ಬೆಂಗಳೂರು: ಸಾಮಾನ್ಯವಾಗಿ ಹೊಟ್ಟೆ ಗುಡುಗುಡು ಎನ್ನುವುದು ಅಥವಾ ಪದೇ ಪದೇ ಗ್ಯಾಸ್ ಹೊರಹೋಗುವುದು (Farting) ಮುಜುಗರದ ಸಂಗತಿ ಎಂದು ನಾವು ಭಾವಿಸುತ್ತೇವೆ. ಆದರೆ ಫ್ಲೋರಿಡಾದ ಪ್ರಖ್ಯಾತ ಗ್ಯಾಸ್ಟ್ರೋಎಂಟರಾಲಜಿಸ್ಟ್ ಡಾ. ಜೋಸೆಫ್ ಸಲ್ಹಾಬ್ ಅವರ ಪ್ರಕಾರ, ಇವು ನಿಮ್ಮ ಹೊಟ್ಟೆ ಮತ್ತು ಕರುಳು ಅತ್ಯಂತ ಆರೋಗ್ಯವಾಗಿವೆ ಎನ್ನುವುದರ ಲಕ್ಷಣಗಳಾಗಿವೆ. ಜೀರ್ಣಾಂಗವ್ಯೂಹದ ತಜ್ಞರಾದ ಇವರು, ನಮ್ಮ ದೇಹವು ನೀಡುವ 5 ವಿಚಿತ್ರ ಎಚ್ಚರಿಕೆಗಳು ವಾಸ್ತವದಲ್ಲಿ ಆರೋಗ್ಯಕರ ಜೀರ್ಣಕ್ರಿಯೆಯ ಸಂಕೇತಗಳು ಎಂದು ವಿವರಿಸಿದ್ದಾರೆ.
1. ಹೊಟ್ಟೆಯಲ್ಲಿ ಗುಡುಗುಡು ಶಬ್ದ ಕೇಳಿಸುವುದು ಹಸಿವಾದಾಗ ಅಥವಾ ಊಟದ ನಡುವಿನ ಸಮಯದಲ್ಲಿ ಹೊಟ್ಟೆಯಲ್ಲಿ ಶಬ್ದ ಬರುವುದು ಸಾಮಾನ್ಯ. ಇದು ಕೇವಲ ಹಸಿವಿನ ಸಂಕೇತವಲ್ಲ, ಬದಲಾಗಿ ನಿಮ್ಮ ಕರುಳು ತನ್ನನ್ನು ತಾನು ಸ್ವಚ್ಛಗೊಳಿಸಿಕೊಳ್ಳುತ್ತಿರುವ ಪ್ರಕ್ರಿಯೆಯಾಗಿದೆ. ಕರುಳಿನ ಒಳಗಿನ ಸ್ನಾಯುಗಳು ಸಂಕುಚಿತಗೊಂಡು ಅನಿಲ, ದ್ರವ ಮತ್ತು ಉಳಿದ ಆಹಾರದ ಕಣಗಳನ್ನು ಮುಂದೆ ತಳ್ಳುವಾಗ ಇಂತಹ ಶಬ್ದಗಳು ಕೇಳಿಬರುತ್ತವೆ. ಇದನ್ನು ವೈದ್ಯಕೀಯ ಭಾಷೆಯಲ್ಲಿ ‘ಮೈಗ್ರೇಟಿಂಗ್ ಮೋಟಾರ್ ಕಾಂಪ್ಲೆಕ್ಸ್’ ಎಂದು ಕರೆಯಲಾಗುತ್ತದೆ.
2. ಪದೇ ಪದೇ ಗ್ಯಾಸ್ ಹೊರಹಾಕುವುದು ದಿನಕ್ಕೆ 10 ರಿಂದ 20 ಬಾರಿ ಗ್ಯಾಸ್ ಬಿಡುವುದು ಸಂಪೂರ್ಣವಾಗಿ ನಾರ್ಮಲ್ ಮತ್ತು ಇದು ಆರೋಗ್ಯಕರ ಕರುಳಿನ ಲಕ್ಷಣ. ನಿಮ್ಮ ಹೊಟ್ಟೆಯಲ್ಲಿರುವ ಒಳ್ಳೆಯ ಬ್ಯಾಕ್ಟೀರಿಯಾಗಳು ಆಹಾರದಲ್ಲಿನ ನಾರಿನಂಶವನ್ನು ಜೀರ್ಣಿಸುತ್ತಿವೆ ಮತ್ತು ಆಂಟಿ-ಆಕ್ಸಿಡೆಂಟ್ಗಳನ್ನು ಉತ್ಪಾದಿಸುತ್ತಿವೆ ಎಂಬುದಕ್ಕೆ ಇದು ಸಾಕ್ಷಿ. ಈ ಪ್ರಕ್ರಿಯೆಯ ಉಪ ಉತ್ಪನ್ನವಾಗಿ ಅನಿಲ ಬಿಡುಗಡೆಯಾಗುತ್ತದೆ. ಇದು ನಿಮ್ಮ ಮೈಕ್ರೋಬಯೋಮ್ ಸಕ್ರಿಯವಾಗಿದೆ ಎಂದು ತೋರಿಸುತ್ತದೆ.
3. ತಿಂದ ತಕ್ಷಣ ಶೌಚಕ್ಕೆ ಹೋಗುವುದು ಕೆಲವರಿಗೆ ಊಟ ಮಾಡಿದ ತಕ್ಷಣ ಅಥವಾ ಯಾವುದಾದರೂ ವಿಷಯಕ್ಕೆ ಹೆಚ್ಚು ಎಕ್ಸೈಟ್ ಆದಾಗ ಶೌಚಕ್ಕೆ ಹೋಗಬೇಕೆನಿಸುತ್ತದೆ. ಇದನ್ನು ‘ಗ್ಯಾಸ್ಟ್ರೋಕೊಲಿಕ್ ರಿಫ್ಲೆಕ್ಸ್’ ಎನ್ನಲಾಗುತ್ತದೆ. ಹೊಟ್ಟೆಗೆ ಹೊಸ ಆಹಾರ ಬಂದಾಗ, ಹಳೆಯ ತ್ಯಾಜ್ಯವನ್ನು ಹೊರಹಾಕಿ ಜಾಗ ಮಾಡಿಕೊಡಲು ಮೆದುಳು ಕರುಳಿಗೆ ಸಂಕೇತ ನೀಡುತ್ತದೆ. ಇದು ನಿಮ್ಮ ಜೀರ್ಣಾಂಗ ವ್ಯವಸ್ಥೆಯು ಅತ್ಯಂತ ವೇಗವಾಗಿ ಮತ್ತು ಚುರುಕಾಗಿ ಸ್ಪಂದಿಸುತ್ತಿದೆ ಎಂಬುದನ್ನು ತಿಳಿಸುತ್ತದೆ.
4. ಕ್ಲೀನ್ ಆಗಿ ಹೊರಬರುವ ಮಲ (Ghost Poop) ಕೆಲವೊಮ್ಮೆ ಶೌಚಕ್ಕೆ ಹೋದಾಗ ಮಲವು ಸುಲಭವಾಗಿ ಹೊರಬರುತ್ತದೆ ಮತ್ತು ಸ್ವಚ್ಛಗೊಳಿಸುವಾಗ (Wiping) ಅಷ್ಟೇನೂ ಕಸ ಇರುವುದಿಲ್ಲ. ಇದನ್ನು ‘ಘೋಸ್ಟ್ ಪೂಪ್’ ಎಂದು ಕರೆಯಲಾಗುತ್ತದೆ. ಇದು ನಿಮ್ಮ ದೇಹದಲ್ಲಿ ನಾರಿನಂಶ (Fiber) ಸಮರ್ಪಕವಾಗಿದೆ, ನೀವು ಸರಿಯಾಗಿ ನೀರು ಕುಡಿಯುತ್ತಿದ್ದೀರಿ ಮತ್ತು ನಿಮ್ಮ ಕರುಳಿನ ಬ್ಯಾಕ್ಟೀರಿಯಾಗಳು ಸಮತೋಲನದಲ್ಲಿವೆ ಎಂಬುದರ ಸಂಕೇತವಾಗಿದೆ.
5. ದಿನಕ್ಕೆ ಒಂದಕ್ಕಿಂತ ಹೆಚ್ಚು ಬಾರಿ ಶೌಚಕ್ಕೆ ಹೋಗುವುದು ದಿನಕ್ಕೆ ಒಂದು ಬಾರಿ ಮಾತ್ರ ಶೌಚಕ್ಕೆ ಹೋಗುವುದು ಆರೋಗ್ಯದ ನಿಯಮ ಎಂದು ಹಲವರು ಭಾವಿಸುತ್ತಾರೆ. ಆದರೆ ವೈದ್ಯರ ಪ್ರಕಾರ, ದಿನಕ್ಕೆ ಮೂರು ಬಾರಿಯವರೆಗೆ ಶೌಚಕ್ಕೆ ಹೋಗುವುದು ಕೂಡ ಸಹಜವೇ. ಮಲವು ಗಟ್ಟಿಯಾಗಿರದೆ, ಸುಲಭವಾಗಿ ವಿಸರ್ಜನೆಯಾಗುತ್ತಿದ್ದರೆ ನೀವು ದಿನಕ್ಕೆ ಎಷ್ಟು ಬಾರಿ ಹೋಗುತ್ತೀರಿ ಎಂಬುದು ಮುಖ್ಯವಲ್ಲ. ಆದರೆ ಪದೇ ಪದೇ ಅತಿಸಾರ ಅಥವಾ ನೀರಿನಂತಹ ಮಲ ವಿಸರ್ಜನೆಯಾಗುತ್ತಿದ್ದರೆ ಮಾತ್ರ ಅದು ಅನಾರೋಗ್ಯದ ಲಕ್ಷಣ.
ಒಟ್ಟಾರೆಯಾಗಿ, ದೇಹದ ಈ ಸಣ್ಣಪುಟ್ಟ ವಿಚಿತ್ರ ಕ್ರಿಯೆಗಳು ನಮ್ಮ ಒಳಾಂಗಣ ವ್ಯವಸ್ಥೆಯು ಸುಸ್ಥಿತಿಯಲ್ಲಿದೆ ಎಂಬುದನ್ನು ನೆನಪಿಸುತ್ತಿರುತ್ತವೆ.
