ಸಾರ್ವಜನಿಕ ಸಾರಿಗೆಯಲ್ಲಿ ಜನರು ಸಣ್ಣಪುಟ್ಟ ವಿಚಾರಕ್ಕೆ ಎಷ್ಟು ಆಕ್ರೋಶಗೊಳ್ಳುತ್ತಾರೆ ಎಂಬುದಕ್ಕೆ ಸಾಕ್ಷಿಯಾದ ವಿಡಿಯೋವೊಂದು ಈಗ ಎಲ್ಲೆಡೆ ವೈರಲ್ ಆಗುತ್ತಿದೆ. ಚಲಿಸುತ್ತಿರುವ ರೈಲಿನ ಬಾಗಿಲ ಬಳಿ ಇಬ್ಬರು ವ್ಯಕ್ತಿಗಳು ಪರಸ್ಪರ ಕಿತ್ತಾಡಿ ಕೊನೆಗೆ ಇಬ್ಬರೂ ರೈಲಿನಿಂದ ಕೆಳಗೆ ಬಿದ್ದಿರುವ ದೃಶ್ಯ ನೋಡುಗರ ಎದೆನಡುಗಿಸುವಂತಿದೆ. ಈ ಘಟನೆಯು ಸಾರ್ವಜನಿಕ ಸ್ಥಳಗಳಲ್ಲಿನ ಭದ್ರತೆ ಮತ್ತು ಜನರ ಅತಿಯಾದ ಕೋಪದ ಬಗ್ಗೆ ದೊಡ್ಡ ಮಟ್ಟದ ಚರ್ಚೆಯನ್ನು ಹುಟ್ಟುಹಾಕಿದೆ.
ಕಿಕ್ಕಿರಿದ ರೈಲಿನಲ್ಲಿ ಹೊಡೆದಾಟದ ಕಿಡಿ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ಈ ದೃಶ್ಯವು ಕಿಕ್ಕಿರಿದು ತುಂಬಿರುವ ರೈಲಿನ ಬೋಗಿಯೊಂದರಲ್ಲಿ ನಡೆದಿದೆ. ರೈಲಿನ ಬಾಗಿಲು ತೆರೆದಿದ್ದು ಇಬ್ಬರು ವ್ಯಕ್ತಿಗಳು ಬಾಗಿಲ ಅಂಚಿನಲ್ಲೇ ನಿಂತು ವಾಗ್ವಾದ ನಡೆಸುತ್ತಿರುವುದು ವಿಡಿಯೋದ ಆರಂಭದಲ್ಲಿ ಕಂಡುಬರುತ್ತದೆ. ಸುತ್ತಮುತ್ತಲ ಪ್ರಯಾಣಿಕರು ಗಲಾಟೆ ಮಾಡದಂತೆ ಮತ್ತು ಸಮಾಧಾನದಿಂದ ಇರುವಂತೆ ಎಚ್ಚರಿಕೆ ನೀಡಿದರೂ ಇಬ್ಬರೂ ಅದನ್ನು ಲೆಕ್ಕಿಸದೆ ಒಬ್ಬರಿಗೊಬ್ಬರು ಬೈದಾಡಿಕೊಳ್ಳಲು ಶುರುಮಾಡಿದ್ದಾರೆ.
ಬಾಗಿಲ ಅಂಚಿನಲ್ಲಿ ನಡೆದ ಒದೆದಾಟ ಜಗಳ ವಿಕೋಪಕ್ಕೆ ಹೋದಂತೆ ಇಬ್ಬರೂ ತಮ್ಮ ಕಾಲುಗಳಿಂದ ಪರಸ್ಪರ ಜೋರಾಗಿ ಒದೆಯಲು ಆರಂಭಿಸಿದ್ದಾರೆ. ರೈಲು ಚಲಿಸುತ್ತಿದ್ದರೂ ಅದರ ಭೀತಿಯಿಲ್ಲದೆ ಬಾಗಿಲ ತುದಿಯಲ್ಲೇ ನಿಂತು ಇವರು ಮಾಡುತ್ತಿದ್ದ ಫೈಟಿಂಗ್ ಕಂಡು ಸಹಪ್ರಯಾಣಿಕರು ಬೆಚ್ಚಿಬಿದ್ದಿದ್ದಾರೆ. ಈ ಸಂದರ್ಭದಲ್ಲಿ ಒಬ್ಬನ ಒದೆತಕ್ಕೆ ಸಿಕ್ಕ ಮತ್ತೊಬ್ಬ ನಿಯಂತ್ರಣ ತಪ್ಪಿ ರೈಲಿನಿಂದ ಕೆಳಗೆ ಹಳಿಗಳ ಮೇಲೆ ಬಿದ್ದಿದ್ದಾನೆ. ಆತನನ್ನು ಬೀಳಿಸಿದವನು ಕೂಡ ಅದೇ ವೇಗದಲ್ಲಿ ರೈಲಿನಿಂದ ಹೊರಕ್ಕೆ ಹಾರಿದ್ದಾನೆ.
ಅದೃಷ್ಟವಶಾತ್ ತಪ್ಪಿದ ಪ್ರಾಣಾಪಾಯ ಅದೃಷ್ಟವಶಾತ್ ರೈಲು ಸ್ವಲ್ಪ ನಿಧಾನವಾಗಿ ಚಲಿಸುತ್ತಿದ್ದ ಕಾರಣ ಇಬ್ಬರೂ ಪ್ರಾಣಾಪಾಯದಿಂದ ಪಾರಾಗಿರುವ ಸಾಧ್ಯತೆಯಿದೆ ಎಂದು ಹೇಳಲಾಗುತ್ತಿದೆ. ಆದರೆ ಇವರಿಬ್ಬರೂ ಹಳಿಗಳ ಮೇಲೆ ಬಿದ್ದ ನಂತರ ಏನಾಯಿತು ಎಂಬ ಬಗ್ಗೆ ಇನ್ನು ಸ್ಪಷ್ಟ ಮಾಹಿತಿ ಲಭ್ಯವಾಗಿಲ್ಲ. ಈ ಘಟನೆಯನ್ನು ಅಲ್ಲಿನ ಪ್ರಯಾಣಿಕರೊಬ್ಬರು ತಮ್ಮ ಮೊಬೈಲ್‌ನಲ್ಲಿ ಸೆರೆಹಿಡಿದಿದ್ದು ಫೆಬ್ರವರಿ 2 ರಂದು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.
ನಮ್ಮ ಕೋಪದ ಮೇಲೆ ನಮಗೆ ನಿಯಂತ್ರಣವಿಲ್ಲದಿದ್ದರೆ ಇಂತಹ ಪ್ರಾಣಾಪಾಯದ ಸ್ಥಿತಿಗಳು ನಿರ್ಮಾಣವಾಗುತ್ತವೆ ಎಂಬ ಸಂದೇಶದೊಂದಿಗೆ ಈ ವಿಡಿಯೋ ವೈರಲ್ ಆಗುತ್ತಿದೆ. ನೆಟ್ಟಿಗರು ಈ ವಿಡಿಯೋ ಕಂಡು ಇಬ್ಬರ ಮೂರ್ಖತನಕ್ಕೆ ತೀವ್ರವಾಗಿ ಆಕ್ಷೇಪ ವ್ಯಕ್ತಪಡಿಸುತ್ತಿದ್ದಾರೆ.
