ಬರಗಾಲದ ತೀವ್ರತೆ ಹಾಗೂ ಎಲ್-ನಿನೋ ಪ್ರಭಾವದಿಂದಾಗಿ ಮುಂಗಾರು ಮಳೆ ತೀವ್ರ ಕೈಕೊಟ್ಟಿದ್ದು, ಕರ್ನಾಟಕ ಸೇರಿದಂತೆ ಇಡೀ ದಕ್ಷಿಣ ಭಾರತದಲ್ಲಿ ಆಹಾರ ಅಭಾವದ ಭೀತಿ ಎದುರಾಗಿದೆ. ರಾಜ್ಯದಲ್ಲಿ ಭತ್ತದ ನಾಟಿ ಪ್ರಮಾಣ ದಾಖಲೆ ಮಟ್ಟದಲ್ಲಿ ಕುಸಿದಿದ್ದು, ಮಾರುಕಟ್ಟೆಯಲ್ಲಿ ಅಕ್ಕಿ ಬೆಲೆ ಗಗನಕ್ಕೇರುತ್ತಿದೆ. ಒಂದೆಡೆ ಕೃಷಿಗೆ ನೀರಿಲ್ಲದೆ ರೈತರು ಕಂಗಾಲಾಗಿದ್ದರೆ, ಇನ್ನೊಂದೆಡೆ ಭತ್ತ ಸಿಗದೆ ರೈಸ್ ಮಿಲ್ಗಳು ಬಾಗಿಲು ಮುಚ್ಚುವ ಸ್ಥಿತಿ ತಲುಪಿವೆ.
ಬಿತ್ತನೆ ಪ್ರಮಾಣದಲ್ಲಿ ಶೇಕಡಾ 80 ರಷ್ಟು ಕುಸಿತ
ಪ್ರಸ್ತುತ ಸಾಲಿನಲ್ಲಿ ರಾಜ್ಯದಲ್ಲಿ ಒಟ್ಟು 10 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಭತ್ತ ಬಿತ್ತನೆಯ ಗುರಿ ಹೊಂದಲಾಗಿತ್ತು. ಆದರೆ ಮಳೆ ಅಭಾವದಿಂದಾಗಿ ಪ್ರಸ್ತುತ ಕೇವಲ 202 ಲಕ್ಷ ಹೆಕ್ಟೇರ್ (ಶೇ. 20) ಪ್ರದೇಶದಲ್ಲಿ ಮಾತ್ರ ನಾಟಿ ಕಾರ್ಯ ನಡೆದಿದೆ.
ರಾಯಚೂರು: 1,90 ಲಕ್ಷ ಹೆಕ್ಟೇರ್ ಗುರಿಯಲ್ಲಿ ಕೇವಲ 4020 ಹೆಕ್ಟೇರ್ (ಶೇ.2) ಮಾತ್ರ ಬಿತ್ತನೆ.
ಬಳ್ಳಾರಿ: 87,741 ಹೆಕ್ಟೇರ್ ಪೈಕಿ ಕೇವಲ 6,392 ಹೆಕ್ಟೇರ್ (ಶೇ. 10) ನಾಟಿ.
ದಾವಣಗೆರೆ: ಕೇವಲ ಶೇ. 1 ರಷ್ಟು ಬಿತ್ತನೆ ದಾಖಲಾಗಿದೆ.
ಮಂಡ್ಯ, ಮೈಸೂರು: ಕೆಆರ್ಎಸ್ ಹಾಗೂ ಕಬಿನಿ ನಾಲೆಗಳಿಗೆ ನೀರು ಹರಿಸದ ಕಾರಣ ರೈತರು ನಾಟಿ ಕಾರ್ಯದಿಂದ ದೂರ ಉಳಿದಿದ್ದಾರೆ.
ಬೆಳಗಾವಿ, ಧಾರವಾಡ, ದಕ್ಷಿಣ ಕನ್ನಡ, ಬೀದರ್ ಹಾಗೂ ಗದಗ ಜಿಲ್ಲೆಗಳಲ್ಲಿ ಸಾಧಾರಣ ಮಳೆಯಾಗಿದ್ದರಿಂದ ಬಿತ್ತನೆ ಕೊಂಚ ಸುಧಾರಿಸಿದೆ.
ಅಕ್ಕಿ ದರ ಏರಿಕೆಗೆ ಮುಖ್ಯ ಕಾರಣಗಳೇನು?
ತುಂಗಭದ್ರಾ ಡ್ಯಾಂ ಸಮಸ್ಯೆ: ಕ್ರಸ್ಟ್ ಗೇಟ್ ದುರಸ್ತಿ ಹಾಗೂ ನೀರಿನ ಕೊರತೆಯಿಂದಾಗಿ ಕೊಪ್ಪಳ, ರಾಯಚೂರು ಮತ್ತು ಬಳ್ಳಾರಿ ಭಾಗದಲ್ಲಿ ಕಳೆದ ಬೇಸಿಗೆಯಲ್ಲಿ ಸುಮಾರು 7 ಲಕ್ಷ ಹೆಕ್ಟೇರ್ ಬಿತ್ತನೆ ನಡೆದಿರಲಿಲ್ಲ.
ನೆರೆರಾಜ್ಯಗಳಿಂದ ಪೂರೈಕೆ ಬಂದ್: ಆಂಧ್ರಪ್ರದೇಶ ಹಾಗೂ ತೆಲಂಗಾಣದಲ್ಲೂ ಮಳೆ ಅಭಾವದಿಂದ ಭತ್ತದ ಇಳುವರಿ ಕಡಿಮೆಯಾಗಿದೆ. ಹೀಗಾಗಿ ಅಲ್ಲಿಂದ ಬರುವ ಅಕ್ಕಿ ಪೂರೈಕೆ ನಿಂತಿದೆ.
ಹೊರರಾಜ್ಯಗಳಿಗೆ ಭತ್ತ ರವಾನೆ: ಸ್ಥಳೀಯವಾಗಿ ಭತ್ತ ಒಣಗಿಸಲು ಬಿಸಿಲಿಲ್ಲದ ಕಾರಣ, ಉತ್ತಮ ಬೆಲೆ ಸಿಕ್ಕಿದ್ದರಿಂದ ವ್ಯಾಪಾರಿಗಳು ತಮಿಳುನಾಡು ಹಾಗೂ ಮಹಾರಾಷ್ಟ್ರಕ್ಕೆ ಭತ್ತ ಮಾರಾಟ ಮಾಡಿದ್ದಾರೆ.
ದಕ್ಷಿಣ ಭಾರತದಾದ್ಯಂತ ಬೆಲೆ ಬಿಸಿ
ಕರ್ನಾಟಕ: ಸಾಮಾನ್ಯ ಮಾರುಕಟ್ಟೆಯಲ್ಲಿ ₹೫೦ ರಷ್ಟಿದ್ದ ಅಕ್ಕಿ ದರ ಈಗ ₹70 ರಿಂದ ₹80 ರ ಗಡಿ ದಾಟಿದೆ. ಮುಂಬರುವ ದಿನಗಳಲ್ಲಿ ಇದು ₹100 ಮುಟ್ಟುವ ಆತಂಕವಿದೆ.
ಆಂಧ್ರಪ್ರದೇಶ: ಕೃಷ್ಣಾ ಡೆಲ್ಟಾದಲ್ಲಿ ಜುಲೈನಲ್ಲಿ ಶೇ. 69 ರಷ್ಟು ಮಳೆ ಅಭಾವ ಕಂಡುಬಂದಿದ್ದು, ಭತ್ತ ಬೆಳೆಯದಂತೆ ಜಲಸಂಪನ್ಮೂಲ ಇಲಾಖೆ ರೈತರಿಗೆ ಸೂಚಿಸಿದೆ. ವಿಜಯವಾಡದಲ್ಲಿ ಅಕ್ಕಿ ಚೀಲ ಒಂದಕ್ಕೆ ₹200 ರಷ್ಟು ಏರಿಕೆಯಾಗಿದೆ.
ತೆಲಂಗಾಣ: ಶೇ.30 ರಷ್ಟು ಮಳೆ ಕೊರತೆಯಾಗಿದ್ದು, ಭತ್ತ ಬೆಳೆಯುವ ವಿಸ್ತೀರ್ಣ ಶೇ. 45 ರಷ್ಟು ಕುಸಿಯುವ ಎಚ್ಚರಿಕೆಯನ್ನು ತಜ್ಞರು ನೀಡಿದ್ದಾರೆ.
ಕೇರಳ & ತಮಿಳುನಾಡು: ಓಣಂ ಹಬ್ಬದ ವೇಳೆಯಲ್ಲೇ ಕೇರಳದಲ್ಲಿ ಬ್ರಾಂಡೆಡ್ ಅಕ್ಕಿ ದರ ಕೆಜಿಗೆ ₹7 ರಷ್ಟು ಹೆಚ್ಚಾಗಿದೆ. ತಮಿಳುನಾಡಿನ ಕಾವೇರಿ ಡೆಲ್ಟಾದಲ್ಲಿ ಕುರುವೈ ಬಿತ್ತನೆ ಶೇ. 60ಕ್ಕೂ ಹೆಚ್ಚು ಕುಸಿದಿದೆ.
ಬಾಗಿಲು ಮುಚ್ಚುವ ಹಂತದಲ್ಲಿ ರೈಸ್ ಮಿಲ್ಗಳು
ದಾವಣಗೆರೆ ಹಾಗೂ ರಾಯಚೂರಿನ ಪ್ರಸಿದ್ಧ ಅಕ್ಕಿ ಗಿರಣಿಗಳಿಗೆ ಭತ್ತದ ಪೂರೈಕೆ ಸಂಪೂರ್ಣ ಸ್ಥಗಿತಗೊಂಡಿದೆ. ಗಿರಣಿಗಳಲ್ಲಿ ಇನ್ನು ಕೇವಲ ೧೫ ದಿನಗಳಿಗೆ ಆಗುವಷ್ಟು ಮಾತ್ರ ದಾಸ್ತಾನಿದ್ದು, ಶೀಘ್ರದಲ್ಲೇ ಬಹುತೇಕ ರೈಸ್ ಮಿಲ್ಗಳು ಕಾರ್ಯಾಚರಣೆ ನಿಲ್ಲಿಸುವ ಸಾಧ್ಯತೆಯಿದೆ.
ಪರಿಹಾರ ಮಾರ್ಗಗಳು
ಮಾರುಕಟ್ಟೆಯಲ್ಲಿ ಕೃತಕ ಅಭಾವ ಹಾಗೂ ಕಾಳಸಂತೆ ತಡೆಯಲು ಸರ್ಕಾರ ತಕ್ಷಣ ಕ್ರಮ ಕೈಗೊಳ್ಳಬೇಕಿದೆ. ಅಗತ್ಯವಿದ್ದರೆ ಭಾರತೀಯ ಆಹಾರ ನಿಗಮದ (FCI) ಗೋದಾಮುಗಳಿಂದ ಅಕ್ಕಿಯನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಬೇಕಿದೆ. ಪ್ರಸ್ತುತ ಜಲಾಶಯಗಳಿಗೆ ನೀರು ಹರಿಯುತ್ತಿದ್ದು, ತಡವಾಗಿಯಾದರೂ ನಾಟಿ ಕಾರ್ಯ ಮುಗಿದರೆ ನವೆಂಬರ್ ಅಥವಾ ಡಿಸೆಂಬರ್ ವೇಳೆಗೆ ಹೊಸ ಭತ್ತ ಮಾರುಕಟ್ಟೆಗೆ ಬರುವ ನಿರೀಕ್ಷೆಯಿದೆ. ಅಲ್ಲಿಯವರೆಗೆ ಅಕ್ಕಿ ದರ ಇಳಿಕೆಯಾಗುವುದು ಅನುಮಾನ.
