ಸರ್ಕಾರಿ ಶಾಲೆಗಳಲ್ಲಿ ದ್ವಿಭಾಷಾ ತರಗತಿ ಪರಿಣಾಮಕಾರಿ ಅನುಷ್ಠಾನಕ್ಕೆ ಶಿಕ್ಷಕರಿಗೆ ತರಬೇತಿ

ಬೆಂಗಳೂರು: 2026-27ನೇ ಸಾಲಿನಲ್ಲಿ ರಾಜ್ಯದ ಸರ್ಕಾರಿ ಶಾಲೆಗಳಲ್ಲಿ  ದ್ವಿಭಾಷಾ ತರಗತಿಗಳನ್ನು ಹೆಚ್ಚು ಪರಿಣಾಮಕಾರಿಯಾಗಿ ಅನುಷ್ಠಾನಗೊಳಿಸಲು ಮತ್ತು ಶಾಲಾ ಮಟ್ಟದಲ್ಲಿ ಶೈಕ್ಷಣಿಕ ನಾಯಕತ್ವವನ್ನು ಬಲಪಡಿಸಲು ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆಯು ಆದ್ಯತೆ ನೀಡಿದೆ.

ರಾಜ್ಯದ Flagship ಶಾಲೆಗಳ ಮುಖ್ಯಶಿಕ್ಷಕರಿಗೆ 2 ದಿನಗಳ ಸಾಮರ್ಥ್ಯಾಭಿವೃದ್ಧಿ ತರಬೇತಿ ಆಯೋಜಿಸುತ್ತಿದೆ. ಆಡಳಿತಾತ್ಮಕ ಹಾಗೂ ಶೈಕ್ಷಣಿಕ ದೃಷ್ಟಿಕೋನದಿಂದ ಪ್ರತಿ ಜಿಲ್ಲೆಯಿಂದ ಇಲಾಖೆಯ 08 ಸಂಪನ್ಮೂಲ ವ್ಯಕ್ತಿಗಳಿಗೆ ಹಾಗೂ APF ಸಂಪನ್ಮೂಲ ವ್ಯಕ್ತಿಗಳಿಗೆ ರಾಜ್ಯ ಹಂತದಲ್ಲಿ ಬೆಂಗಳೂರಿನ RIESI ಸಂಸ್ಥೆಯಲ್ಲಿ ಈಗಾಗಲೇ ತರಬೇತಿ ನೀಡಲಾಗಿದೆ.

ಈ ಸಂಪನ್ಮೂಲ ವ್ಯಕ್ತಿಗಳ ಮೂಲಕ ರಾಜ್ಯದ Flagship ಶಾಲೆಗಳ 3,610 ಮುಖ್ಯಶಿಕ್ಷಕರಿಗೆ 02 ದಿನಗಳ ಸಾಮರ್ಥ್ಯಾಭಿವೃದ್ಧಿ ತರಬೇತಿ ಕಾರ್ಯಾಗಾರವನ್ನು DSERT, RIESI ಸಂಸ್ಥೆ, ಬೆಂಗಳೂರು ಹಾಗೂ APF ಸಂಸ್ಥೆಯ ಸಹಯೋಗದೊಂದಿಗೆ ಸಿ.ಟಿ.ಇ.ಗಳ ನೇತೃತ್ವದಲ್ಲಿ ದಿನಾಂಕ 24.08.2026 ರಿಂದ 22.09.2026ರವರೆಗೆ ವಿಭಾಗವಾರು ಆಯೋಜಿಸಲಾಗುತ್ತಿದೆ.

ದಿನಾಂಕ 24.08.2026 ರಿಂದ 02.09.2026 ರವರೆಗೆ 09 ಬ್ಯಾಚ್‌ ಗಳಲ್ಲಿ ಮೈಸೂರು ವಿಭಾಗದ 471 ಮುಖ್ಯ ಶಿಕ್ಷಕರಿಗೆ ತರಬೇತಿ ನಡೆಸಲಾಗುತ್ತಿದೆ. ಈ ತರಬೇತಿಯ ಮೂಲಕ ಶಾಲಾ ಆವರಣ ಮತ್ತು ತರಗತಿಗಳಲ್ಲಿ ಕನ್ನಡ ಹಾಗೂ ಇಂಗ್ಲಿಷ್ ಭಾಷೆಗಳ ಸಹಜ ಬಳಕೆಗೆ ಅನುಕೂಲಕರ ವಾತಾವರಣ ನಿರ್ಮಿಸುವುದು ಮತ್ತು ದ್ವಿಭಾಷಾ ಪಠ್ಯಪುಸ್ತಕಗಳ ವಿನ್ಯಾಸ, ಕಲಿವಿನ ಉದ್ದೇಶಗಳು ಹಾಗೂ ಬೋಧನಾ ತಂತ್ರಗಳನ್ನು ಸರಿಯಾಗಿ ಅರ್ಥೈಸಿಕೊಂಡು ಪರಿಣಾಮಕಾರಿಯಾಗಿ ಅನುಷ್ಠಾನಗೊಳಿಸಲು ಉದ್ದೇಶಿಸಲಾಗಿದೆ.