ನವದೆಹಲಿ: ವಾಹನಕ್ಕಾಗಿ ಪಡೆದಿದ್ದ ಸಾಲ ತೀರಿದ ಕೂಡಲೇ ಆಡಮಾನ ಸ್ವಯಂಚಾಲಿತವಾಗಿ ರದ್ದಾಗುವಂತಹ ವ್ಯವಸ್ಥೆಯನ್ನು ಕೇಂದ್ರ ಸರ್ಕಾರ ಜಾರಿಗೆ ತಂದಿದೆ. ವಾಹನ ಸಾಲ ಚುಕ್ತಾ ಆಗುತ್ತಿದ್ದಂತೆ ಅಡಮಾನ ಇನ್ನು ಸ್ವಯಂ ರದ್ದಾಗಲಿದೆ. ಇದರಿಂದ ವಾಹನ ಮಾಲೀಕರು ಆರ್.ಟಿ.ಒ. ಕಚೇರಿಗೆ ಅಲೆದಾಡುವುದು ತಪ್ಪಲಿದೆ.
ವಾಹನಕ್ಕಾಗಿ ಪಡೆದಿದ್ದ ಸಾಲ ತೀರಿದ ನಂತರ ಸಾಲ ನೀಡಿದ ಸಂಸ್ಥೆಯ ಹೆಸರು ತೆಗೆಯಲು ಪದೇಪದೇ ಬ್ಯಾಂಕ್ ಮತ್ತು ಆರ್.ಟಿ.ಒ. ಕಚೇರಿಗೆ ತೆರಳಬೇಕಿತ್ತು. ಈಗ ಸಾಲ ತೀರಿದ ಕೂಡಲೇ ಆರ್.ಸಿ.ಯಲ್ಲಿ ಸಾಲ ನೀಡಿದ ಬ್ಯಾಂಕ್ ಹೆಸರು ಸ್ವಯಂಚಾಲಿತವಾಗಿ ರದ್ದಾಗಲಿದೆ.
ಕೇಂದ್ರ ರಸ್ತೆ ಸಾರಿಗೆ ಸಚಿವಾಲಯ ಮಾರ್ಚ್ 1ರಿಂದಲೇ ಈ ವ್ಯವಸ್ಥೆಯನ್ನು ಜಾರಿಗೆ ತಂದಿದೆ. ಆರಂಭಿಕ ಹಂತದಲ್ಲಿ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ, ಚೋಳಮಂಡಲಂ, ಶ್ರೀರಾಮ್ ಫೈನಾನ್ಸ್, ಸುಂದರಂ ಫೈನಾನ್ಸ್ ಸೇರಿದಂತೆ 5 ಹಣಕಾಸು ಸಂಸ್ಥೆಗಳು ಈ ವ್ಯವಸ್ಥೆ ಜಾರಿಗೊಳಿಸಲಿವೆ. ನಂತರ ಇತರೆ ಬ್ಯಾಂಕುಗಳು, ಹಣಕಾಸು ಸಂಸ್ಥೆಗಳು ಇದನ್ನು ಅಳವಡಿಸಿಕೊಳ್ಳಲಿವೆ.
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಯುನಿಫೈಡ್ ಲೇಂಡಿಂಗ್ ಇಂಟರ್ಫೇಸ್ ಬಳಸಿಕೊಂಡು ಈ ವ್ಯವಸ್ಥೆ ಜಾರಿಯಾಗಲಿದೆ. ಸಾಲ ತೀರಿದ ನಂತರ ವಾಹನ ಮಾಲೀಕನಿಗೆ ಇ- ವಾಹನ ಪೋರ್ಟಲ್ ಮೂಲಕ ಎಸ್ಎಂಎಸ್ ಕಳುಹಿಸಿಕೊಡಲಾಗುವುದು ಎಂದು ಹೇಳಲಾಗಿದೆ.
