ಪ್ರಯಾಗ್‌ರಾಜ್ ಕುಂಭಮೇಳದಲ್ಲಿ ರುದ್ರಾಕ್ಷಿ ಮಾಲೆ ಮಾರಾಟ ಮಾಡುವ ವಿಡಿಯೋ ಮೂಲಕ ರಾತ್ರೋರಾತ್ರಿ ಇಂಟರ್ನೆಟ್ ಸೆನ್ಸೇಷನ್ ಆಗಿದ್ದ 18 ವರ್ಷದ ಮೋನಾಲಿಸಾ ಭೋಂಸ್ಲೆ, ತಮ್ಮ ಗೆಳೆಯ ಹಾಗೂ ನಟ ಫರ್ಮನ್ ಖಾನ್ ಅವರೊಂದಿಗೆ ಕೇರಳದ ನಯನಾರ್ ದೇವಸ್ಥಾನದಲ್ಲಿ ಹಿಂದೂ ಸಂಪ್ರದಾಯದಂತೆ ವಿವಾಹವಾಗಿದ್ದಾರೆ. ಈ ಮದುವೆಯು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದ್ದು, ನಟಿ ಸ್ವತಃ ಮಾಧ್ಯಮಗಳ ಮುಂದೆ ಬಂದು ತಮ್ಮ ಮದುವೆಯ ಕುರಿತು ಸ್ಪಷ್ಟನೆ ನೀಡಿದ್ದಾರೆ.
ಹಿಂದೂ ಸಂಪ್ರದಾಯದಂತೆ ವಿವಾಹ: ಮತಾಂತರವಿಲ್ಲ
ತಿರುವನಂತಪುರದಲ್ಲಿ ನಡೆಸಿದ ಪತ್ರಿಕಾಗೋಷ್ಠಿಯಲ್ಲಿ ಹಣೆಯ ಮೇಲೆ ಸಿಂದೂರ ಧರಿಸಿ ಕಾಣಿಸಿಕೊಂಡ ಮೋನಾಲಿಸಾ, “ಇದು ಲವ್ ಜಿಹಾದ್ ಪ್ರಕರಣವಲ್ಲ. ನಾವು ಹಿಂದೂ ಸಂಪ್ರದಾಯದಂತೆ ಮದುವೆಯಾಗಿದ್ದೇವೆ. ನಾನು ಇಸ್ಲಾಂ ಧರ್ಮಕ್ಕೆ ಮತಾಂತರಗೊಂಡಿಲ್ಲ” ಎಂದು ಸ್ಪಷ್ಟಪಡಿಸಿದ್ದಾರೆ. ಫರ್ಮನ್ ಮದುವೆಗೆ ನಿರಾಕರಿಸಿದ್ದರೂ ತಾನೇ ಒತ್ತಾಯ ಮಾಡಿ ಮದುವೆಯಾಗಿರುವುದಾಗಿ ಅವರು ತಿಳಿಸಿದ್ದಾರೆ. ನಟ ಫರ್ಮನ್ ಖಾನ್ ಕೂಡ ಮಾತನಾಡಿ, “ನಾವಿಬ್ಬರೂ ಕಲಾವಿದರು, ನಮಗೆ ಎಲ್ಲಾ ಧರ್ಮಗಳ ಮೇಲೆ ಗೌರವವಿದೆ. ಪ್ರೀತಿಯಲ್ಲಿ ಮತಾಂತರದ ಅಗತ್ಯವಿಲ್ಲ” ಎಂದು ಹೇಳಿದ್ದಾರೆ.
ತಂದೆಯ ವಿರೋಧ ಮತ್ತು ಪೋಲೀಸ್ ರಕ್ಷಣೆ
ಸಿನಿಮಾ ಶೂಟಿಂಗ್‌ಗಾಗಿ ಕೇರಳಕ್ಕೆ ಬಂದಿದ್ದ ಮೋನಾಲಿಸಾ, ತಮ್ಮ ತಂದೆ ಬಲವಂತವಾಗಿ ತಮ್ಮನ್ನು ಊರಿಗೆ ಕರೆದೊಯ್ಯಲು ಪ್ರಯತ್ನಿಸುತ್ತಿದ್ದಾರೆ ಎಂದು ಆರೋಪಿಸಿ ಪೊಲೀಸ್ ರಕ್ಷಣೆ ಕೋರಿದ್ದರು. “ನನ್ನ ತಂದೆ ನನಗೆ ಇಷ್ಟವಿಲ್ಲದ ಸಂಬಂಧಿಕರ ಜೊತೆ ಮದುವೆ ಮಾಡಲು ಮುಂದಾಗಿದ್ದರು. ನನಗೆ ಈಗ 18 ವರ್ಷ ತುಂಬಿದ್ದು, ನನ್ನ ಸ್ವಂತ ನಿರ್ಧಾರ ತೆಗೆದುಕೊಳ್ಳುವ ಹಕ್ಕಿದೆ” ಎಂದು ಅವರು ಹೇಳಿದ್ದಾರೆ. ಮಗಳ ಮದುವೆಗೆ ತಂದೆ ಅಸಮಾಧಾನ ವ್ಯಕ್ತಪಡಿಸಿದ್ದರೂ, ಕಾನೂನುಬದ್ಧವಾಗಿ ವಯಸ್ಕರಾಗಿರುವ ಕಾರಣ ಪೊಲೀಸರು ಅವರಿಗೆ ರಕ್ಷಣೆ ನೀಡಿದ್ದಾರೆ.
ಕೇರಳ ಸಚಿವರ ಉಪಸ್ಥಿತಿ ಮತ್ತು ‘ಕೇರಳ ಸ್ಟೋರಿ’ ಉಲ್ಲೇಖ
ವಿಶೇಷವೆಂದರೆ, ಈ ವಿವಾಹದಲ್ಲಿ ಕೇರಳದ ಶಿಕ್ಷಣ ಸಚಿವ ವಿ ಶಿವನ್ ಕುಟ್ಟಿ ಮತ್ತು ಇತರ ಪ್ರಮುಖ ರಾಜಕೀಯ ನಾಯಕರು ಭಾಗವಹಿಸಿದ್ದರು. ಈ ವೇಳೆ ಮಾತನಾಡಿದ ಸಚಿವರು, “ಮದುವೆಗಳು ಸ್ವರ್ಗದಲ್ಲಿ ನಡೆಯುತ್ತವೆ ಎನ್ನುತ್ತಾರೆ, ಆ ಸ್ವರ್ಗವೇ ಈ ಕೇರಳ. ಇದುವೇ ನಿಜವಾದ ‘ಕೇರಳ ಸ್ಟೋರಿ'” ಎಂದು ಹೇಳುವ ಮೂಲಕ ಈ ಹಿಂದೆ ವಿವಾದಕ್ಕೀಡಾಗಿದ್ದ ಸಿನಿಮಾದ ಹೆಸರನ್ನು ಉಲ್ಲೇಖಿಸಿ ಮಾರ್ಮಿಕವಾಗಿ ಮಾತನಾಡಿದ್ದಾರೆ. ಇಂದೋರ್ ಮೂಲದ ಮೋನಾಲಿಸಾ ಈಗ ದಕ್ಷಿಣ ಭಾರತದಲ್ಲೇ ನೆಲೆಸಿ ಮಲಯಾಳಂ ಚಿತ್ರರಂಗದಲ್ಲಿ ವೃತ್ತಿಜೀವನ ಮುಂದುವರಿಸಲು ನಿರ್ಧರಿಸಿದ್ದಾರೆ.
