ಮುಂಬೈ: ಬಾಲಿವುಡ್‌ನ ಹಿರಿಯ ನಟಿ ಬಿಪಾಶಾ ಬಸು ತಾವು ಖರೀದಿಸಿದ್ದ ಪ್ರೊಟೀನ್ ಪೌಡರ್ ಡಬ್ಬಿಯಲ್ಲಿ ಹುಳುಗಳು ಪತ್ತೆಯಾಗಿವೆ ಎಂದು ಆರೋಪಿಸಿ ಆಘಾತ ವ್ಯಕ್ತಪಡಿಸಿದ್ದಾರೆ. ಈ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಹಂಚಿಕೊಂಡಿರುವ ಅವರು, ‘ರಿಯಲ್ ಲೈಫ್ ಸಿಂಗಂ’ ಎಂದೇ ಖ್ಯಾತರಾಗಿರುವ ಮಹಾರಾಷ್ಟ್ರದ ಆಹಾರ ಮತ್ತು ಔಷಧ ಆಡಳಿತ (FDA) ಆಯುಕ್ತ, ಐಎಎಸ್ ಅಧಿಕಾರಿ ತುಕಾರುಂ ಮುಂಡೆ ಅವರನ್ನು ಟ್ಯಾಗ್ ಮಾಡಿ ದೂರು ನೀಡಿದ್ದಾರೆ.
ಅಯ್ಯೋ..ಪ್ರೊಟೀನ್ ಪೌಡರ್‌ನಲ್ಲಿ ಹುಳುಗಳು
ಬಿಪಾಶಾ ಬಸು ಇತ್ತೀಚೆಗೆ ಖರೀದಿಸಿದ್ದ ‘ಐಸೊಪುರ್’ (Isopure) ಪ್ರೊಟೀನ್ ಪೌಡರ್ ಡಬ್ಬಿಯನ್ನು ತೆರೆದಾಗ ಅದರೊಳಗೆ ಸಣ್ಣ ಸಣ್ಣ ಹುಳುಗಳು ಓಡಾಡುತ್ತಿರುವುದು ಕಂಡುಬಂದಿದೆ ಎಂದು ತಿಳಿಸಿದ್ದಾರೆ. ಈ ಕುರಿತ ವಿಡಿಯೋವನ್ನು ಅವರು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.ವಿಡಿಯೋದಲ್ಲಿ ತಮ್ಮ ಬೆರಳಿನ ಮೇಲೆ ಹುಳುವೊಂದನ್ನು ತೋರಿಸಿರುವ ಬಿಪಾಶಾ, ಉತ್ಪನ್ನದ ಗುಣಮಟ್ಟದ ಬಗ್ಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
“ನೀವೇ ನಮಗಿರುವ ಏಕೈಕ ಆಶಾಕಿರಣ”
“ಈ ಹೊಸ ಡಬ್ಬಿಯೊಳಗೆ ಸಣ್ಣ ಸಣ್ಣ ಹುಳುಗಳು ತುಂಬಿವೆ. ನಾವು ಖರೀದಿಸುವ ಪ್ರತಿಯೊಂದು ವಸ್ತುವೂ ಕಲಬೆರಕೆ ರಹಿತವಾಗಿದ್ದು, ಸ್ವಚ್ಛ ಹಾಗೂ ಸುರಕ್ಷಿತ ಉತ್ಪನ್ನಗಳು ದೊರೆಯಬೇಕು. ಈ ನಿಟ್ಟಿನಲ್ಲಿ ನೀವೇ ನಮಗಿರುವ ಏಕೈಕ ಆಶಾಕಿರಣ” ಎಂದು ಬಿಪಾಶಾ ಬಸು ತುಕಾರುಂ ಮುಂಡೆ ಅವರನ್ನು ಉದ್ದೇಶಿಸಿ ಹೇಳಿದ್ದಾರೆ.
ದುಬಾರಿ ಅಂತಾರಾಷ್ಟ್ರೀಯ ಬ್ರ್ಯಾಂಡ್‌ನಲ್ಲೂ ಹುಳುಗಳು!
ದೇಶಾದ್ಯಂತ ಫಿಟ್‌ನೆಸ್‌ ಸಂಸ್ಕೃತಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಸಿನಿ ತಾರೆಯರು ಮಾತ್ರವಲ್ಲದೆ, ಯುವಜನರೂ ಪ್ರೊಟೀನ್ ಸಪ್ಲಿಮೆಂಟ್‌ಗಳನ್ನು ನಿಯಮಿತವಾಗಿ ಬಳಸುತ್ತಿದ್ದಾರೆ. ಇಂತಹ ಸಂದರ್ಭದಲ್ಲಿ ದುಬಾರಿ ಅಂತಾರಾಷ್ಟ್ರೀಯ ಬ್ರ್ಯಾಂಡ್‌ನ ಪ್ರೊಟೀನ್ ಪೌಡರ್‌ನಲ್ಲೇ ಹುಳುಗಳು ಪತ್ತೆಯಾಗಿರುವುದು ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಕಾರಣವಾಗಿದೆ. ಈ ಘಟನೆಗೆ ಸಂಬಂಧಿಸಿದಂತೆ ನೆಟ್ಟಿಗರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, ಆಹಾರ ಉತ್ಪನ್ನಗಳ ಗುಣಮಟ್ಟದ ಮೇಲೆ ನಿಗಾ ವಹಿಸುವಂತೆ ಆಗ್ರಹಿಸಿದ್ದಾರೆ.
ತುಕಾರುಂ ಮುಂಡೆಗೆ ಹೆಚ್ಚುತ್ತಿರುವ ಬೆಂಬಲ
ಮಹಾರಾಷ್ಟ್ರದಲ್ಲಿ ಆಹಾರ ಮತ್ತು ಔಷಧ ಕಲಬೆರಕೆ ವಿರುದ್ಧ ಕಠಿಣ ಕ್ರಮಗಳಿಗೆ ಹೆಸರುವಾಸಿಯಾಗಿರುವ ಆಯುಕ್ತ ತುಕಾರುಂ ಮುಂಡೆ ಅವರಿಗೆ ಈ ರೀತಿಯ ದೂರುಗಳು ಇದೇ ಮೊದಲಲ್ಲ.
ಈ ಹಿಂದೆ ಕಿರುತೆರೆ ನಟಿ ಶ್ವೇತಾ ತಿವಾರಿ ಕೂಡ ಸ್ವಿಗ್ಗಿ ಇನ್‌ಸ್ಟಾಮಾರ್ಟ್ ಮೂಲಕ ಆರ್ಡರ್ ಮಾಡಿದ್ದ ಪಾನೀಯದ ಕ್ಯಾನ್‌ನೊಂದಿಗೆ ಜಿರಳೆ ಬಂದಿರುವುದಾಗಿ ಆರೋಪಿಸಿ ವಿಡಿಯೋ ಹಂಚಿಕೊಂಡಿದ್ದರು. ಈ ವಿಚಾರವನ್ನೂ ಅವರು ತುಕಾರುಂ ಮುಂಡೆ ಅವರ ಗಮನಕ್ಕೆ ತಂದಿದ್ದರು.
‘ಟೀಮ್ ತುಕಾರುಂ ಮುಂಡೆ’ ಟಿ-ಶರ್ಟ್ ಧರಿಸಿದ್ದ ಪ್ರೀತಿ ಜಿಂಟಾ
ತುಕಾರುಂ ಮುಂಡೆ ಅವರ ಕಠಿಣ ಕ್ರಮಗಳಿಗೆ ಹಲವು ನಟ-ನಟಿಯರು ಬೆಂಬಲ ವ್ಯಕ್ತಪಡಿಸಿದ್ದಾರೆ. ಬಾಲಿವುಡ್ ನಟಿ ಪ್ರೀತಿ ಜಿಂಟಾ ಅವರು ‘ಟೀಮ್ ತುಕಾರುಂ ಮುಂಡೆ’ ಎಂದು ಬರೆದಿರುವ ಟಿ-ಶರ್ಟ್ ಧರಿಸಿ ಅವರಿಗೆ ಬೆಂಬಲ ಸೂಚಿಸಿದ್ದರು.ನಟಿಯರಾದ ಟ್ವಿಂಕಲ್ ಖನ್ನಾ, ಡೈಸಿ ಶಾ ಸೇರಿದಂತೆ ಹಲವರು ಕೂಡ ತುಕಾರುಂ ಮುಂಡೆ ಅವರ ಕಠಿಣ ಕ್ರಮಗಳನ್ನು ಶ್ಲಾಘಿಸಿದ್ದಾರೆ.
ಕುಟುಂಬ ಜೀವನದತ್ತ ಬಿಪಾಶಾ ಬಸು ಗಮನ
ಇತ್ತೀಚೆಗೆ ಬಿಪಾಶಾ ಬಸು ‘ಎಲ್ಲೆ’ ಡಿಜಿಟಲ್ ಮ್ಯಾಗಜೀನ್‌ನ ಕವರ್ ಪೇಜ್‌ನಲ್ಲಿ ಕಾಣಿಸಿಕೊಂಡಿದ್ದರು. ಈ ಸಂದರ್ಭದಲ್ಲಿ ನೀಡಿದ ಸಂದರ್ಶನದಲ್ಲಿ ಅವರು ಮಾತೃತ್ವ ಹಾಗೂ ತಮ್ಮ ವೃತ್ತಿಜೀವನದ ಆಯ್ಕೆಗಳ ಕುರಿತು ಮನಬಿಚ್ಚಿ ಮಾತನಾಡಿದ್ದರು.
2015ರಲ್ಲಿ ಕೊನೆಯ ಬಾರಿ ಸಿನಿಮಾದಲ್ಲಿ ನಟನೆ
ಬಿಪಾಶಾ ಬಸು 2015ರಲ್ಲಿ ಬಿಡುಗಡೆಯಾದ ‘ಅಲೋನ್’ ಸಿನಿಮಾದಲ್ಲಿ ಕೊನೆಯ ಬಾರಿ ನಟಿಸಿದ್ದರು. 2016ರಲ್ಲಿ ನಟ ಕರಣ್ ಸಿಂಗ್ ಗ್ರೋವರ್ ಅವರನ್ನು ವಿವಾಹವಾದ ಅವರು, 2022ರಲ್ಲಿ ಹೆಣ್ಣುಮಗು ದೇವಿಗೆ ತಾಯಿಯಾದರು.
ಸದ್ಯ ಯಾವುದೇ ಹೊಸ ಸಿನಿಮಾವನ್ನು ಅವರು ಘೋಷಿಸಿಲ್ಲ. ಆದರೆ ಸಾಮಾಜಿಕ ಜಾಲತಾಣಗಳ ಮೂಲಕ ತಮ್ಮ ಅಭಿಮಾನಿಗಳೊಂದಿಗೆ ನಿರಂತರವಾಗಿ ಸಂಪರ್ಕದಲ್ಲಿದ್ದಾರೆ.
