ಜನವರಿ ತಿಂಗಳು ಮುಗಿಯುತ್ತಿದ್ದಂತೆ ಫೆಬ್ರವರಿ ತಿಂಗಳು ಆರಂಭವಾಗಲಿದೆ. ಈ ಬಾರಿ ಫೆಬ್ರವರಿ ಆರಂಭವು ಸಾಮಾನ್ಯ ಜನರಿಗೆ ಅತ್ಯಂತ ವಿಶೇಷವಾಗಿರಲಿದೆ. 1 ಫೆಬ್ರವರಿ 2026 ರಂದು ಒಂದು ಕಡೆ ದೇಶದ ಕೇಂದ್ರ ಬಜೆಟ್ ಮಂಡನೆಯಾಗಲಿದ್ದರೆ, ಮತ್ತೊಂದು ಕಡೆ ದೈನಂದಿನ ಜೀವನಕ್ಕೆ ಸಂಬಂಧಿಸಿದ ಹಲವು ಪ್ರಮುಖ ನಿಯಮಗಳು ಬದಲಾಗಲಿವೆ.
ಈ ಬದಲಾವಣೆಗಳು ನೇರವಾಗಿ ನಿಮ್ಮ ಜೇಬು, ಮನೆ ವೆಚ್ಚ, ತೆರಿಗೆ ಯೋಜನೆ (Tax Planning), ಹೂಡಿಕೆ ಮತ್ತು ದೈನಂದಿನ ಅಗತ್ಯಗಳ ಮೇಲೆ ಪ್ರಭಾವ ಬೀರಲಿವೆ. ಗ್ಯಾಸ್ ಸಿಲಿಂಡರ್ನಿಂದ ಹಿಡಿದು ಸಿಗರೇಟ್ವರೆಗೆ, ಷೇರು ಮಾರುಕಟ್ಟೆಯಿಂದ ಹಿಡಿದು ರೈತರು ಮತ್ತು ಸರ್ಕಾರಿ ನೌಕರರವರೆಗೆ ಎಲ್ಲರಿಗೂ ಏನಾದರೂ ಒಂದು ದೊಡ್ಡ ಬದಲಾವಣೆ ಕಾದಿದೆ. ಇಂತಹ ಪರಿಸ್ಥಿತಿಯಲ್ಲಿ, ಫೆಬ್ರವರಿ 1 ರಿಂದ ಏನೇನು ಬದಲಾಗಲಿದೆ ಮತ್ತು ಅದು ನಿಮ್ಮ ಹಣಕಾಸಿನ ಸ್ಥಿತಿ ಹಾಗೂ ಜೀವನದ ಮೇಲೆ ಹೇಗೆ ಪರಿಣಾಮ ಬೀರಲಿದೆ ಎಂಬುದನ್ನು ತಿಳಿದುಕೊಳ್ಳುವುದು ಬಹಳ ಮುಖ್ಯ.
1) ಕೇಂದ್ರ ಬಜೆಟ್ 2026 (Union Budget)
ಫೆಬ್ರವರಿ 1 ರಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಸಂಸತ್ತಿನಲ್ಲಿ ಕೇಂದ್ರ ಬಜೆಟ್ ಮಂಡಿಸಲಿದ್ದಾರೆ. ಇದು ಆದಾಯ ತೆರಿಗೆ (Income Tax) ಮಿತಿಗಳು, ವಿವಿಧ ವಸ್ತುಗಳ ಬೆಲೆ ಏರಿಕೆ ಅಥವಾ ಇಳಿಕೆ ಮತ್ತು ದೇಶದ ಆರ್ಥಿಕತೆಯ ಮೇಲೆ ದೊಡ್ಡ ಪರಿಣಾಮ ಬೀರಲಿದೆ.
2) ಫಾಸ್ಟ್ ಟ್ಯಾಗ್ (FASTag) ಹೊಸ ನಿಯಮ – ದೊಡ್ಡ ನೆಮ್ಮದಿ
ನ್ಯಾಷನಲ್ ಹೈವೇ ಅಥಾರಿಟಿ ಆಫ್ ಇಂಡಿಯಾ (NHAI) ಫೆಬ್ರವರಿ 1 ರಿಂದ ಕಾರ್, ಜೀಪ್ ಮತ್ತು ವ್ಯಾನ್ಗಳಿಗೆ KYV (Know Your Vehicle) ಪ್ರಕ್ರಿಯೆಯನ್ನು ರದ್ದುಗೊಳಿಸಿದೆ.
• ಬದಲಾವಣೆ: ಇನ್ನು ಮುಂದೆ ಹೊಸ ಫಾಸ್ಟ್ ಟ್ಯಾಗ್ ಪಡೆಯುವಾಗ ಅಥವಾ ಬಳಸುವಾಗ ಪದೇ ಪದೇ ದಾಖಲೆಗಳನ್ನು ನೀಡಿ ವೆರಿಫಿಕೇಶನ್ ಮಾಡುವ ಕಿರಿಕಿರಿ ಇರುವುದಿಲ್ಲ. ಟ್ಯಾಗ್ ನೀಡುವ ಮೊದಲೇ ಬ್ಯಾಂಕ್ಗಳು ‘ವಾಹನ’ (VAHAN) ಡೇಟಾಬೇಸ್ ಮೂಲಕ ವಿವರಗಳನ್ನು ಪರಿಶೀಲಿಸುವುದನ್ನು ಕಡ್ಡಾಯಗೊಳಿಸಲಾಗಿದೆ.
3) ಎಲ್ಪಿಜಿ ಸಿಲಿಂಡರ್ ಬೆಲೆ (LPG Price)
ಪ್ರತಿ ತಿಂಗಳಂತೆ ಫೆಬ್ರವರಿ 1 ರಂದು ತೈಲ ಕಂಪನಿಗಳು ಗ್ಯಾಸ್ ಸಿಲಿಂಡರ್ ಬೆಲೆಗಳನ್ನು ಪರಿಷ್ಕರಿಸಲಿವೆ. ಬಜೆಟ್ ದಿನವಾದ್ದರಿಂದ ಈ ಬಾರಿ ಗೃಹಬಳಕೆಯ (14.2 ಕೆಜಿ) ಅಥವಾ ವಾಣಿಜ್ಯ (19 ಕೆಜಿ) ಸಿಲಿಂಡರ್ ಬೆಲೆಯಲ್ಲಿ ಬದಲಾವಣೆಯಾಗುವ ಸಾಧ್ಯತೆ ಇದೆ.
4) ಪಾನ್ ಮಸಾಲಾ ಮತ್ತು ಸಿಗರೇಟ್ ಬೆಲೆ ಏರಿಕೆ
ವರದಿಗಳ ಪ್ರಕಾರ, ಸರ್ಕಾರವು ತಂಬಾಕು ಉತ್ಪನ್ನಗಳು ಮತ್ತು ಪಾನ್ ಮಸಾಲಾಗಳ ಮೇಲೆ ಹೊಸ ‘ಉತ್ಪಾದನಾ ಶುಲ್ಕ’ (Excise Duty) ಅಥವಾ ಹೆಚ್ಚಿನ ತೆರಿಗೆಯನ್ನು ಫೆಬ್ರವರಿ 1 ರಿಂದ ಜಾರಿಗೆ ತರಬಹುದು. ಇದರಿಂದ ಇವುಗಳ ಬೆಲೆ ಏರಿಕೆಯಾಗುವ ಸಾಧ್ಯತೆ ದಟ್ಟವಾಗಿದೆ.
5) ಆಸ್ತಿ ನೋಂದಣಿಯಲ್ಲಿ ಆಧಾರ್ ಕಡ್ಡಾಯ
ಕೆಲವು ಹೊಸ ನಿಯಮಗಳ ಪ್ರಕಾರ, ಫೆಬ್ರವರಿ 1 ರಿಂದ ಆಸ್ತಿ ನೋಂದಣಿ (Property Registration) ಸಮಯದಲ್ಲಿ ಖರೀದಿದಾರರು, ಮಾರಾಟಗಾರರು ಮತ್ತು ಸಾಕ್ಷಿಗಳ ಆಧಾರ್ ಬಯೋಮೆಟ್ರಿಕ್ ದೃಢೀಕರಣವನ್ನು ಕಡ್ಡಾಯಗೊಳಿಸುವ ಸಾಧ್ಯತೆಯಿದೆ. ಇದು ನಕಲಿ ವ್ಯವಹಾರಗಳನ್ನು ತಡೆಯಲು ಸಹಕಾರಿಯಾಗಲಿದೆ.
6) ಇನ್-ಆಕ್ಟಿವ್ ಬ್ಯಾಂಕ್ ಖಾತೆಗಳು
ಆರ್ಬಿಐ ನಿರ್ದೇಶನದಂತೆ, ದೀರ್ಘಕಾಲದಿಂದ (ಸುಮಾರು 6 ತಿಂಗಳಿಂದ 1 ವರ್ಷ) ಯಾವುದೇ ವ್ಯವಹಾರ ನಡೆಸದ ಶೂನ್ಯ ಬ್ಯಾಲೆನ್ಸ್ ಖಾತೆಗಳನ್ನು ಬ್ಯಾಂಕುಗಳು ಫೆಬ್ರವರಿ 1 ರಿಂದ ‘ಇನ್-ಆಕ್ಟಿವ್’ (Inactive) ಮಾಡುವ ಅಥವಾ ಮುಚ್ಚುವ ಪ್ರಕ್ರಿಯೆ ಆರಂಭಿಸಲಿವೆ.
7) ಆದಾಯ ತೆರಿಗೆಯಲ್ಲಿ ವಿನಾಯಿತಿಯ ನಿರೀಕ್ಷೆ
ಹೊಸ ತೆರಿಗೆ ಪದ್ಧತಿಯಲ್ಲಿಯೂ NPS, ಆರೋಗ್ಯ ವಿಮೆ ಮತ್ತು ಗೃಹ ಸಾಲದ ಮೇಲಿನ ವೆಚ್ಚಗಳಿಗೆ ತೆರಿಗೆ ವಿನಾಯಿತಿ ನೀಡಬೇಕು ಎಂಬುದು ಉದ್ಯೋಗಿಗಳ ಬೇಡಿಕೆಯಾಗಿದೆ. ತೆರಿಗೆ ರಿಟರ್ನ್ (ITR) ಸಲ್ಲಿಕೆ ಪ್ರಕ್ರಿಯೆಯನ್ನು ಇನ್ನಷ್ಟು ಸರಳಗೊಳಿಸುವ ನಿರೀಕ್ಷೆಯೂ ಇದೆ.
8) ಬಜೆಟ್ ದಿನದಂದು ಶೇರು ಮಾರುಕಟ್ಟೆ ಕಾರ್ಯನಿರ್ವಹಿಸಲಿದೆ
ಸಾಮಾನ್ಯವಾಗಿ ಭಾನುವಾರ ಮಾರುಕಟ್ಟೆಗೆ ರಜೆ ಇರುತ್ತದೆ. ಆದರೆ, ಫೆಬ್ರವರಿ 1 ಭಾನುವಾರವಾಗಿದ್ದರೂ ಸಹ NSE ಮತ್ತು BSE ಶೇರು ಮಾರುಕಟ್ಟೆಗಳು ಎಂದಿನಂತೆ ಕಾರ್ಯನಿರ್ವಹಿಸಲಿವೆ ಎಂದು ಘೋಷಿಸಲಾಗಿದೆ. ಬೆಳಿಗ್ಗೆ 9:15 ರಿಂದ ಮಧ್ಯಾಹ್ನ 3:30 ರವರೆಗೆ ವಹಿವಾಟು ನಡೆಯಲಿದ್ದು, ಬಜೆಟ್ ಮಂಡನೆಯಿಂದಾಗಿ ಮಾರುಕಟ್ಟೆಯಲ್ಲಿ ಏರಿಳಿತಗಳು ಕಂಡುಬರಬಹುದು.
9) ಸಿಎನ್ಜಿ, ಪಿಎನ್ಜಿ ಮತ್ತು ಎಟಿಎಫ್ ದರ ಬದಲಾವಣೆ
ಸಿಎನ್ಜಿ (ವಾಹನ ಇಂಧನ), ಪಿಎನ್ಜಿ (ಪೈಪ್ಡ್ ಗ್ಯಾಸ್) ಮತ್ತು ವಿಮಾನ ಇಂಧನದ (ATF) ಬೆಲೆಗಳಲ್ಲಿಯೂ ಬದಲಾವಣೆಯಾಗಲಿದೆ. ಇದರಿಂದ ಪ್ರಯಾಣದ ವೆಚ್ಚ ಮತ್ತು ವಿಮಾನ ಟಿಕೆಟ್ ದರಗಳಲ್ಲಿ ಏರುಪೇರಾಗಬಹುದು
10) ಏಪ್ರಿಲ್ನಿಂದ ಹೊಸ ಆದಾಯ ತೆರಿಗೆ ಕಾಯ್ದೆ
1961ರ ಹಳೆಯ ಕಾನೂನಿನ ಬದಲಿಗೆ ಹೊಸ ‘ಆದಾಯ ತೆರಿಗೆ ಕಾಯ್ದೆ’ ಏಪ್ರಿಲ್ 2026 ರಿಂದ ಜಾರಿಗೆ ಬರಲಿದೆ. ಇದರಲ್ಲಿ ನಿಯಮಗಳು ಸರಳವಾಗಿರಲಿದ್ದು, ಹೊಸ ಟ್ಯಾಕ್ಸ್ ರಿಟರ್ನ್ ಫಾರ್ಮ್ಗಳು ಜನವರಿಯಲ್ಲೇ ಲಭ್ಯವಾಗಲಿವೆ.
ಪಿಎಂ ಕಿಸಾನ್ 22ನೇ ಕಂತು: ಪಿಎಂ ಕಿಸಾನ್ ಯೋಜನೆಯಡಿ ವಾರ್ಷಿಕ ₹6000 ಮೊತ್ತವನ್ನು ಹೆಚ್ಚಿಸಬೇಕು ಎಂಬುದು ರೈತರ ಬೇಡಿಕೆಯಾಗಿದೆ. 22ನೇ ಕಂತಿನ ಹಣವು ಫೆಬ್ರವರಿ ಕೊನೆಯ ವಾರದಲ್ಲಿ ಬಿಡುಗಡೆಯಾಗುವ ಸಾಧ್ಯತೆಯಿದೆ.
8ನೇ ವೇತನ ಆಯೋಗದ ಕುರಿತು ಚರ್ಚೆ
ಸರ್ಕಾರಿ ನೌಕರರ 8ನೇ ವೇತನ ಆಯೋಗದ ರಚನೆ ಮತ್ತು ಫಿಟ್ಮೆಂಟ್ ಫ್ಯಾಕ್ಟರ್ (Fitment Factor) 3.0 ಗೆ ಹೆಚ್ಚಿಸುವ ಕುರಿತು ಫೆಬ್ರವರಿ 25 ರಂದು ಪ್ರಮುಖ ಸಭೆ ನಡೆಯಲಿದೆ. ಇದರಿಂದ ನೌಕರರ ಮೂಲ ವೇತನ ಹೆಚ್ಚಾಗುವ ನಿರೀಕ್ಷೆಯಿದೆ.
