ಆದರೆ, ಆಸ್ತಿ ವ್ಯವಹಾರದ ವಿಷಯಕ್ಕೆ ಬಂದರೆ ಇಂದಿಗೂ ಹಣದ ಬದಲು ಆಸ್ತಿಯನ್ನೇ ನೀಡಿ ಮತ್ತೊಂದು ಆಸ್ತಿಯನ್ನು ಪಡೆಯಲು ಕಾನೂನಿನಲ್ಲಿ ಅವಕಾಶವಿದೆ ಎಂಬುದು ನಿಮಗೆ ಗೊತ್ತೇ?ಆಸ್ತಿ ವರ್ಗಾವಣೆ ಅಧಿನಿಯಮ 1882ರ ಅಡಿಯಲ್ಲಿ ಈ ಕುರಿತು ಸ್ಪಷ್ಟವಾದ ಉಲ್ಲೇಖವಿದೆ. ಆಸ್ತಿ ಮಾರಾಟದ ವಿವಿಧ ಮುಖಗಳು ಮತ್ತು ಎಕ್ಸ್ಚೇಂಜ್ ಡೀಡ್ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಏನಿದು ಆಸ್ತಿ ವಿನಿಮಯ? (Section 118)
ಸಾಮಾನ್ಯವಾಗಿ ನಾವು ಆಸ್ತಿ ಖರೀದಿಸುವಾಗ ಹಣ ನೀಡಿ ಸೇಲ್ ಡೀಡ್ (Sale Deed) ಮಾಡಿಸಿಕೊಳ್ಳುತ್ತೇವೆ. ಆದರೆ ಆಸ್ತಿ ವರ್ಗಾವಣೆ ಕಾನೂನು 1882ರ ಸೆಕ್ಷನ್ 118ರ ಪ್ರಕಾರ, ಒಬ್ಬ ವ್ಯಕ್ತಿ ತನ್ನ ಆಸ್ತಿಯನ್ನು ಇನ್ನೊಬ್ಬರಿಗೆ ನೀಡಿ, ಪ್ರತಿಯಾಗಿ ಅವರಿಂದ ಹಣದ ಬದಲಿಗೆ ಮತ್ತೊಂದು ಆಸ್ತಿಯನ್ನು ಪಡೆದರೆ ಅದನ್ನು ವಿನಿಮಯ ಅಥವಾ ಎಕ್ಸ್ಚೇಂಜ್ ಎನ್ನಲಾಗುತ್ತದೆ.
ವರ್ಗಾವಣೆಯ ವಿಧ,ವಿವರಣೆ,ಕಾನೂನು ವಿಭಾಗ
ಸೇಲ್ (ಮಾರಾಟ)ನಿಗದಿತ ಹಣಕ್ಕೆ ಆಸ್ತಿಯ ಮಾಲೀಕತ್ವವನ್ನು ವರ್ಗಾಯಿಸುವುದು.ಸೆಕ್ಷನ್ 54
ಅಡಮಾನ (Mortgage)ಸಾಲದ ಭದ್ರತೆಗಾಗಿ ಆಸ್ತಿಯನ್ನು ನೀಡುವುದು. ಸಾಲ ತೀರಿಸದಿದ್ದರೆ ಆಸ್ತಿ ಸಾಲದಾತನ ಪಾಲಾಗುತ್ತದೆ.,ಸೆಕ್ಷನ್ 58
ಲೀಸ್ (ಗುತ್ತಿಗೆ)ಮಾಲೀಕತ್ವ ವರ್ಗಾಯಿಸದೆ, ಕೇವಲ ಬಳಸುವ ಹಕ್ಕನ್ನು ಸೀಮಿತ ಅವಧಿಗೆ ನೀಡುವುದು.ಸೆಕ್ಷನ್ 105 – 117
ಗಿಫ್ಟ್ ಡೀಡ್ (ದಾನ)ಯಾವುದೇ ಹಣ ಪಡೆಯದೆ ಪ್ರೀತಿ ಅಥವಾ ವಿಶ್ವಾಸದಿಂದ ಆಸ್ತಿಯನ್ನು ಉಡುಗೊರೆಯಾಗಿ ನೀಡುವುದು.ಸೆಕ್ಷನ್ 122
ಆಸ್ತಿ ಬದಲಾವಣೆಗೆ ಸ್ಟಾಂಪ್ ಡ್ಯೂಟಿ ?
ಒಂದು ಆಸ್ತಿಗೆ ಬದಲಾಗಿ ಮತ್ತೊಂದು ಆಸ್ತಿಯನ್ನು ವಿನಿಮಯ ಮಾಡಿಕೊಂಡಾಗ ಎಷ್ಟು ಮುದ್ರಾಂಕ ಶುಲ್ಕ (Stamp Duty) ಪಾವತಿಸಬೇಕು ಎಂಬ ಗೊಂದಲ ಅನೇಕರಿಗಿರುತ್ತದೆ.
ಕರ್ನಾಟಕ ನೋಂದಣಿ ಮತ್ತು ಮುದ್ರಾಂಕ ಕಾಯ್ದೆಯ ಆರ್ಟಿಕಲ್ 26ರ ಪ್ರಕಾರ:
ವಿನಿಮಯ ಮಾಡಿಕೊಳ್ಳುವ ಎರಡು ಆಸ್ತಿಗಳಲ್ಲಿ ಯಾವ ಆಸ್ತಿಯ ಸರ್ಕಾರಿ ಮಾರ್ಗಸೂಚಿ ದರ (Guidance Value) ಹೆಚ್ಚಿರುತ್ತದೆಯೋ, ಆ ಆಸ್ತಿಯ ಮೌಲ್ಯವನ್ನು ಪರಿಗಣಿಸಿ ಮುದ್ರಾಂಕ ಶುಲ್ಕ ಮತ್ತು ನೋಂದಣಿ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ.
ಇಲ್ಲಿ ಎರಡು ಆಸ್ತಿಗಳು ಕೈಬದಲಾದರೂ, ಕೇವಲ ಒಂದು ಆಸ್ತಿಗೆ ಮಾತ್ರ ಶುಲ್ಕ ಪಾವತಿಸುವ ಸೌಲಭ್ಯವಿರುವುದು ವಿಶೇಷ.
