ಸ್ನೇಹಕ್ಕೆ ಸಾವಿಲ್ಲ ಎಂಬ ಮಾತನ್ನು ಸಾಬೀತುಪಡಿಸುವಂತಹ ಘಟನೆಯೊಂದು ಇಂಗ್ಲೆಂಡ್ನ ಲೀಸೆಸ್ಟರ್ನಲ್ಲಿ ನಡೆದಿದೆ. ಚಂದ್ರಕಾಂತ್ ಎಂಬ ವೃದ್ಧರು ತಮ್ಮ ಕೊನೆಯ ದಿನಗಳಲ್ಲಿ ಹಳೆಯ ಸ್ನೇಹಿತರನ್ನು ಭೇಟಿಯಾದ ಮತ್ತು ಅವರೆಲ್ಲರೂ ಸೇರಿ ಹಾಡು ಹಾಡಿದ ದೃಶ್ಯ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿದೆ.
ಘಟನೆಯ ವಿವರ: ಗುಜರಾತಿ ಮೂಲದ ಚಂದ್ರಕಾಂತ್ ಅವರು ಯುಕೆ (UK) ನಲ್ಲಿ ನೆಲೆಸಿದ್ದರು. ಅನಾರೋಗ್ಯದಿಂದ ಹಾಸಿಗೆ ಹಿಡಿದಿದ್ದ ಅವರು ತಮ್ಮ ಜೀವನದ ಅಂತಿಮ ಹಂತದಲ್ಲಿದ್ದಾರೆ ಎಂಬುದು ತಿಳಿದಾಗ, ಅವರ ಬಾಲ್ಯದ ಮತ್ತು ಹಳೆಯ ಗೆಳೆಯರು ಅವರನ್ನು ನೋಡಲು ಬಂದಿದ್ದರು. ಈ ಅನಿರೀಕ್ಷಿತ ಭೇಟಿಯಿಂದ ಅತೀವ ಸಂತಸಗೊಂಡ ಚಂದ್ರಕಾಂತ್ ಅವರು, ಹಾಸಿಗೆಯ ಮೇಲೆ ಮಲಗಿಯೇ ತಮ್ಮ ಗೆಳೆಯರಿಗಾಗಿ ‘ತೇರೆ ಜೈಸಾ ಯಾರ್ ಕಹಾ, ಕಹಾ ಐಸಾ ಯಾರಾನಾ’ ಎಂಬ ಸ್ನೇಹದ ಗೀತೆಯನ್ನು ಹಾಡಿದ್ದಾರೆ.
ಈ ಭಾವುಕ ಕ್ಷಣದಲ್ಲಿ ಅವರ ಪತ್ನಿ ಶಾರದಾ ಬೆಂಬಲವಾಗಿ ನಿಂತಿದ್ದರೆ, ಗೆಳೆಯರೆಲ್ಲರೂ ಸೇರಿ ಹಾಡನ್ನು ಪೂರ್ಣಗೊಳಿಸಿದ್ದಾರೆ. ಈ ಸುಂದರ ಕ್ಷಣವನ್ನು ಅವರ ಮೊಮ್ಮಗಳು ರೂಪಾ ಸೆರೆಹಿಡಿದು ‘gujarati_grandparents’ ಎಂಬ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ವಿಡಿಯೋ ಹಂಚಿಕೊಂಡ ಕೆಲವೇ ದಿನಗಳಲ್ಲಿ ಚಂದ್ರಕಾಂತ್ ಅವರು ಇಹಲೋಕ ತ್ಯಜಿಸಿದ್ದಾರೆ.
ಮೊಮ್ಮಗಳ ಭಾವುಕ ನುಡಿ: “ನನ್ನ ಅಜ್ಜ ಲೀಸೆಸ್ಟರ್ಗೆ ಬಂದ ನಂತರ ಹಳೆಯ ಗೆಳೆಯರನ್ನು ತುಂಬಾ ಮಿಸ್ ಮಾಡಿಕೊಳ್ಳುತ್ತಿದ್ದರು. ಆದರೆ ಅವರೆಲ್ಲರೂ ನಿರಂತರ ಸಂಪರ್ಕದಲ್ಲಿದ್ದರು. ಜೀವನದ ಕೊನೆಯಲ್ಲಿ ಸಿಗುವ ಸ್ನೇಹವೇ ಅತಿದೊಡ್ಡ ಸಮಾಧಾನ” ಎಂದು ರೂಪಾ ವಿಡಿಯೋಗೆ ಶೀರ್ಷಿಕೆ ನೀಡಿದ್ದಾರೆ.
ನೆಟ್ಟಿಗರ ಪ್ರತಿಕ್ರಿಯೆ: ಈ ವಿಡಿಯೋಗೆ 70 ಲಕ್ಷಕ್ಕೂ ಹೆಚ್ಚು ವೀಕ್ಷಣೆಗಳು ಬಂದಿದ್ದು, 6 ಲಕ್ಷಕ್ಕೂ ಹೆಚ್ಚು ಜನರು ಲೈಕ್ ಮಾಡಿದ್ದಾರೆ. “ನಿಜವಾದ ಸ್ನೇಹ ಎಂದರೆ ಇದೇ”, “ಅವರ ಅದೃಷ್ಟವಂತರು, ಕೊನೆಯ ಕ್ಷಣದಲ್ಲಿ ಗೆಳೆಯರ ಜೊತೆ ಕಳೆಯಲು ಅವಕಾಶ ಸಿಕ್ಕಿತು” ಎಂದು ನೆಟ್ಟಿಗರು ಕಮೆಂಟ್ ಮಾಡುತ್ತಿದ್ದಾರೆ.
