ಈಪಿಎಫ್ಒ (EPFO) ಗ್ರಾಹಕರಿಗೆ ಒಂದು ಪ್ರಮುಖ ಎಚ್ಚರಿಕೆ. ನಿಮ್ಮ ಹೆಸರಿನಲ್ಲಿ ಎರಡು ಯುಎಎನ್ (UAN) ಸಂಖ್ಯೆಗಳಿವೆಯೇ? ಈಪಿಎಫ್ಒ ನಿಯಮಗಳ ಪ್ರಕಾರ ಒಬ್ಬ ವ್ಯಕ್ತಿ ಒಂದೇ UAN ಸಂಖ್ಯೆಯನ್ನು ಹೊಂದಿರಬೇಕು. ಒಂದು ವೇಳೆ ನಿಮ್ಮ ಬಳಿ ಎರಡು ಸಂಖ್ಯೆಗಳಿದ್ದರೆ, ಒಂದನ್ನು ಇನ್-ಆಕ್ಟಿವ್ (In-active) ಮಾಡುವುದು ಕಡ್ಡಾಯ. ಇದಕ್ಕಾಗಿ ನೀವು ಇಮೇಲ್ ಮೂಲಕ ವಿನಂತಿಸಬೇಕಾಗುತ್ತದೆ.
ಉದ್ಯೋಗ ಬದಲಿಸಿದಾಗ ಏನಾಗುತ್ತದೆ? ದೇಶದ ಖಾಸಗಿ ಸಂಸ್ಥೆಗಳಲ್ಲಿ ಕೆಲಸ ಮಾಡುವವರಿಗೆ ಈಪಿಎಫ್ಒ ಖಾತೆ ಇರುತ್ತದೆ. ಮೊದಲ ಬಾರಿಗೆ ಕೆಲಸಕ್ಕೆ ಸೇರಿದಾಗ ಸಂಸ್ಥೆಯು ಪಿಎಫ್ ಖಾತೆಯನ್ನು ತೆರೆಯುತ್ತದೆ. ಮೊದಲ ಸಂಬಳದ ಸ್ಲಿಪ್ನಲ್ಲಿ ನಿಮಗೆ UAN ಸಂಖ್ಯೆಯನ್ನು ನೀಡಲಾಗುತ್ತದೆ. ಈ UAN ಸಂಖ್ಯೆಯು ಜೀವನಪೂರ್ತಿ ಒಂದೇ ಆಗಿರುತ್ತದೆ. ನೀವು ಎಷ್ಟು ಕಂಪನಿಗಳನ್ನು ಬದಲಾಯಿಸಿದರೂ UAN ಸಂಖ್ಯೆ ಬದಲಾಗುವುದಿಲ್ಲ, ಆದರೆ ಪ್ರತಿ ಕಂಪನಿಯಲ್ಲಿಯೂ ನಿಮ್ಮ ಪಿಎಫ್ ಖಾತೆ ಸಂಖ್ಯೆ (PF Account Number) ಮಾತ್ರ ಬದಲಾಗುತ್ತಿರುತ್ತದೆ.
ಹಣವನ್ನು ವರ್ಗಾವಣೆ ಮಾಡುವುದು ಹೇಗೆ? ನೀವು ಕೆಲಸ ಬದಲಾಯಿಸಿದಾಗ, ಹಳೆಯ ಕಂಪನಿಯ ಪಿಎಫ್ ಖಾತೆಯಲ್ಲಿರುವ ಹಣವನ್ನು ಹೊಸ ಕಂಪನಿಯ ಪಿಎಫ್ ಖಾತೆಗೆ ವರ್ಗಾಯಿಸಿಕೊಳ್ಳಬೇಕು. ಇದನ್ನು ಆನ್ಲೈನ್ ಮೂಲಕ ಸುಲಭವಾಗಿ ಮಾಡಬಹುದು:
- ಈಪಿಎಫ್ಒ ಅಧಿಕೃತ ವೆಬ್ಸೈಟ್ ಓಪನ್ ಮಾಡಿ.
- ನಿಮ್ಮ UAN ಸಂಖ್ಯೆ ಮತ್ತು ಪಾಸ್ವರ್ಡ್ ಬಳಸಿ ಲಾಗಿನ್ ಆಗಿ.
- ‘Online Services’ ಆಯ್ಕೆಯನ್ನು ಆಯ್ದುಕೊಂಡು, ‘One Member – One EPF Account (Transfer Request)’ ಮೇಲೆ ಕ್ಲಿಕ್ ಮಾಡಿ.
- ನಿಮ್ಮ ವೈಯಕ್ತಿಕ ಮಾಹಿತಿ ಮತ್ತು ಪ್ರಸ್ತುತ ಪಿಎಫ್ ಖಾತೆಯ ವಿವರಗಳನ್ನು ಪರಿಶೀಲಿಸಿ.
- ‘Get Details’ ಮೇಲೆ ಕ್ಲಿಕ್ ಮಾಡಿದಾಗ ನಿಮ್ಮ ಹಳೆಯ ಉದ್ಯೋಗದ ಪಿಎಫ್ ಖಾತೆ ವಿವರಗಳು ಕಾಣಿಸುತ್ತವೆ.
- ಅಗತ್ಯವಿರುವ ವಿವರಗಳನ್ನು ಭರ್ತಿ ಮಾಡಿ, ಡಿಕ್ಲರೇಶನ್ ಬಾಕ್ಸ್ ಗುರುತಿಸಿ ‘Submit’ ಮಾಡಿ.
ಹೀಗೆ ಮಾಡುವುದರಿಂದ ಪಿಎಫ್ ಹಣವನ್ನು ಹಿಂಪಡೆಯುವ ಪ್ರಕ್ರಿಯೆ ಸುಲಭವಾಗುತ್ತದೆ ಮತ್ತು ಖಾತೆಯು ಇನ್-ಆಕ್ಟಿವ್ ಆಗುವುದನ್ನು ತಡೆಯಬಹುದು.
ಎರಡು UAN ಸಂಖ್ಯೆಗಳಿದ್ದರೆ ಏನು ಮಾಡಬೇಕು? ಒಂದು ವೇಳೆ ತಾಂತ್ರಿಕ ಕಾರಣಗಳಿಂದ ಅಥವಾ ತಿಳುವಳಿಕೆಯ ಕೊರತೆಯಿಂದ ನಿಮಗೆ ಎರಡು UAN ಸಂಖ್ಯೆಗಳು ಲಭ್ಯವಾಗಿದ್ದರೆ, ಕೂಡಲೇ [email protected] ಗೆ ಇಮೇಲ್ ಕಳುಹಿಸಿ. ನಿಮ್ಮ ಹಳೆಯ UAN ಸಂಖ್ಯೆಯನ್ನು ರದ್ದುಗೊಳಿಸಿ (In-activate), ಹೊಸ ಸಂಖ್ಯೆಯನ್ನು ಮಾತ್ರ ಚಾಲ್ತಿಯಲ್ಲಿಡಲು ವಿನಂತಿಸಿ. ಈಪಿಎಫ್ಒ ಅಧಿಕಾರಿಗಳು ನಿಮ್ಮ ವಿವರಗಳನ್ನು ಪರಿಶೀಲಿಸಿ ಒಂದು ಸಂಖ್ಯೆಯನ್ನು ಬ್ಲಾಕ್ ಮಾಡುತ್ತಾರೆ. ಇದರಿಂದ ಭವಿಷ್ಯದಲ್ಲಿ ಹಣ ಹಿಂಪಡೆಯುವಾಗ ಯಾವುದೇ ತೊಂದರೆಯಾಗುವುದಿಲ್ಲ.
ಗಮನಿಸಿ: ಒಂದು ಉದ್ಯೋಗದಿಂದ ಇನ್ನೊಂದಕ್ಕೆ ಸೇರಿದಾಗ ನಿಮ್ಮ ಹಳೆಯ UAN ಸಂಖ್ಯೆಯನ್ನೇ ಹೊಸ ಕಂಪನಿಗೆ ನೀಡುವುದು ಉತ್ತಮ.
