ಟಾಲಿವುಡ್ನ ರೆಬೆಲ್ ಸ್ಟಾರ್ ಪ್ರಭಾಸ್ ಅಭಿನಯದಲ್ಲಿ ಮೂಡಿಬಂದಿದ್ದ ‘ಪೌರ್ಣಮಿ’ ಸಿನಿಮಾ ಬಿಡುಗಡೆಯಾಗಿ ಸುಮಾರು ಎರಡು ದಶಕಗಳೇ ಕಳೆದಿವೆ. ಆ ಸಮಯದಲ್ಲಿ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ಅಂದುಕೊಂಡ ಮಟ್ಟಕ್ಕೆ ದೊಡ್ಡ ಯಶಸ್ಸು ಕಾಣದಿದ್ದರೂ, ಚಿತ್ರದ ಗೀತೆಗಳು ಮತ್ತು ಹಿನ್ನೆಲೆ ಸಂಗೀತ ಪ್ರೇಕ್ಷಕರ ಮನಸ್ಸಿನಲ್ಲಿ ಸದಾ ಹಸಿರಾಗಿ ಉಳಿದುಕೊಂಡಿದ್ದವು. ಇದೀಗ ಅದೇ ‘ಪೌರ್ಣಮಿ’ ಚಿತ್ರದ ಜನಪ್ರಿಯ ‘ಭಾರತ ವೇದಮುಗ’ ಗೀತೆ ಮತ್ತೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೊಸ ಅಲೆ ಎಬ್ಬಿಸಿದ್ದು, ಜಾಗತಿಕ ಮಟ್ಟದ ಪ್ರೇಕ್ಷಕರ ಗಮನ ಸೆಳೆಯುತ್ತಿದೆ.
ಚೀನಾದ ಪ್ರಸಿದ್ಧ ಶಾಸ್ತ್ರೀಯ ನರ್ತಕಿ ಮೀರಾ ವಾಂಗ್ ಅವರು ಈ ಹಾಡಿಗೆ ಅದ್ಭುತವಾಗಿ ಕುಚಿಪುಡಿ ಶೈಲಿಯಲ್ಲಿ ಅಭಿನಯಿಸಿದ್ದು, ಈ ವಿಡಿಯೋ ಪ್ರಸ್ತುತ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ವೈರಲ್ ಆಗುತ್ತಿದೆ. ಭಾರತಕ್ಕೆ ಒಮ್ಮೆಯೂ ಭೇಟಿ ನೀಡದಿದ್ದರೂ, ಆಂಧ್ರಪ್ರದೇಶದ ಅನಂತಪುರ ಮೂಲದ ‘ಅಲಾ ವೇಣುಗೋಪಾಲ್’ ಎಂಬ ಪ್ರಸಿದ್ಧ ನೃತ್ಯ ಗುರುಗಳಿಂದ ಆನ್ಲೈನ್ ಮೂಲಕ ಕುಚಿಪುಡಿ ಕಲೆ ಕಲಿತಿರುವ ಮೀರಾ, ಭಾರತೀಯ ಕಲಾ ಸಂಸ್ಕೃತಿ ಮತ್ತು ತೆಲುಗು ಸಂಗೀತದ ಮೇಲೆ ಅಪಾರ ಪ್ರೀತಿ ಇಟ್ಟುಕೊಂಡಿದ್ದಾರೆ. ‘ಭಾರತ ವೇದಮುಗ’ ಹಾಡಿಗೆ ಅವರು ನೀಡಿದ ನಯನಮನೋಹರ ನೃತ್ಯ ಅಭಿವ್ಯಕ್ತಿ, ಲಯಬದ್ಧ ಹೆಜ್ಜೆಗಳು ಹಾಗೂ ಹಾವಭಾವಗಳು ತೆಲುಗು ಚಿತ್ರರಂಗದ ಪ್ರಮುಖ ನಟ-ನಟಿಯರು ಸೇರಿದಂತೆ ಕೋಟ್ಯಂತರ ಪ್ರೇಕ್ಷಕರ ಮನಗೆದ್ದಿವೆ.
ಸಾಹಿತ್ಯ ದಿಗ್ಗಜ ಸಿರಿವೆನ್ನೆಲ ಸೀತಾರಾಮಶಾಸ್ತ್ರಿಗಳ ಭಕ್ತಿಪೂರ್ವಕ ಸಾಹಿತ್ಯ, ದೇವಿ ಶ್ರೀ ಪ್ರಸಾದ್ ಅವರ ಮಧುರ ಸಂಗೀತ ಸಂಯೋಜನೆ ಹಾಗೂ ಹಿರಿಯ ಗಾಯಕಿ ಕೆ.ಎಸ್. ಚಿತ್ರಾ ಅವರ ಕಂಠಸಿರಿಯಲ್ಲಿ ಮೂಡಿಬಂದಿದ್ದ ಈ ಹಾಡು, ಮೀರಾ ವಾಂಗ್ ಅವರ ನೃತ್ಯದ ಮೂಲಕ ಇದೀಗ ಹೊಸ ಮೆರುಗು ಪಡೆದುಕೊಂಡಿದೆ. ಮೀರಾ ಅವರು ತಮ್ಮ ಇನ್ಸ್ಟಾಗ್ರಾಮ್ ಪುಟದಲ್ಲಿ ಈ ಹಿಂದೆ ‘ಮಾಯಾಬಜಾರ್’ ಚಿತ್ರದ ಸಾರ್ವಕಾಲಿಕ ಹಿಟ್ ಗೀತೆ ‘ಅಹಾ ನಾ ಪೆಳ್ಳಂಟ’ ಸೇರಿದಂತೆ ಹಲವು ಭಾರತೀಯ ಶಾಸ್ತ್ರೀಯ ಹಾಗೂ ಸಿನಿಮಾ ಹಾಡುಗಳಿಗೆ ಹೆಜ್ಜೆ ಹಾಕಿ ಸೈ ಎನಿಸಿಕೊಂಡಿದ್ದರು.
ಸಂಗೀತ, ಕಲೆ ಹಾಗೂ ನೃತ್ಯಕ್ಕೆ ಯಾವುದೇ ಭಾಷೆ, ದೇಶ ಅಥವಾ ಗಡಿಗಳ ಹಂಗಿಲ್ಲ ಎಂಬುದನ್ನು ಈ ಚೀನಾ ನರ್ತಕಿಯ ಅದ್ಭುತ ಅಭಿನಯ ಮತ್ತೊಮ್ಮೆ ಜಗತ್ತಿಗೆ ಸಾಬೀತುಪಡಿಸಿದೆ. ಪ್ರಭಾಸ್ ಅಭಿಮಾನಿಗಳು ಹಾಗೂ ಭಾರತೀಯ ಶಾಸ್ತ್ರೀಯ ನೃತ್ಯ ಪ್ರೇಮಿಗಳು ಈ ವಿಡಿಯೋವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಅಪಾರವಾಗಿ ಹಂಚಿಕೊಳ್ಳುತ್ತಿದ್ದಾರೆ.
