ಖ್ಯಾತ ಲೇಖಕ ಅಮೀಶ್ ತ್ರಿಪಾಠಿ ಅವರ ‘ದಿ ಇಮ್ಮಾರ್ಟಲ್ಸ್ ಆಫ್ ಮೆಲುಹಾ’ (The Immortals of Meluha) ಕಾದಂಬರಿ ಆಧಾರಿತ ಸಿನಿಮಾದಲ್ಲಿ ಬಾಲಿವುಡ್ ನಟ ರಣವೀರ್ ಸಿಂಗ್ ಶಿವನ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಸುದ್ದಿ ಸಿನಿವಲಯದಲ್ಲಿ ಸಂಚಲನ ಮೂಡಿಸಿದೆ. ಈ ಮೆಗಾ ಪ್ರಾಜೆಕ್ಟ್ ಕುರಿತಾದ ವರದಿಗಳು ಈಗ ಹೊರಬಿದ್ದಿದ್ದು, ರಣವೀರ್ ಸಿಂಗ್ ಅವರ ‘ಮಾ ಕಸಂ ಫಿಲ್ಮ್ಸ್’ ಬ್ಯಾನರ್ ಅಡಿಯಲ್ಲಿ ಈ ಸಿನಿಮಾ ಮೂಡಿಬರಲಿದೆ.
ಮೂರು ಭಾಗಗಳಲ್ಲಿ ಬರಲಿದೆ ಪೌರಾಣಿಕ ಕಥೆ ಅಮೀಶ್ ತ್ರಿಪಾಠಿ ಅವರ ಶಿವ ಟ್ರೈಲಾಜಿಯು ಭಾರತೀಯ ಸಾಹಿತ್ಯ ಲೋಕದಲ್ಲಿ ಅತಿ ಹೆಚ್ಚು ಮಾರಾಟವಾದ ಪುಸ್ತಕಗಳ ಸರಣಿಯಾಗಿದೆ. ಈಗ ಇದನ್ನೇ ಸಿನಿಮಾ ರೂಪಕ್ಕೆ ತರಲು ರಣವೀರ್ ಮುಂದಾಗಿದ್ದು, ಬಿರ್ಲಾ ಸ್ಟುಡಿಯೋಸ್ ಜೊತೆ ಕೈಜೋಡಿಸಿದ್ದಾರೆ. ಈ ಕಥೆಯು ಒಟ್ಟು ಮೂರು ಭಾಗಗಳಲ್ಲಿ ತೆರೆಯ ಮೇಲೆ ಬರಲಿದ್ದು, ಮೊದಲ ಭಾಗವು 2028ರಲ್ಲಿ ಸೆಟ್ಟೇರುವ ಸಾಧ್ಯತೆಯಿದೆ. ಹಿಮಾಲಯದ ಯೋಧನೊಬ್ಬ ಮೆಲುಹಾ ಸಾಮ್ರಾಜ್ಯಕ್ಕೆ ಬಂದು ಹೇಗೆ ಅಲ್ಲಿನ ರಕ್ಷಕ ‘ನೀಲಕಂಠ’ನಾಗಿ ಬದಲಾಗುತ್ತಾನೆ ಎಂಬುದು ಈ ಸಿನಿಮಾದ ಕಥಾಹಂದರ.
ತಯಾರಿಯಲ್ಲಿ ಸಿನಿಮಾ ತಂಡ ಪ್ರಸ್ತುತ ಸಿನಿಮಾದ ಚಿತ್ರಕಥೆ ಮತ್ತು ಪ್ರಪಂಚದ ನಿರ್ಮಾಣದ (World-building) ಬಗ್ಗೆ ಕೆಲಸಗಳು ನಡೆಯುತ್ತಿವೆ. ಈ ಬೃಹತ್ ಚಿತ್ರಕ್ಕೆ ಯಾರು ನಿರ್ದೇಶನ ಮಾಡಲಿದ್ದಾರೆ ಎಂಬುದು ಇನ್ನೂ ಅಂತಿಮವಾಗಿಲ್ಲ. ಸ್ಕ್ರಿಪ್ಟ್ ಕೆಲಸಗಳು ಪೂರ್ಣಗೊಂಡ ನಂತರವಷ್ಟೇ ನಿರ್ದೇಶಕರ ಹೆಸರನ್ನು ಅಧಿಕೃತವಾಗಿ ಘೋಷಿಸಲು ತಂಡ ನಿರ್ಧರಿಸಿದೆ. ಪೌರಾಣಿಕ ಹಿನ್ನೆಲೆಯ ಜೊತೆಗೆ ಇತಿಹಾಸ ಮತ್ತು ಫ್ಯಾಂಟಸಿಯ ಮಿಶ್ರಣವಿರುವ ಈ ಸರಣಿಯು ಭಾರತೀಯ ಚಿತ್ರರಂಗದ ಮತ್ತೊಂದು ದೃಶ್ಯ ವೈಭವವಾಗುವ ಲಕ್ಷಣಗಳಿವೆ.
2010ರಲ್ಲಿ ಬಿಡುಗಡೆಯಾದ ‘ದಿ ಇಮ್ಮಾರ್ಟಲ್ಸ್ ಆಫ್ ಮೆಲುಹಾ’ ಕಾದಂಬರಿಯು ಈವರೆಗೆ ಲಕ್ಷಾಂತರ ಪ್ರತಿಗಳು ಮಾರಾಟವಾಗಿದ್ದು, ಈಗ ಸಿನಿಮಾದ ಮೂಲಕ ದೊಡ್ಡ ಮಟ್ಟದಲ್ಲಿ ಅಭಿಮಾನಿಗಳ ಮುಂದೆ ಬರಲು ಸಜ್ಜಾಗಿದೆ. ರಣವೀರ್ ಸಿಂಗ್ ಅವರು ಶಿವನ ಅವತಾರದಲ್ಲಿ ಹೇಗೆ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಮನೆಮಾಡಿದೆ.
