ಬಂಗಾರದ ಮೊಟ್ಟೆ ಇಡುವ ಬಾತುಕೋಳಿಯ ಕಥೆಯನ್ನು ನಾವು ಕೇಳಿದ್ದೇವೆ, ಆದರೆ ಚೀನಾದಲ್ಲಿ ನಡೆದ ಈ ಘಟನೆ ಆ ಕಥೆಯನ್ನು ನೆನಪಿಸುವಂತಿದೆ. ಮಾಂಸಕ್ಕಾಗಿ ಬಾತುಕೋಳಿಯನ್ನು ಕತ್ತರಿಸುತ್ತಿದ್ದಾಗ ಅದರ ಹೊಟ್ಟೆಯಲ್ಲಿ 10 ಗ್ರಾಂ ಚಿನ್ನ ಪತ್ತೆಯಾಗಿರುವುದು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಂಚಲನ ಸೃಷ್ಟಿಸಿದೆ.
ಘಟನೆಯ ವಿವರ:
ಚೀನಾದ ವ್ಯಕ್ತಿಯೊಬ್ಬರು ತಾವು ಸಾಕಿದ್ದ ಬಾತುಕೋಳಿಯನ್ನು ಆಹಾರಕ್ಕಾಗಿ ಬಳಸಲು ನಿರ್ಧರಿಸಿದ್ದರು. ಆದರೆ ಅದನ್ನು ಕತ್ತರಿಸಿದಾಗ, ಅದರ ಜೀರ್ಣಾಂಗವ್ಯೂಹದ ಬದಲು ಹೊಳೆಯುವ ಹಳದಿ ಲೋಹ ಕಂಡುಬಂದಿದೆ. ಇದನ್ನು ಪರೀಕ್ಷಿಸಿದಾಗ ಅದು ಅಪ್ಪಟ ಚಿನ್ನವೆಂದು ತಿಳಿದುಬಂದಿದೆ.
ಬಂಗಾರ ಬಂದಿದ್ದು ಹೇಗೆ ? : ಈ ಬಾತುಕೋಳಿಗಳು ನದಿಯ ತೀರದಲ್ಲಿ ಮುಕ್ತವಾಗಿ ಮೇಯುತ್ತಿದ್ದವು. ಆ ಪ್ರದೇಶದಲ್ಲಿ ಈ ಹಿಂದೆ ಚಿನ್ನದ ಗಣಿಗಾರಿಕೆ ನಡೆಯುತ್ತಿತ್ತು ಎನ್ನಲಾಗಿದೆ. ಮಣ್ಣಿನಲ್ಲಿ ಹುಳುಗಳನ್ನು ಹುಡುಕಿ ತಿನ್ನುವ ಸಂದರ್ಭದಲ್ಲಿ, ಬಾತುಕೋಳಿಯು ಮಣ್ಣಿನಲ್ಲಿದ್ದ ಚಿನ್ನದ ಕಣಗಳನ್ನು ಆಕಸ್ಮಿಕವಾಗಿ ನುಂಗಿರಬಹುದು ಎಂದು ಅಂದಾಜಿಸಲಾಗಿದೆ. ಈ ಲೋಹದ ಕಣಗಳನ್ನು ‘ಬರ್ನಿಂಗ್ ಟೆಸ್ಟ್’ಗೆ ಒಳಪಡಿಸಿದಾಗ, ಅವು ನಿಜವಾದ ಚಿನ್ನ ಎಂದು ದೃಢಪಟ್ಟಿದೆ. ಪತ್ತೆಯಾದ 10 ಗ್ರಾಂ ಚಿನ್ನದ ಮೌಲ್ಯ ಸುಮಾರು 12,000 ಯುವಾನ್, ಅಂದರೆ ಭಾರತೀಯ ರೂಪಾಯಿಗಳಲ್ಲಿ ಸರಿಸುಮಾರು ₹1.62 ಲಕ್ಷ.
ಪ್ರಸ್ತುತ ಚೀನಾದಲ್ಲಿ ಚಿನ್ನದ ಬೆಲೆ ಪ್ರತಿ ಗ್ರಾಂಗೆ 1,140 ರಿಂದ 1,190 ಯುವಾನ್ ಆಸುಪಾಸಿನಲ್ಲಿದೆ. ಮಾಂಸಕ್ಕಾಗಿ ಕತ್ತರಿಸಿದ ಬಾತುಕೋಳಿಯಿಂದ ಇಷ್ಟೊಂದು ದೊಡ್ಡ ಮೊತ್ತದ ಚಿನ್ನ ಸಿಕ್ಕಿರುವುದು ಮಾಲೀಕನಿಗೆ ಅನಿರೀಕ್ಷಿತ ಅದೃಷ್ಟ ತಂದಂತಾಗಿದೆ.
