ಹೊಸದಿಲ್ಲಿ: ವಿದೇಶ ಪ್ರವಾಸ ಮುಗಿಸಿ ತಾಯ್ನಾಡಿಗೆ ಮರಳಿದ ಬೆನ್ನಲ್ಲೇ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಫುಲ್ ಆ್ಯಕ್ಟಿವ್ ಆಗಿದ್ದಾರೆ. ಪ್ರಧಾನಿ ಮೋದಿ ನೇತೃತ್ವದಲ್ಲಿ ಗುರುವಾರ ಅತ್ಯಂತ ಮಹತ್ವದ ಹಾಗೂ ಸುದೀರ್ಘ ಸಚಿವ ಸಂಪುಟ ಸಭೆ (Cabinet Meeting) ನಡೆದಿದೆ. ಬರೋಬ್ಬರಿ ನಾಲ್ಕೂವರೆ ಗಂಟೆಗಳ ಕಾಲ ನಡೆದ ಈ ಮ್ಯಾರಥಾನ್ ಸಭೆಯಲ್ಲಿ ದೇಶದ 9 ಪ್ರಮುಖ ಸಚಿವಾಲಯಗಳು ಆಡಳಿತದ ಆದ್ಯತೆಗಳು, ಸುಧಾರಣೆಗಳು ಮತ್ತು ಭವಿಷ್ಯದ ಮಾಸ್ಟರ್ ಪ್ಲಾನ್ ಕುರಿತು ವಿವರವಾದ ಪ್ರಸ್ತುತಿ (Presentation) ನೀಡಿವೆ.ಭಾರತವನ್ನು 2047ರ ವೇಳೆಗೆ ವಿಕಸಿತ ಭಾರತ ಆಗಿ ಪರಿವರ್ತಿಸುವ ನಿಟ್ಟಿನಲ್ಲಿ ಅಭಿವೃದ್ಧಿಯ ವೇಗವನ್ನು ಹೆಚ್ಚಿಸುವುದು ಈ ಹೈ-ಲೆವೆಲ್ ಮೀಟಿಂಗ್‌ನ ಮುಖ್ಯ ಉದ್ದೇಶವಾಗಿತ್ತು.
9 ಸಚಿವಾಲಯಗಳ ರಿಪೋರ್ಟ್ ಕಾರ್ಡ್ ಪರಾಮರ್ಶೆ
ಈ ಮಹತ್ವದ ಸಭೆಯಲ್ಲಿ ಕೃಷಿ, ಅರಣ್ಯ, ಕಾರ್ಮಿಕ, ರಸ್ತೆ ಸಾರಿಗೆ, ಕಾರ್ಪೊರೇಟ್ ವ್ಯವಹಾರಗಳು, ವಿದೇಶಾಂಗ, ವಾಣಿಜ್ಯ ಮತ್ತು ಇಂಧನ ಸೇರಿದಂತೆ 9 ಪ್ರಮುಖ ಸಚಿವಾಲಯಗಳು ತಮ್ಮ ವರದಿಗಳನ್ನು ಮಂಡಿಸಿದವು. ಸಭೆಯಲ್ಲಿ 30ಕ್ಕೂ ಹೆಚ್ಚು ಸಂಪುಟ ಸಚಿವರು, 36 ರಾಜ್ಯ ಸಚಿವರು (MoS) ಮತ್ತು ಸ್ವತಂತ್ರ ಉಸ್ತುವಾರಿ ಹೊಂದಿರುವ 5 ರಾಜ್ಯ ಸಚಿವರು ಭಾಗವಹಿಸಿದ್ದರು.
ಕಳೆದ 12 ವರ್ಷಗಳ ಎನ್‌ಡಿಎ (NDA) ಸರ್ಕಾರದ ಐತಿಹಾಸಿಕ ಸಾಧನೆಗಳು ಮತ್ತು ಜನಕಲ್ಯಾಣ ಯೋಜನೆಗಳನ್ನು ಸಚಿವರು ನೇರವಾಗಿ ಸಾರ್ವಜನಿಕರ ಬಳಿಗೆ ಕೊಂಡೊಯ್ದು ಭರ್ಜರಿ ಜಾಗೃತಿ ಮೂಡಿಸಬೇಕು ಎಂದು ಪ್ರಧಾನಿ ಮೋದಿ ಸಚಿವರಿಗೆ ಕಟ್ಟುನಿಟ್ಟಿನ ಟಾಸ್ಕ್ ನೀಡಿದ್ದಾರೆ.
ವಿಕಸಿತ ಭಾರತ 2047 ಕೇವಲ ಘೋಷಣೆಯಲ್ಲ, ನಮ್ಮ ಬದ್ಧತೆ
ಸಭೆಯಲ್ಲಿ ಆಡಳಿತ ಸುಧಾರಣೆಗೆ ತೀವ್ರ ಒತ್ತು ನೀಡಿದ ಪ್ರಧಾನಿ ಮೋದಿ, ಎಲ್ಲಾ ಇಲಾಖೆಗಳಲ್ಲಿ ಆಡಳಿತಾತ್ಮಕ ಸುಧಾರಣೆಗಳು ತುರ್ತಾಗಿ ಆಗಬೇಕಿದೆ. ಆಡಳಿತವು ಸಂಪೂರ್ಣವಾಗಿ ಸಾರ್ವಜನಿಕ ಕಲ್ಯಾಣ ಮತ್ತು ನಾಗರಿಕರ ಸೌಕರ್ಯಗಳ ಮೇಲೆ ಕೇಂದ್ರೀಕೃತವಾಗಿರಬೇಕು ಎಂದು ಗರಂ ಆಗಿಯೇ ಸೂಚಿಸಿದರು.
ಫೈಲ್ಸ್ ವಿಲೇವಾರಿ ವೇಗವಾಗಲಿ: ಕಡತಗಳ ವಿಲೇವಾರಿ ರಾಕೆಟ್ ವೇಗದಲ್ಲಿ ನಡೆಯಬೇಕು ಮತ್ತು ಅನಗತ್ಯ ಪ್ರಕ್ರಿಯೆಗಳ ವಿಳಂಬವನ್ನು ಸಂಪೂರ್ಣವಾಗಿ ತೆಗೆದುಹಾಕಬೇಕು.
ಮಿಷನ್ ಮೋಡ್ ಕೆಲಸ: ಕಡಿಮೆ ಸಮಯದಲ್ಲಿ ಹೆಚ್ಚಿನ ಕೆಲಸ ಮುಗಿಸಿ, ಆಡಳಿತ ಸರಳಗೊಳಿಸಬೇಕು. ದೇಶವನ್ನು ಉನ್ನತ ಸ್ಥಾನಕ್ಕೇರಿಸಲು ಸಚಿವರು ಮಿಷನ್ ಮಾದರಿಯಲ್ಲಿ ಕೆಲಸ ಮಾಡಬೇಕು ಎಂದು ಕರೆ ನೀಡಿದರು. ಕಡಿಮೆ ಸಾಧನೆ ಮಾಡಿರುವ ಸಚಿವಾಲಯಗಳು ತಮ್ಮ ಕಾರ್ಯವೈಖರಿಯನ್ನು ತಕ್ಷಣವೇ ಸುಧಾರಿಸಿಕೊಳ್ಳಲು ವಾರ್ನಿಂಗ್ ನೀಡಲಾಗಿದೆ.
ಶಿಕ್ಷಣ ಸಚಿವಾಲಯಕ್ಕೆ ಕ್ಲಾಸ್?; ಇಂಧನ ಬೆಲೆ ಏರಿಕೆ ಚರ್ಚೆ
ಇತ್ತೀಚಿನ ನೀಟ್-ಯುಜಿ (NEET-UG) ಪ್ರಶ್ನೆ ಪತ್ರಿಕೆ ಸೋರಿಕೆ ಹಾಗೂ ಸಿಬಿಎಸ್‌ಇ (CBSE) 12ನೇ ತರಗತಿಯ ಅಂಕ ನೀಡಿಕೆಯ ಗೊಂದಲಗಳ ನಂತರ ಶಿಕ್ಷಣ ಸಚಿವಾಲಯವು ಸಭೆಯ ಪ್ರಮುಖ ಗಮನದ ಕೇಂದ್ರಬಿಂದುವಾಗಿತ್ತು. ಈ ಸೂಕ್ಷ್ಮ ವಿಷಯದ ಕುರಿತು ಪ್ರಧಾನಿಯವರು ಸಚಿವರನ್ನು ತೀವ್ರವಾಗಿ ಪ್ರಶ್ನಿಸಿದ್ದಾರೆ ಎನ್ನಲಾಗಿದೆ.
ಮತ್ತೊಂದೆಡೆ, ಪಶ್ಚಿಮ ಏಷ್ಯಾದಲ್ಲಿನ ಉದ್ವಿಗ್ನತೆ ಮತ್ತು ವಿಶ್ವದ ಪ್ರಮುಖ ತೈಲ ಮಾರ್ಗವಾದ ‘ಸ್ಟ್ರೇಟ್ ಆಫ್ ಹಾರ್ಮುಜ್’ ಪ್ರದೇಶದಲ್ಲಿನ ಅಡಚಣೆಯಿಂದಾಗಿ ಜಾಗತಿಕವಾಗಿ ಕಚ್ಚಾತೈಲದ ಬೆಲೆ ಏರಿಕೆಯಾಗುತ್ತಿದ್ದು, ಇದರಿಂದ ದೇಶದಲ್ಲಾಗುತ್ತಿರುವ ಆರ್ಥಿಕ ಸಂಕಷ್ಟ ಹಾಗೂ ಇಂಧನ ಬೆಲೆಗಳ ನಿಯಂತ್ರಣದ ಕುರಿತೂ ಸಭೆಯಲ್ಲಿ ಗಂಭೀರ ಮಂಥನ ನಡೆಯಿತು.
ಶೀಘ್ರದಲ್ಲೇ ಮೋದಿ ಸಂಪುಟ ಪುನಾರಚನೆ?: ಯುವ ಮುಖಗಳಿಗೆ ಚಾನ್ಸ್
ಹಲವಾರು ಜಾಗತಿಕ ಮತ್ತು ಆಂತರಿಕ ಸವಾಲುಗಳನ್ನು ಎದುರಿಸುತ್ತಿರುವ ಮೋದಿ ಸರ್ಕಾರವು, ಇದೀಗ ಕೇಂದ್ರ ಸಂಪುಟಕ್ಕೆ ಹೊಸ ಹಾಗೂ ಯುವ ಮುಖಗಳನ್ನು ಪರಿಚಯಿಸಲು ಭರ್ಜರಿ ಪ್ಲಾನ್ ಮಾಡಿದೆ. ಪ್ರಸ್ತುತ ‘ಖರ್ಮಸ್’ (ಅಶುಭ ಅವಧಿ) ಇರುವುದರಿಂದ, ಜೂನ್ 15ರ ನಂತರ ಅಥವಾ ಜುಲೈ ಆರಂಭದಲ್ಲಿ ಮೋದಿ ಸಂಪುಟ ಪುನಾರಚನೆ (Cabinet Reshuffle) ನಡೆಯುವ ಸಾಧ್ಯತೆ ದಟ್ಟವಾಗಿದೆ ಎಂದು ಬಿಜೆಪಿ ಮೂಲಗಳು ತಿಳಿಸಿವೆ.
ಇದೇ ವೇಳೆ, ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಅವರು ಪ್ರಧಾನಿ ಮೋದಿ ಅವರ ಇತ್ತೀಚಿನ ಯಶಸ್ವಿ ಐದು ರಾಷ್ಟ್ರಗಳ ರಾಜತಾಂತ್ರಿಕ ಪ್ರವಾಸದ ಬಗ್ಗೆ ಮಾಹಿತಿ ನೀಡಿದರು. ಇತ್ತೀಚಿನ ಯಶಸ್ವಿ ವಿದೇಶಿ ಪ್ರವಾಸ ಮತ್ತು ಪಶ್ಚಿಮ ಬಂಗಾಳದ ಚುನಾವಣೆಯಲ್ಲಿ ಬಿಜೆಪಿ ಪಡೆದ ಭರ್ಜರಿ ರಾಜಕೀಯ ಗೆಲುವಿಗಾಗಿ ಸಚಿವರು ಪ್ರಧಾನಿ ಮೋದಿಯವರನ್ನು ಅಭಿನಂದಿಸಿ ಸಂಭ್ರಮಿಸಿದರು.
