ಬೆಂಗಳೂರು : ರಾಜ್ಯದ ಜನತೆಗೆ ಬೆಲೆ ಏರಿಕೆಯ ಮತ್ತೊಂದು ಬರೆ ಬಿದ್ದಿದೆ. ಮಧ್ಯಪ್ರಾಚ್ಯದ ಬಿಕ್ಕಟ್ಟಿನಿಂದಾಗಿ ಇಂಧನ ದರ ಏರಿಕೆಯಾಗುತ್ತಿರುವ ಬೆನ್ನಲ್ಲೇ, ರಾಜ್ಯದ ಖಾಸಗಿ ಬಸ್ ಮಾಲೀಕರು ಇಂದಿನಿಂದಲೇ ಜಾರಿಗೆ ಬರುವಂತೆ ಟಿಕೆಟ್ ದರವನ್ನು ಶೇಕಡಾ 20 ರಿಂದ 30 ರಷ್ಟು ಹೆಚ್ಚಿಸಿದ್ದಾರೆ. ಡೀಸೆಲ್ ಬೆಲೆಯಲ್ಲಿ 3 ರೂಪಾಯಿ ಏರಿಕೆಯಾದ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದ್ದು, ಬೆಂಗಳೂರಿನಿಂದ ರಾಜ್ಯದ ವಿವಿಧ ಪ್ರಮುಖ ನಗರಗಳಿಗೆ ಸಂಚರಿಸುವ ಪ್ರಯಾಣಿಕರ ಜೇಬಿಗೆ ಈಗ ನೇರ ಹೊರೆ ಬೀಳಲಿದೆ.
ಹೌದು, ಮಧ್ಯಪ್ರಾಚ್ಯದ ಬಿಕ್ಕಟ್ಟಿನಿಂದಾಗಿ ಕಚ್ಚಾ ತೈಲ ದರ ಏರಿಕೆಯಾಗಿದ್ದು, ಭಾರತದಲ್ಲಿ ಡೀಸೆಲ್ ಬೆಲೆ ಪ್ರತಿ ಲೀಟರ್‌ಗೆ 3 ರೂಪಾಯಿ ಹೆಚ್ಚಳವಾಗಿದೆ. ಇದರ ಬೆನ್ನಲ್ಲೇ ರಾಜ್ಯದ ಖಾಸಗಿ ಬಸ್ ಮಾಲೀಕರು ಅನಿವಾರ್ಯವಾಗಿ ಬಸ್ ಟಿಕೆಟ್ ದರವನ್ನು ಏರಿಸಲು ನಿರ್ಧರಿಸಿದ್ದಾರೆ.
ಹೌದು. ಖಾಸಗಿ ಬಸ್ ಟಿಕೆಟ್ ದರವನ್ನು ಶೇಕಡಾ 20 ರಿಂದ 30 ರಷ್ಟು ಹೆಚ್ಚಳ ಮಾಡಲು ನಿರ್ಧರಿಸಲಾಗಿದೆ. ಇಂದು (ಮೇ 15) ಮಧ್ಯರಾತ್ರಿಯಿಂದಲೇ ಹೊಸ ದರ ಅನ್ವಯವಾಗಲಿದೆ ಎಂದು ಹೇಳಲಾಗುತ್ತಿದೆ. ಈಗಾಗಲೇ ಟಿಕೆಟ್ ಕಾಯ್ದಿರಿಸಿದವರಿಗೆ ಹಳೆಯ ದರವೇ ಇರಲಿದೆ. ಹೊಸದಾಗಿ ಬುಕ್ ಮಾಡುವವರಿಗೆ ಹೆಚ್ಚಿನ ದರ ಅನ್ವಯವಾಗಲಿದೆ.
ಪ್ರಮುಖ ನಗರಗಳ ನಡುವಿನ ಪರಿಷ್ಕೃತ ದರ ಪಟ್ಟಿ (ನಾನ್ ಎಸಿ ಸ್ಲೀಪರ್ ಬಸ್)
ಡೀಸೆಲ್ ದರ ಏರಿಕೆಯ ನಂತರ ಪ್ರಮುಖ ನಗರಗಳ ನಡುವಿನ ಟಿಕೆಟ್ ಬೆಲೆ ಈ ಕೆಳಗಿನಂತೆ ಬದಲಾಗಲಿದೆ:
| ಮಾರ್ಗ (ಬೆಂಗಳೂರಿನಿಂದ) | ಹಳೆಯ ದರ (ಅಂದಾಜು) | ಹೊಸ ದರ (ಅಂದಾಜು) |
| ಬೆಳಗಾವಿ | ₹ 1,000 | ₹ 1,200 |
| ಮಂಗಳೂರು | ₹ 900 | ₹ 1,150 |
| ಮಡಿಕೇರಿ | ₹ 700 | ₹ 900 |
| ಹುಬ್ಬಳ್ಳಿ | ₹ 900 | ₹ 1,050 |
| ಕಲಬುರ್ಗಿ | ₹ 1,200 | ₹ 1,400 |
| ಬಳ್ಳಾರಿ | ₹ 800 | ₹ 950 |
ಬಸ್ ಮಾಲೀಕರ ಸಂಘದ ಸ್ಪಷ್ಟನೆ
ಖಾಸಗಿ ಬಸ್ ಮಾಲೀಕರ ಸಂಘದ ಅಧ್ಯಕ್ಷ ನಟರಾಜ್ ಶರ್ಮಾ ಈ ಕುರಿತು ಮಾತನಾಡುತ್ತಾ:”ಡೀಸೆಲ್ ಬೆಲೆ ಏರಿಕೆಯಿಂದಾಗಿ ದರ ಹೆಚ್ಚಳ ಮಾಡುವುದು ಅನಿವಾರ್ಯವಾಗಿದೆ. ಈಗಾಗಲೇ ನಾವು ನಷ್ಟದಲ್ಲಿದ್ದೇವೆ. ಒಂದು ವೇಳೆ ಸರ್ಕಾರ ಖಾಸಗಿ ವಾಹನಗಳ ಮೇಲಿನ ರಸ್ತೆ ತೆರಿಗೆಯನ್ನು (Road Tax) ಕಡಿತಗೊಳಿಸಿದರೆ, ನಾವು ಕೂಡ ಟಿಕೆಟ್ ದರವನ್ನು ಇಳಿಸಲು ಸಿದ್ಧರಿದ್ದೇವೆ.”ಎಂದರು.
ಗಮನಿಸಿ: ಮಾರ್ಗಗಳಿಗೆ ಅನುಗುಣವಾಗಿ ದರ ಏರಿಕೆಯಲ್ಲಿ ಸಣ್ಣ ಪ್ರಮಾಣದ ವ್ಯತ್ಯಾಸಗಳಿರಬಹುದು. ಪ್ರಯಾಣಿಕರು ಪ್ರಯಾಣಿಸುವ ಮುನ್ನ ಲೇಟೆಸ್ಟ್ ದರಗಳನ್ನು ಪರಿಶೀಲಿಸಿಕೊಳ್ಳುವುದು ಒಳಿತು.
