ಹಸುಗೂಸುಗಳು ಹುಟ್ಟಿದ ಬಳಿಕ ಕಣ್ಣು ತೆರೆಯಲು, ಸುತ್ತಮುತ್ತಲಿನ ಜಗತ್ತನ್ನು ಅರಿತುಕೊಳ್ಳಲು ಕೆಲವು ದಿನಗಳೇ ಬೇಕಾಗುತ್ತವೆ. ಆದರೆ ಆಂಧ್ರಪ್ರದೇಶದ ಶ್ರೀಕಾಕುಳಂ ಜಿಲ್ಲೆಯ ಈ ಪುಟ್ಟ ಕಂದಮ್ಮ ಹುಟ್ಟಿ ಕೇವಲ 13 ದಿನಗಳಲ್ಲೇ ಅಂತಾರಾಷ್ಟ್ರೀಯ ಪ್ರಯಾಣಕ್ಕೆ ಅಗತ್ಯವಿರುವ ಪಾಸ್‌ಪೋರ್ಟ್ ಪಡೆದು ಸುದ್ದಿಯಾಗಿದ್ದಾಳೆ.
ಸಾಮಾನ್ಯವಾಗಿ ಪಾಸ್‌ಪೋರ್ಟ್ ಪಡೆಯಲು ಹಲವು ದಿನಗಳ ಸಮಯ ಬೇಕಾಗುತ್ತದೆ. ಆದರೆ ಆಂಧ್ರಪ್ರದೇಶದ ಶ್ರೀಕಾಕುಳಂ ಜಿಲ್ಲೆಯ ಪುಟ್ಟ ಕಂದಮ್ಮವೊಂದು ಹುಟ್ಟಿದ ಕೇವಲ 13 ದಿನಗಳಲ್ಲೇ ಪಾಸ್‌ಪೋರ್ಟ್ ಪಡೆದು ಅಪರೂಪದ ದಾಖಲೆ ನಿರ್ಮಿಸಿದೆ. ಹಿಂದಿನ 19 ದಿನಗಳ ದಾಖಲೆಯನ್ನು ಮುರಿದ ಈ ಪುಟ್ಟ ಮಗುವಿನ ಸಾಧನೆ ಇದೀಗ ಇಂಟರ್‌ನ್ಯಾಷನಲ್ ಬುಕ್ ಆಫ್ ರೆಕಾರ್ಡ್ಸ್‌ನಲ್ಲೂ ದಾಖಲಾಗಿದೆ.
ಪಾಸ್‌ಪೋರ್ಟ್ ಪಡೆಯಲು ಅರ್ಜಿ, ದಾಖಲೆ ಪರಿಶೀಲನೆ ಹಾಗೂ ಇತರೆ ಪ್ರಕ್ರಿಯೆಗಳು ಪೂರ್ಣಗೊಳ್ಳಲು ಹಲವು ದಿನಗಳು ಬೇಕಾಗುತ್ತವೆ. ಆದರೆ ಈ ಪುಟ್ಟ ಮಗು ಅತ್ಯಂತ ವೇಗವಾಗಿ ಪಾಸ್‌ಪೋರ್ಟ್ ಪಡೆದು ಅಪರೂಪದ ದಾಖಲೆ ನಿರ್ಮಿಸಿದೆ.
ವಿಶಾಖಪಟ್ಟಣಂನಲ್ಲಿ ಪಾಸ್‌ಪೋರ್ಟ್
ಶ್ರೀಕಾಕುಳಂ ಜಿಲ್ಲೆಯ ಇಚ್ಚಾಪುರಂ ಪಟ್ಟಣದ ದಾಸನ್ನಪೇಟೆ ನಿವಾಸಿಗಳಾದ ವಜ್ರಪು ಆಶಿಷ್ ಮತ್ತು ಗೀತಾಮಾಧುರಿ ದಂಪತಿಯ ಪುತ್ರಿ ಈ ಮಗು. ಆಕೆಯ ಹೆಸರು ಅಗಸ್ಯ ಪ್ರಿನ್ಸಿ.ಅಗಸ್ಯ ಪ್ರಿನ್ಸಿ ಅವರು ಈ ವರ್ಷದ ಮೇ 30ರಂದು ರಾಜಮಹೇಂದ್ರವರಂನಲ್ಲಿ ಜನಿಸಿದರು. ಮಗುವಿನ ತಂದೆ ಆಶಿಷ್ ಅವರು ವೃತ್ತಿಯಿಂದ ಲಂಡನ್‌ನಲ್ಲಿ ಪಾದ್ರಿಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.
ಲಂಡನ್‌ನಿಂದ ಭಾರತಕ್ಕೆ ಹಾಗೂ ಭಾರತದಿಂದ ಬ್ರಿಟನ್‌ಗೆ ನಿರಂತರವಾಗಿ ಪ್ರಯಾಣಿಸಬೇಕಾಗಿರುವ ಹಿನ್ನೆಲೆಯಲ್ಲಿ, ಮಗುವನ್ನೂ ತಮ್ಮೊಂದಿಗೆ ಲಂಡನ್‌ಗೆ ಕರೆದುಕೊಂಡು ಹೋಗಲು ಪೋಷಕರು ತಕ್ಷಣವೇ ಪಾಸ್‌ಪೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದರು.
ಅರ್ಜಿ ಪ್ರಕ್ರಿಯೆ ತ್ವರಿತವಾಗಿ ಪೂರ್ಣಗೊಂಡಿದ್ದು, ಜೂನ್ 12ರಂದು ವಿಶಾಖಪಟ್ಟಣಂ ಪಾಸ್‌ಪೋರ್ಟ್ ಕಚೇರಿಯಿಂದ ಮಗುವಿಗೆ ಅಧಿಕೃತವಾಗಿ ಪಾಸ್‌ಪೋರ್ಟ್ ನೀಡಲಾಯಿತು.
19 ದಿನಗಳ ಹಿಂದಿನ ದಾಖಲೆ ಮುರಿದ ಪುಟ್ಟ ಕಂದಮ್ಮ!
ಹಿಂದೆ ಅತ್ಯಂತ ಕಡಿಮೆ ವಯಸ್ಸಿನಲ್ಲಿ ಪಾಸ್‌ಪೋರ್ಟ್ ಪಡೆದ ದಾಖಲೆಯು 19 ದಿನಗಳ ವಯಸ್ಸಿನ ಮಗುವಿನ ಹೆಸರಿನಲ್ಲಿತ್ತು ಎನ್ನಲಾಗಿದೆ.
ಆದರೆ ಮೇ 30ರಂದು ಜನಿಸಿದ ಅಗಸ್ಯ ಪ್ರಿನ್ಸಿಗೆ ಜೂನ್ 12ರಂದೇ, ಅಂದರೆ ಕೇವಲ 13 ದಿನಗಳಲ್ಲೇ ಪಾಸ್‌ಪೋರ್ಟ್ ನೀಡಲಾಗಿದೆ. ಈ ಮೂಲಕ ಹಿಂದಿನ ದಾಖಲೆಯನ್ನು ಮೀರಿಸಿ ಹೊಸ ದಾಖಲೆ ನಿರ್ಮಿಸಿದ್ದಾಳೆ.
ಕೇವಲ 13 ದಿನಗಳ ವಯಸ್ಸಿನಲ್ಲೇ ಭಾರತೀಯ ಪಾಸ್‌ಪೋರ್ಟ್ ಪಡೆದ ಪುಟ್ಟ ಮಗುವಾಗಿ ಅಗಸ್ಯ ಪ್ರಿನ್ಸಿ ಹೊಸ ಇತಿಹಾಸ ನಿರ್ಮಿಸಿದ್ದಾಳೆ ಎಂದು ಆಕೆಯ ತಾತ ವಜ್ರಪು ವೆಂಕಟೇಶ್ ಸಂತಸ ವ್ಯಕ್ತಪಡಿಸಿದ್ದಾರೆ.
ಇಂಟರ್‌ನ್ಯಾಷನಲ್ ಬುಕ್ ಆಫ್ ರೆಕಾರ್ಡ್ಸ್‌ನಲ್ಲೂ ಹೆಸರು!
ಕೇವಲ 13 ದಿನಗಳ ವಯಸ್ಸಿನಲ್ಲೇ ಈ ಅಪರೂಪದ ಸಾಧನೆ ಮಾಡಿರುವ ಹಿನ್ನೆಲೆಯಲ್ಲಿ ‘ಇಂಟರ್‌ನ್ಯಾಷನಲ್ ಬುಕ್ ಆಫ್ ರೆಕಾರ್ಡ್ಸ್’ ಸಂಸ್ಥೆಯು ಅಗಸ್ಯ ಪ್ರಿನ್ಸಿಯ ಹೆಸರನ್ನು ತನ್ನ ದಾಖಲೆಗಳಲ್ಲಿ ದಾಖಲಿಸಿದೆ.ಈ ವಿಶೇಷ ಮನ್ನಣೆ ಜೂನ್ 12ರಂದು ದೊರೆತಿದೆ ಎನ್ನಲಾಗಿದೆ. ಸದ್ಯ ಸುಮಾರು ಮೂರೂವರೆ ತಿಂಗಳ ವಯಸ್ಸಿನಲ್ಲಿರುವ ಅಗಸ್ಯ ಪ್ರಿನ್ಸಿ, ಚಿಕ್ಕ ವಯಸ್ಸಿನಲ್ಲೇ ವಿದೇಶ ಪ್ರಯಾಣಕ್ಕೆ ಸಿದ್ಧವಾಗುತ್ತಿರುವುದರಿಂದ ಕುಟುಂಬದವರಷ್ಟೇ ಅಲ್ಲದೆ ಇಡೀ ಜಿಲ್ಲೆಯ ಗಮನ ಸೆಳೆದಿದ್ದಾಳೆ.
