ಅಮೆರಿಕದಲ್ಲಿ ವ್ಯಕ್ತಿಯೊಬ್ಬರಿಗೆ ತಳೀಯವಾಗಿ ಮಾರ್ಪಡಿಸಿದ ಹಂದಿಯ ಮೂತ್ರಪಿಂಡವನ್ನು ಕಸಿ ಮಾಡಲಾಗಿದ್ದು, ಅವರು 9 ತಿಂಗಳ ಕಾಲ ಡಯಾಲಿಸಿಸ್‌ಗೆ ಒಳಗಾಗದೇ ಬದುಕಿರುವುದು ವಿಶ್ವದಲ್ಲೇ ಇದೇ ಮೊದಲ ಬಾರಿಗೆ ಎಂದು ವೈದ್ಯರು ತಿಳಿಸಿದ್ದಾರೆ.
ಅಂತಿಮ ಹಂತದ ಮೂತ್ರಪಿಂಡ ವೈಫಲ್ಯದಿಂದ ಬಳಲುತ್ತಿದ್ದ ಟಿಮ್ ಆಂಡ್ರ್ಯೂಸ್ ಎಂಬ ವ್ಯಕ್ತಿಗೆ 2025ರ ಜನವರಿಯಲ್ಲಿ ಅಮೆರಿಕದಲ್ಲಿ ಹಂದಿಯ ಮೂತ್ರಪಿಂಡವನ್ನು ಕಸಿ ಮಾಡಲಾಗಿತ್ತು. ಆಗ ಅವರಿಗೆ 66 ವರ್ಷ ವಯಸ್ಸಾಗಿತ್ತು.
ತಳೀಯವಾಗಿ ಮಾರ್ಪಡಿಸಿದ ಹಂದಿಯ ಮೂತ್ರಪಿಂಡವು 271 ದಿನಗಳ ಕಾಲ ಯಶಸ್ವಿಯಾಗಿ ಕಾರ್ಯನಿರ್ವಹಿಸಿದ್ದು, ಈ ಅವಧಿಯಲ್ಲಿ ಅವರು ಡಯಾಲಿಸಿಸ್‌ನಿಂದ ಮುಕ್ತರಾಗಿದ್ದರು. ಬಳಿಕ ಕೆಲಕಾಲ ಡಯಾಲಿಸಿಸ್‌ಗೆ ಒಳಗಾದ ಅವರು, ನಂತರ ಮಾನವ ದಾನಿಯಿಂದ ದೊರೆತ ಮೂತ್ರಪಿಂಡವನ್ನು ಕಸಿ ಮಾಡಿಸಿಕೊಂಡರು.
ಜೀವಂತ ವ್ಯಕ್ತಿಯಲ್ಲಿ ಹಂದಿಯ ಮೂತ್ರಪಿಂಡ ಕಸಿ ಮಾಡಿದ ಬಳಿಕ ಡಯಾಲಿಸಿಸ್‌ ಇಲ್ಲದೆ ಬದುಕಿದ ಅತಿ ದೀರ್ಘ ಅವಧಿ ಇದಾಗಿದೆ ಎಂದು ವೈದ್ಯರು ಹೇಳಿದ್ದಾರೆ. ಅಲ್ಲದೆ, ಹಂದಿಯ ಮೂತ್ರಪಿಂಡದಿಂದ ಮಾನವ ಮೂತ್ರಪಿಂಡ ಕಸಿಗೆ ಯಶಸ್ವಿಯಾಗಿ ವರ್ಗಾವಣೆಯಾದ ಮೊದಲ ಪ್ರಕರಣವೂ ಇದಾಗಿದೆ.
ಈ ಸಂಶೋಧನೆಯನ್ನು ಅಮೆರಿಕದ Mass General Brigham ಸಂಸ್ಥೆಯ ವೈದ್ಯರು ನಡೆಸಿದ್ದು, ಅದರ ವರದಿಯನ್ನು ವೈದ್ಯಕೀಯ ಜರ್ನಲ್ ‘ದಿ ಲ್ಯಾನ್ಸೆಟ್’ನಲ್ಲಿ ಪ್ರಕಟಿಸಲಾಗಿದೆ.
ಸಂಶೋಧನಾ ತಂಡದ ಪ್ರಮುಖ ಲೇಖಕ ಡಾ. ಲಿಯೊನಾರ್ಡೊ ರಿಯೆಲ್ಲಾ ಮಾತನಾಡಿ, “ಮೂತ್ರಪಿಂಡಗಳ ಕೊರತೆ ಇಂದು ಕಸಿ ಕ್ಷೇತ್ರ ಎದುರಿಸುತ್ತಿರುವ ದೊಡ್ಡ ಬಿಕ್ಕಟ್ಟಾಗಿದೆ. ಅಂತಿಮ ಹಂತದ ಮೂತ್ರಪಿಂಡ ವೈಫಲ್ಯ ಹೊಂದಿರುವವರಿಗೆ ಉತ್ತಮ ಚಿಕಿತ್ಸೆಯೆಂದರೆ ಕಸಿ ಮಾಡುವುದು. ಆದರೆ ಅಗತ್ಯವಿರುವಷ್ಟು ಮಾನವ ಅಂಗಗಳು ಸಮಯಕ್ಕೆ ಸರಿಯಾಗಿ ಲಭ್ಯವಾಗುತ್ತಿಲ್ಲ” ಎಂದರು.
ಹಂದಿಯ ಅಂಗಗಳನ್ನು ಮಾನವರಿಗೆ ಕಸಿ ಮಾಡುವ ವಿಧಾನವನ್ನು ‘ಕ್ಸೆನೋಟ್ರಾನ್ಸ್‌ಪ್ಲಾಂಟೇಶನ್’ ಎಂದು ಕರೆಯಲಾಗುತ್ತದೆ. ಆರಂಭದಲ್ಲಿ ಮಾನವ ದಾನಿಯ ಮೂತ್ರಪಿಂಡ ದೊರೆಯುವವರೆಗೆ ರೋಗಿಗಳನ್ನು ಡಯಾಲಿಸಿಸ್‌ನಿಂದ ಮುಕ್ತಗೊಳಿಸುವ ತಾತ್ಕಾಲಿಕ ಸೇತುವೆ (bridge)ಯಾಗಿ ಇದನ್ನು ಬಳಸುವ ಉದ್ದೇಶವಿದೆ. ಮುಂದಿನ ದಿನಗಳಲ್ಲಿ ಇದರ ಸುರಕ್ಷತೆ ಮತ್ತು ದೀರ್ಘಕಾಲೀನ ಪರಿಣಾಮಕಾರಿತ್ವ ಸಾಬೀತಾದರೆ, ಸ್ವತಂತ್ರ ಚಿಕಿತ್ಸಾ ವಿಧಾನವಾಗಿಯೂ ಬಳಸುವ ಸಾಧ್ಯತೆಯಿದೆ ಎಂದು ವೈದ್ಯರು ಹೇಳಿದ್ದಾರೆ.
2024ರಲ್ಲಿ ಮ್ಯಾಸಚೂಸೆಟ್ಸ್ ಜನರಲ್ ಆಸ್ಪತ್ರೆಯಲ್ಲಿ ಮತ್ತೊಬ್ಬ ಜೀವಂತ ವ್ಯಕ್ತಿಗೂ ಹಂದಿಯ ಮೂತ್ರಪಿಂಡವನ್ನು ಕಸಿ ಮಾಡಲಾಗಿತ್ತು. ಅವರು 52 ದಿನಗಳ ಕಾಲ ಬದುಕಿದ್ದರು. ಬಳಿಕ ಕಸಿಗೆ ಸಂಬಂಧವಿಲ್ಲದ ಹೃದಯ ಸಮಸ್ಯೆಯಿಂದ ಮೃತಪಟ್ಟಿದ್ದರು.
ಆಂಡ್ರ್ಯೂಸ್ ಅವರಿಗೆ ಟೈಪ್-2 ಮಧುಮೇಹದಿಂದಾಗಿ ಮೂತ್ರಪಿಂಡ ವೈಫಲ್ಯ ಉಂಟಾಗಿತ್ತು. ಅವರಿಗೆ ಕಸಿ ಮಾಡಲಾದ ಮೂತ್ರಪಿಂಡವು ಯುಕಾಟನ್ ಮಿನಿಯೇಚರ್ ಹಂದಿಯಿಂದ ಪಡೆಯಲಾಗಿದ್ದು, ಮಾನವನ ರೋಗನಿರೋಧಕ ವ್ಯವಸ್ಥೆಗೆ ಹೊಂದಿಕೊಳ್ಳುವಂತೆ ಅದರ ಜೀನ್‌ಗಳನ್ನು ತಳೀಯವಾಗಿ ಮಾರ್ಪಡಿಸಲಾಗಿತ್ತು.
ಕಸಿ ಮಾಡಿದ ಬಳಿಕ ಮೂತ್ರಪಿಂಡ ತಕ್ಷಣವೇ ಕಾರ್ಯನಿರ್ವಹಿಸಲು ಆರಂಭಿಸಿತ್ತು. ಆದರೆ ಸುಮಾರು ಆರು ತಿಂಗಳ ನಂತರ ಅದರ ರಕ್ತನಾಳಗಳಲ್ಲಿ ಹಾನಿ ಕಾಣಿಸಿಕೊಂಡು, ಕ್ರಮೇಣ ಅಂಗ ವೈಫಲ್ಯಕ್ಕೆ ಕಾರಣವಾಯಿತು. ಹೀಗಾಗಿ ಹಂದಿಯ ಮೂತ್ರಪಿಂಡವನ್ನು ತೆಗೆದುಹಾಕಲಾಯಿತು. ಬಳಿಕ ಆಂಡ್ರ್ಯೂಸ್ ಅವರಿಗೆ ಮೃತಪಟ್ಟ ಮಾನವ ದಾನಿಯಿಂದ ದೊರೆತ ಮೂತ್ರಪಿಂಡವನ್ನು ಕಸಿ ಮಾಡಲಾಯಿತು.
CNN ಸಾಕ್ಷ್ಯಚಿತ್ರದಲ್ಲಿ ತಮ್ಮ ಅನುಭವವನ್ನು ಹಂಚಿಕೊಂಡ ಅವರು, ಹಂದಿಯ ಮೂತ್ರಪಿಂಡ ಕಸಿ “ಪವಾಡ”ದಂತೆ ಆಗಿತ್ತು ಎಂದು ಹೇಳಿದ್ದಾರೆ. ಕಸಿ ಬಳಿಕ ತಾವು ಅಡುಗೆ ಮಾಡುವುದು, ಮನೆ ಸ್ವಚ್ಛಗೊಳಿಸುವುದು ಹಾಗೂ ತಮ್ಮ ನಾಯಿ ‘ಕಪ್‌ಕೇಕ್’ ಜೊತೆ ದೂರದವರೆಗೆ ನಡೆದುಕೊಂಡು ಹೋಗುವುದು ಸಾಧ್ಯವಾಗಿತ್ತು ಎಂದು ತಿಳಿಸಿದ್ದಾರೆ.
ಸಂಶೋಧಕರು, ಕಸಿ ಮಾಡಿದ ಅವಧಿಯಲ್ಲಿ ಯಾವುದೇ ಹಂದಿ ವೈರಸ್ ಅಥವಾ ಇತರ ಹಂದಿ ಮೂಲದ ರೋಗಕಾರಕಗಳು ಪತ್ತೆಯಾಗಿಲ್ಲ ಎಂದು ಹೇಳಿದ್ದಾರೆ.
ಈ ಫಲಿತಾಂಶಗಳು ಮಾನವ ಮೂತ್ರಪಿಂಡಕ್ಕಾಗಿ ದೀರ್ಘಕಾಲ ಕಾಯಬೇಕಾದ ರೋಗಿಗಳಿಗೆ ಹಂದಿಯ ಮೂತ್ರಪಿಂಡವನ್ನು ತಾತ್ಕಾಲಿಕ ಪರಿಹಾರವಾಗಿ ಬಳಸುವ ಸಾಧ್ಯತೆಯನ್ನು ತೋರಿಸಿವೆ. ಆದರೆ ಈ ವಿಧಾನವನ್ನು ವ್ಯಾಪಕವಾಗಿ ಬಳಸುವ ಮೊದಲು ಇನ್ನಷ್ಟು ಸಂಶೋಧನೆ ಅಗತ್ಯವಿದೆ ಎಂದು ತಜ್ಞರು ಹೇಳಿದ್ದಾರೆ.
