ಬೆಂಗಳೂರು : ಸರ್ಕಾರಿ ಬ್ಯಾಂಕ್ ಖಾತೆಗಳ ಭದ್ರತೆಯನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ಕರ್ನಾಟಕ ಸರ್ಕಾರ ಮಹತ್ವದ ಸುತ್ತೋಲೆ ಹೊರಡಿಸಿದೆ. ಇನ್ನು ಮುಂದೆ ಎಲ್ಲಾ ಸರ್ಕಾರಿ ಬ್ಯಾಂಕ್ ಖಾತೆಗಳ ದಾಖಲೆಗಳಲ್ಲಿ ಅಧಿಕೃತ ಸರ್ಕಾರಿ ಡೊಮೇನ್‌ನ ಇ-ಮೇಲ್ ಐಡಿಗಳನ್ನು ಮಾತ್ರ ಕಡ್ಡಾಯವಾಗಿ ಬಳಸಬೇಕು ಎಂದು ಆರ್ಥಿಕ ಇಲಾಖೆ ನಿರ್ದೇಶನ ನೀಡಿದೆ.
ಭಾರತ ಸರ್ಕಾರದ ಹಣಕಾಸು ಸೇವೆಗಳ ಇಲಾಖೆಯ ನಿರ್ದೇಶನದ ಹಿನ್ನೆಲೆಯಲ್ಲಿ ಈ ಸುತ್ತೋಲೆ ಹೊರಡಿಸಲಾಗಿದ್ದು, ಬ್ಯಾಂಕ್ ಖಾತೆಗಳಲ್ಲಿ ಸಂವಹನ ವಿವರಗಳ ಲೋಪದಿಂದ ಕೆಲ ಸರ್ಕಾರಿ ಖಾತೆಗಳಲ್ಲಿ ವಂಚನೆ ಪ್ರಕರಣಗಳು ನಡೆದಿರುವುದು ಗಮನಕ್ಕೆ ಬಂದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಸರ್ಕಾರಿ ಬ್ಯಾಂಕ್ ಖಾತೆಗಳಿಗೆ ಅಧಿಕೃತ ಸರ್ಕಾರಿ ಡೊಮೇನ್‌ಗೆ ಸೇರದ ವೈಯಕ್ತಿಕ ಅಥವಾ ಇತರೆ ಇ-ಮೇಲ್ ಐಡಿಗಳನ್ನು ಬಳಸುವುದರಿಂದ ಅನಧಿಕೃತ ಬದಲಾವಣೆ, ಸಂವಹನ ವ್ಯವಸ್ಥೆಯ ದುರುಪಯೋಗ ಹಾಗೂ ಆರ್ಥಿಕ ನಷ್ಟ ಸಂಭವಿಸುವ ಸಾಧ್ಯತೆ ಇದೆ ಎಂದು ಸುತ್ತೋಲೆಯಲ್ಲಿ ಉಲ್ಲೇಖಿಸಲಾಗಿದೆ.
ಈ ಹಿನ್ನೆಲೆಯಲ್ಲಿ ಎಲ್ಲಾ ಇಲಾಖೆಗಳು, ಕಚೇರಿಗಳು, ಹಣಕಾಸು ಮತ್ತು ಬಟವಾಡೆ ಅಧಿಕಾರಿಗಳು (DDOs), ಖಜಾನೆ ಅಧಿಕಾರಿಗಳು, ಸಿಂಗಲ್ ನೋಡಲ್ ಏಜೆನ್ಸಿ (SNA) ಆಪರೇಟರ್‌ಗಳು ಹಾಗೂ ಅಧಿಕೃತ ಸಹಿದಾರರು ಕಡ್ಡಾಯವಾಗಿ ಈ ನಿಯಮಗಳನ್ನು ಪಾಲಿಸಬೇಕು ಎಂದು ಸೂಚಿಸಲಾಗಿದೆ.
ಸುತ್ತೋಲೆಯ ಪ್ರಮುಖ ಸೂಚನೆಗಳು
- ಎಲ್ಲಾ ಸರ್ಕಾರಿ ಬ್ಯಾಂಕ್ ಖಾತೆಗಳಲ್ಲಿ ಅಧಿಕೃತ ಸರ್ಕಾರಿ ಡೊಮೇನ್‌ನ ಇ-ಮೇಲ್ ಐಡಿಗಳನ್ನು ಮಾತ್ರ ನೋಂದಾಯಿಸಿ ನಿರ್ವಹಿಸಬೇಕು.
- ಖಾತೆಗಳಿಗೆ ಲಿಂಕ್ ಆಗಿರುವ ವೈಯಕ್ತಿಕ ಅಥವಾ ಅಧಿಕೃತವಲ್ಲದ ಇ-ಮೇಲ್ ಐಡಿಗಳನ್ನು ತಕ್ಷಣವೇ ತೆಗೆದು, ಅಧಿಕೃತ ಸರ್ಕಾರಿ ಇ-ಮೇಲ್ ಐಡಿಗಳನ್ನು ನೋಂದಾಯಿಸಬೇಕು.
- ಬ್ಯಾಂಕ್ ದಾಖಲೆಗಳಲ್ಲಿರುವ ಇ-ಮೇಲ್ ಐಡಿ ಹಾಗೂ ಮೊಬೈಲ್ ಸಂಖ್ಯೆಗಳ ನಿಖರತೆಯನ್ನು ಕಾಲಕಾಲಕ್ಕೆ ಪರಿಶೀಲಿಸಬೇಕು.
- ಸಂಪರ್ಕ ವಿವರಗಳಲ್ಲಿ ಬದಲಾವಣೆ ಮಾಡುವ ಯಾವುದೇ ವಿನಂತಿಯನ್ನು ಕಡ್ಡಾಯವಾಗಿ ಆಂತರಿಕ ದೃಢೀಕರಣ ಮತ್ತು ಸಮಗ್ರ ಪರಿಶೀಲನೆಯ ಬಳಿಕವೇ ಅನುಮೋದಿಸಬೇಕು.
ಸರ್ಕಾರದ ಈ ಕ್ರಮದಿಂದ ಸರ್ಕಾರಿ ಬ್ಯಾಂಕ್ ಖಾತೆಗಳ ಭದ್ರತೆ ಹೆಚ್ಚುವುದರ ಜೊತೆಗೆ ವಂಚನೆ ಪ್ರಕರಣಗಳನ್ನು ತಡೆಗಟ್ಟಲು ನೆರವಾಗಲಿದೆ ಎಂದು ಆರ್ಥಿಕ ಇಲಾಖೆ ತಿಳಿಸಿದೆ.
