ಮುಂಬೈನ ಜೋಗೇಶ್ವರಿ-ವಿಖ್ರೋಲಿ ಲಿಂಕ್ ರಸ್ತೆಯಲ್ಲಿ ಬಿದ್ದಿದ್ದ ಒಂದು ರಸ್ತೆ ಗುಂಡಿ ದಾದಾರಾವ್ ಬಿಲ್ಹೋರೆ ಅವರ ಬದುಕನ್ನೇ ಬದಲಿಸಿಹಾಕಿತು. 2015ರಲ್ಲಿ ಮಳೆ ನೀರಿನಲ್ಲಿ ಮುಳುಗಿದ್ದ ರಸ್ತೆ ಗುಂಡಿ ಕಾಣಿಸದೆ ಬೈಕ್ ಅಪಘಾತಕ್ಕೀಡಾಗಿ, ದಾದಾರಾವ್ ಅವರ 16 ವರ್ಷದ ಮಗ ಪ್ರಕಾಶ್ ತಲೆಗೆ ತೀವ್ರ ಪೆಟ್ಟಾಗಿ ಮೃತಪಟ್ಟಿದ್ದನು. ಹೆಲ್ಮೆಟ್ ಧರಿಸದಿರುವುದು ಹಾಗೂ ರಸ್ತೆ ನಿರ್ವಹಣೆಯ ಲೋಪದಿಂದ ಮಗನನ್ನು ಕಳೆದುಕೊಂಡ ದಾದಾರಾವ್, ಆ ತೀವ್ರ ನೋವನ್ನೇ ತಮ್ಮ ಜೀವಮಾನದ ಕಾರ್ಯವನ್ನಾಗಿ ಮಾರ್ಪಡಿಸಿಕೊಂಡರು.
ಮಗನ ಸಾವಿನ ನಂತರ ಅಧಿಕಾರಿಗಳು ರಸ್ತೆ ಗುಂಡಿ ಮುಚ್ಚಲು ಕಾಯದೆ, ತಾವೇ ಕೈಯಲ್ಲಿ ಸಲಿಕೆ, ಜಲ್ಲಿ ಹಾಗೂ ಸಿಮೆಂಟ್ ಹಿಡಿದು ರಸ್ತೆಗೆಿಳಿದರು. ಅಂದಿನಿಂದ ಇಂದಿನವರೆಗೆ ದಾದಾರಾವ್ ಮುಂಬೈ ಹಾಗೂ ಸುತ್ತಮುತ್ತಲಿನ ರಸ್ತೆಗಳಲ್ಲಿದ್ದ 1,450ಕ್ಕೂ ಹೆಚ್ಚು ಅಪಾಯಕಾರಿ ಗುಂಡಿಗಳನ್ನು ಸ್ವತಃ ತಮ್ಮ ಕೈಯಾರ ಮುಚ್ಚಿದ್ದಾರೆ. “ನನ್ನ ಮಗ ಮನೆಗೆ ಹಿಂತಿರುಗಲಿಲ್ಲ, ಆದರೆ ನಾನು ಮುಚ್ಚುವ ಪ್ರತಿ ಗುಂಡಿಯಿಂದ ಮತ್ತೊಬ್ಬ ತಂದೆಯ ಮಗ ಸುರಕ್ಷಿತವಾಗಿ ಮನೆ ತಲುಪುತ್ತಾನೆ” ಎಂಬ ಬಲವಾದ ನಂಬಿಕೆ ಅವರಲ್ಲಿದೆ.
ಅವರ ಈ ಅಪಾರ ಸೇವೆಯಿಂದ ಪ್ರೇರಿತರಾಗಿ ‘ಸ್ಪಾಟ್‌ಹೋಲ್’ ಆಪ್ ಹಾಗೂ ನಾಗರಿಕ ಒಕ್ಕೂಟಗಳು ಹುಟ್ಟಿಕೊಂಡಿದ್ದು, ಹೈದರಾಬಾದ್‌ನಲ್ಲೂ ಇಂತಹದ್ದೇ ಜಾಗೃತಿ ಅಲೆ ಎದ್ದಿದೆ. ಮಗನ ಸಾವಿಗೆ ಕಾರಣವಾದ ಗುತ್ತಿಗೆದಾರರು ಹಾಗೂ ಅಧಿಕಾರಿಗಳ ವಿರುದ್ಧ ನ್ಯಾಯಾಲಯದಲ್ಲಿ ಕಾನೂನು ಹೋರಾಟ ಮುಂದುವರಿಸಿರುವ ದಾದಾರಾವ್, ಪ್ರತಿಯೊಬ್ಬ ದ್ವಿಚಕ್ರ ವಾಹನ ಸವಾರರಿಗೂ ಹೆಲ್ಮೆಟ್ ಧರಿಸುವಂತೆ ಅರಿವು ಮೂಡಿಸುತ್ತಿದ್ದಾರೆ. ಪ್ರಕಾಶ್ ನೆನಪಿನಲ್ಲಿ ಪ್ರತಿವರ್ಷ ಅವರು ಅದೇ ರಸ್ತೆಯ ಗುಂಡಿಗಳನ್ನು ಮುಚ್ಚುವ ಮೂಲಕ ಇತರರ ಜೀವ ಉಳಿಸುವ ಕಾಯಕದಲ್ಲಿ ತೊಡಗಿಸಿಕೊಂಡಿದ್ದಾರೆ.
