ಮುಂಬೈ: ವಾರದ ಕೊನೆಯ ವಹಿವಾಟಿನ ದಿನವಾದ ಇಂದು ಭಾರತೀಯ ರೂಪಾಯಿ ಮೌಲ್ಯದಲ್ಲಿ ಭಾರಿ ಕುಸಿತ ಕಂಡುಬಂದಿದೆ. ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಬೆಲೆ ಏರಿಕೆ ಮತ್ತು ಮಧ್ಯಪ್ರಾಚ್ಯದಲ್ಲಿ ಭುಗಿಲೆದ್ದಿರುವ ಉದ್ವಿಗ್ನತೆಯಿಂದಾಗಿ, ಅಮೆರಿಕನ್ ಡಾಲರ್ ಎದುರು ರೂಪಾಯಿ 45 ಪೈಸೆ ಕುಸಿದು 94.67ಕ್ಕೆ ತಲುಪಿದೆ.
ಮಾರುಕಟ್ಟೆಯ ಇಂದಿನ ಸ್ಥಿತಿಗತಿ:
ಹಾರ್ಮುಜ್ ಜಲಸಂಧಿಯ ಬಳಿ ಅಮೆರಿಕ ಮತ್ತು ಇರಾನ್ ಪಡೆಗಳ ನಡುವೆ ನಡೆದ ಗುಂಡಿನ ಚಕಮಕಿ ಜಾಗತಿಕ ಮಾರುಕಟ್ಟೆಯನ್ನು ತಲ್ಲಣಗೊಳಿಸಿದೆ.
ಷೇರು ಮಾರುಕಟ್ಟೆ: ಸೆನ್ಸೆಕ್ಸ್ 353.50 ಅಂಕ ಕುಸಿದು 77,491ಕ್ಕೆ ತಲುಪಿದ್ದರೆ, ನಿಫ್ಟಿ 109.25 ಅಂಕಗಳ ಇಳಿಕೆಯೊಂದಿಗೆ 24,225ಕ್ಕೆ ಕುಸಿದಿದೆ.
ಕೈಕೊಟ್ಟ ರೂಪಾಯಿ: ಗುರುವಾರ 94.22ರಲ್ಲಿ ಸ್ಥಿರವಾಗಿದ್ದ ರೂಪಾಯಿ, ಶುಕ್ರವಾರ ವಹಿವಾಟು ಆರಂಭವಾಗುತ್ತಿದ್ದಂತೆ 94.58ಕ್ಕೆ ಕುಸಿದು, ನಂತರ 94.67ಕ್ಕೆ ತಲುಪಿದೆ.
ತೈಲ ಬೆಲೆ ಏರಿಕೆ ಯಾಕೆ?
ಅಮೆರಿಕ ಮತ್ತು ಇರಾನ್ ನಡುವಿನ ಕದನ ವಿರಾಮ ಜಾರಿಯಲ್ಲಿದೆ ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳುತ್ತಿದ್ದರೂ, ವಾಸ್ತವದಲ್ಲಿ ಸಂಘರ್ಷ ಮುಂದುವರಿದಿದೆ.
ಇರಾನ್ ಮಾಡಿರುವ ಆರೋಪದ ಪ್ರಕಾರ, ಅಮೆರಿಕವು ನಾಗರಿಕ ಪ್ರದೇಶಗಳ ಮೇಲೆ ದಾಳಿ ನಡೆಸುವ ಮೂಲಕ ಕದನ ವಿರಾಮ ಉಲ್ಲಂಘಿಸಿದೆ.ಇದರಿಂದಾಗಿ 98 ಡಾಲರ್ಗೆ ಇಳಿದಿದ್ದ ಬ್ರೆಂಟ್ ಕಚ್ಚಾ ತೈಲ ಬೆಲೆ ಈಗ ದಿಢೀರ್ ಆಗಿ 101 ಡಾಲರ್ ದಾಟಿದೆ.
ತಜ್ಞರು ಏನು ಹೇಳ್ತಾರೆ?
ಫಿನ್ರೆಕ್ಸ್ ಟ್ರೆಜರಿ ಅಡ್ವೈಸರ್ಸ್ನ ಅನಿಲ್ ಕುಮಾರ್ ಭನ್ಸಾಲಿ ಅವರ ಪ್ರಕಾರ, ತೈಲ ಬೆಲೆ ಏರಿಕೆ ಮತ್ತು ಬಲಿಷ್ಠವಾಗುತ್ತಿರುವ ಡಾಲರ್ ಇಂಡೆಕ್ಸ್ (98.20) ಏಷ್ಯಾದ ಕರೆನ್ಸಿಗಳ ಮೇಲೆ ಒತ್ತಡ ಹೇರುತ್ತಿದೆ. ಇದರಿಂದಾಗಿ ರೂಪಾಯಿ ಮೌಲ್ಯ ಚೇತರಿಸಿಕೊಳ್ಳುವುದು ಸದ್ಯಕ್ಕೆ ಕಷ್ಟಕರವಾಗಿದೆ.
