ಮನೆಯಲ್ಲಿ ವಸ್ತುಗಳನ್ನು ಸ್ವಚ್ಛಗೊಳಿಸಲು ಬೇಕಿಂಗ್ ಸೋಡಾ, ನಿಂಬೆಹಣ್ಣು ಅಥವಾ ವಿನೆಗರ್‌ನಂತಹ ಪದಾರ್ಥಗಳನ್ನು ಬಳಸುವುದು ಸಾಮಾನ್ಯ. ಆದರೆ ಜ್ವರ ಮತ್ತು ನೋವು ನಿವಾರಣೆಗೆ ಬಳಸುವ ಪ್ಯಾರಾಸಿಟಮಾಲ್ ಮಾತ್ರೆಗಳನ್ನು ಬಟ್ಟೆ ತೊಳೆಯಲು ಡಿಟರ್ಜೆಂಟ್‌ನಂತೆ ಬಳಸಿದರೆ ಹೇಗಿರುತ್ತದೆ? ಇಂತಹ ವಿಚಿತ್ರ ಪ್ರಯೋಗವೊಂದಕ್ಕೆ ಸಂಬಂಧಿಸಿದ ವಿಡಿಯೋವೊಂದು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಪ್ರತಿದಿನವೂ ಹಲವು ಬಗೆಯ ವಿಡಿಯೋಗಳು ವೈರಲ್ ಆಗುತ್ತಿರುತ್ತವೆ. ಅವುಗಳಲ್ಲಿ ಕೆಲವರು ಮಾಡುವ ಜುಗಾಡ್‌ಗಳು, ಮನೆಕೆಲಸವನ್ನು ಸುಲಭಗೊಳಿಸುವ ವಿಚಿತ್ರ ಉಪಾಯಗಳು, ಟ್ರಿಕ್ಸ್ ಮತ್ತು ಟಿಪ್ಸ್‌ಗಳು ಸಾಕಷ್ಟು ಗಮನ ಸೆಳೆಯುತ್ತವೆ. ಅಂತಹ ವಿಡಿಯೋವೊಂದು ಇದೀಗ ವೈರಲ್ ಆಗಿದೆ.
ವೈರಲ್ ಆಗಿರುವ ವಿಡಿಯೋದಲ್ಲಿ ಮಹಿಳೆಯೊಬ್ಬರು ತಮ್ಮ ಮನೆಯ ವಾಷಿಂಗ್ ಮೆಷಿನ್‌ಗೆ ಕೊಳೆ ಬಟ್ಟೆಗಳ ಜೊತೆಗೆ ಕೆಲವು ಪ್ಯಾರಾಸಿಟಮಾಲ್ ಮಾತ್ರೆಗಳನ್ನು ಹಾಕಿ ಮೆಷಿನ್ ಆನ್ ಮಾಡುತ್ತಾರೆ. ಕೆಲ ಸಮಯದ ಬಳಿಕ ಬಟ್ಟೆಗಳನ್ನು ಹೊರತೆಗೆದು ನೋಡಿದಾಗ ಅವು ಸ್ವಚ್ಛವಾಗಿದ್ದು, ಯಾವುದೇ ಕಲೆಗಳಿಲ್ಲದೆ ಹೊಸ ಬಟ್ಟೆಗಳಂತೆ ಹೊಳೆಯುತ್ತಿರುವುದು ವಿಡಿಯೋದಲ್ಲಿ ಕಾಣಿಸುತ್ತದೆ.
ಅಷ್ಟೇ ಅಲ್ಲದೆ, ಕಾಲರ್ ಭಾಗದಲ್ಲಿ ಹಳದಿ ಕಲೆಗಳಾಗಿದ್ದ ಬಿಳಿ ಬಣ್ಣದ ಶರ್ಟ್‌ವೊಂದನ್ನು ನೀರಿನಿಂದ ತುಂಬಿದ ಟಬ್‌ನಲ್ಲಿ ಮುಳುಗಿಸಿ, ಅದರಲ್ಲಿ ಪ್ಯಾರಾಸಿಟಮಾಲ್ ಮಾತ್ರೆಗಳನ್ನು ಹಾಕಲಾಗುತ್ತದೆ. ಸ್ವಲ್ಪ ಸಮಯದ ಬಳಿಕ ಶರ್ಟ್‌ನ್ನು ಹೊರತೆಗೆದು ನೋಡಿದಾಗ ಕಾಲರ್ ಮೇಲಿದ್ದ ಹಳದಿ ಕಲೆಗಳು ಸಂಪೂರ್ಣವಾಗಿ ಮಾಯವಾಗಿ, ಶರ್ಟ್ ಬಿಳಿಯಾಗಿ ಹೊಳೆಯುತ್ತಿರುವುದು ಕಂಡುಬರುತ್ತದೆ.
ಈ ವಿಡಿಯೋವನ್ನು @acharyaveda_ ಎಂಬ ಇನ್‌ಸ್ಟಾಗ್ರಾಂ ಖಾತೆಯಿಂದ ಹಂಚಿಕೊಳ್ಳಲಾಗಿದ್ದು, ಈಗಾಗಲೇ ಲಕ್ಷಾಂತರ ಮಂದಿ ವೀಕ್ಷಿಸಿದ್ದಾರೆ. ಸಾವಿರಾರು ಮಂದಿ ಲೈಕ್ ಕೂಡ ಮಾಡಿದ್ದಾರೆ. ಈ ಟ್ರಿಕ್ ನೋಡಿ ಕೆಲವರು ಅಚ್ಚರಿ ವ್ಯಕ್ತಪಡಿಸಿ ಇದನ್ನು ‘ಮ್ಯಾಜಿಕ್’ ಎಂದು ಕರೆದಿದ್ದಾರೆ. ಆದರೆ, ಇನ್ನು ಕೆಲವರು ಪ್ರಾಣ ರಕ್ಷಣೆಗಾಗಿ ಬಳಸುವ ಔಷಧಿಗಳನ್ನು ಬಟ್ಟೆ ತೊಳೆಯಲು ಬಳಸುವುದು ಅನಗತ್ಯ ಹಾಗೂ ಔಷಧಿಗಳ ದುರುಪಯೋಗ ಎಂದು ಟೀಕಿಸಿದ್ದಾರೆ.
ವಿಡಿಯೋ ನೋಡಿದ ವ್ಯಕ್ತಿಯೊಬ್ಬರು, “ಇದು ನಿಜವಾಗಿಯೂ ಕೆಲಸ ಮಾಡುತ್ತದೆಯೇ ಎಂದು ಯಾರಾದರೂ ಪ್ರಯತ್ನಿಸಿ ಹೇಳಿದರೆ, ನಾನೂ ಪ್ರಯತ್ನಿಸುತ್ತೇನೆ” ಎಂದು ಕಾಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು, “ನಾನು ಈಗಾಗಲೇ ಇದನ್ನು ಬಳಸಿದ್ದೇನೆ, ಈ ವಿಧಾನ ಚೆನ್ನಾಗಿ ಕೆಲಸ ಮಾಡಿತು” ಎಂದು ಹೇಳಿದ್ದಾರೆ.
ಇಂತಹ ಹ್ಯಾಕ್ಸ್‌ಗಳು ನೋಡಲು ಆಕರ್ಷಕವಾಗಿದ್ದರೂ, ಸಾಮಾನ್ಯ ಬಟ್ಟೆ ಸಾಬೂನು ಅಥವಾ ಡಿಟರ್ಜೆಂಟ್‌ಗಳು ಸುಲಭವಾಗಿ ಲಭ್ಯವಿರುವಾಗ ಔಷಧಿಗಳನ್ನು ವ್ಯರ್ಥವಾಗಿ ಬಳಸುವುದು ಸೂಕ್ತವಲ್ಲ ಎಂದು ತಜ್ಞರು ಸೂಚಿಸುತ್ತಾರೆ.
