ಶಾಲೆಗಳಲ್ಲಿ ಬುರ್ಖಾ ಮತ್ತು ನಿಕಾಬ್ ಗೆ ನಿಷೇಧ…? ಹೊಸ ಯೋಜನೆ ಘೋಷಿಸಿದ ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ

ರೋಮ್: ಇಟಲಿಯ ಪ್ರಧಾನಿ ಜಾರ್ಜಿಯಾ ಮೆಲೋನಿ ಅವರು ತರಗತಿಗಳಲ್ಲಿ ವಿದೇಶಿ ವಿದ್ಯಾರ್ಥಿಗಳ ಸಂಖ್ಯೆಯನ್ನು ಮಿತಿಗೊಳಿಸುವ ಮತ್ತು ಶಾಲೆಗಳಲ್ಲಿ ಬುರ್ಖಾ ಹಾಗೂ ನಿಕಾಬ್ ಧರಿಸುವುದನ್ನು ನಿಷೇಧಿಸುವ ಕ್ರಮಗಳನ್ನು ಜಾರಿಗೆ ತರುವ ಯೋಜನೆಯನ್ನು ಘೋಷಿಸಿದ್ದಾರೆ. ರೋಮ್‌ ನಲ್ಲಿ ತಮ್ಮ ಪಕ್ಷವಾದ ‘ಬ್ರದರ್ಸ್ ಆಫ್ ಇಟಲಿ’ಯ ಯುವ ಘಟಕ ಆಯೋಜಿಸಿದ್ದ ಕಾರ್ಯಕ್ರಮವೊಂದರಲ್ಲಿ ಮಾತನಾಡುತ್ತಾ ಮೆಲೋನಿ ಈ ಘೋಷಣೆ ಮಾಡಿದರು.

ಪ್ರಸ್ತಾವಿತ ನಿಯಮಗಳ ಅಡಿಯಲ್ಲಿ, ಶಾಲಾ ವ್ಯವಸ್ಥೆಯೊಂದಿಗೆ ಹೊಂದಿಕೊಳ್ಳಲು(ಅಳವಡಿಸಿಕೊಳ್ಳಲು) ಕಷ್ಟಪಡುವ ವಿದೇಶಿ ವಿದ್ಯಾರ್ಥಿಗಳ ಪೋಷಕರು ಇಟಾಲಿಯನ್ ಭಾಷಾ ತರಗತಿಗಳಿಗೆ ಹಾಜರಾಗುವುದು ಕಡ್ಡಾಯವಾಗುತ್ತದೆ. ಈ ಪ್ರಸ್ತಾವನೆಯು ಕಾನೂನಾಗಿ ಜಾರಿಗೆ ಬರಲು, ಸರ್ಕಾರದ ಅನುಮೋದನೆ ದೊರೆತ 60 ದಿನಗಳೊಳಗೆ ಸಂಸತ್ತಿನ ಅನುಮೋದನೆಯ ಅಗತ್ಯವಿರುತ್ತದೆ.

ಪ್ರಸ್ತುತ, ಫ್ರಾನ್ಸ್ ಮತ್ತು ಚೀನಾ ಸೇರಿದಂತೆ ಪ್ರಪಂಚದಾದ್ಯಂತ 24 ದೇಶಗಳಲ್ಲಿ ಬುರ್ಖಾ ಮತ್ತು ನಿಕಾಬ್‌ಗೆ ನಿಷೇಧವಿದೆ.

ಜಾರ್ಜಿಯಾ ಮೆಲೋನಿ ಅವರ ಮೂರು ಪ್ರಸ್ತಾವನೆಗಳು

2027ರ ಚುನಾವಣೆಗೂ ಮುನ್ನ ತಮ್ಮ ಜನಪ್ರಿಯತೆಯನ್ನು ಹೆಚ್ಚಿಸುವ ಗುರಿಯೊಂದಿಗೆ ಮೆಲೋನಿ ಪ್ರಮುಖ ಘೋಷಣೆಯೊಂದನ್ನು ಮಾಡಿದ್ದಾರೆ. ಶಾಲೆಗಳಲ್ಲಿ ಬುರ್ಖಾ ಮತ್ತು ನಿಕಾಬ್‌ ನಂತಹ ಮುಖವನ್ನು ಮುಚ್ಚುವ ಉಡುಪುಗಳನ್ನು ನಿಷೇಧಿಸಲು ಇಟಲಿಯ ಪ್ರಧಾನಿ ಪ್ರಸ್ತಾಪಿಸಿದ್ದಾರೆ. ಅವರು ನಿರ್ದಿಷ್ಟವಾಗಿ ಬುರ್ಖಾ ಮತ್ತು ನಿಕಾಬ್ ಮೇಲಿನ ನಿಷೇಧದ ಬಗ್ಗೆ ಪ್ರಸ್ತಾಪಿಸಿದರು. ಆದರೆ, ಕೆಲವು ಮುಸ್ಲಿಂ ಮಹಿಳೆಯರು ಧರಿಸುವ ತಲೆಗೆ ಕಟ್ಟುವ ವಸ್ತ್ರವಾದ ‘ಹಿಜಾಬ್’ ಬಗ್ಗೆ ಮೆಲೋನಿ ಪ್ರಸ್ತಾಪಿಸಲಿಲ್ಲ.

ಇಟಲಿಗೆ ಆಗಮಿಸುವ ವಿದ್ಯಾರ್ಥಿಗಳು ಇಟಾಲಿಯನ್ ಭಾಷೆ ಮತ್ತು ಸಂಸ್ಕೃತಿಯನ್ನು ಗೌರವಿಸುವುದು ಕಡ್ಡಾಯವೆಂದು ಅವರು ಘೋಷಿಸಿದರು. ಮೆಲೋನಿ ಮೂರು ಪ್ರಮುಖ ಪ್ರಸ್ತಾವನೆಗಳನ್ನು ವಿವರಿಸಿದರು:

• ಇಟಲಿಯ ಶಾಲೆಗಳು ಮತ್ತು ಕಾಲೇಜುಗಳ ತರಗತಿಗಳಲ್ಲಿ ವಿದೇಶಿ ವಿದ್ಯಾರ್ಥಿಗಳ ಸಂಖ್ಯೆಯನ್ನು ಕಾನೂನುಬದ್ಧವಾಗಿ ಮಿತಿಗೊಳಿಸುವುದು.

• ಶಾಲಾ ವ್ಯವಸ್ಥೆಯೊಂದಿಗೆ ಹೊಂದಿಕೊಳ್ಳಲು ಕಷ್ಟಪಡುವ ವಿದೇಶಿ ವಿದ್ಯಾರ್ಥಿಗಳ ಪೋಷಕರು ಇಟಾಲಿಯನ್ ಭಾಷೆಯನ್ನು ಕಲಿಯುವುದನ್ನು ಕಡ್ಡಾಯಗೊಳಿಸುವುದು.

• ಶಾಲೆಗಳ ಆವರಣದಲ್ಲಿ ಬುರ್ಖಾ ಮತ್ತು ನಿಕಾಬ್‌ನಂತಹ ಮುಖವನ್ನು ಮುಚ್ಚುವ ಉಡುಪುಗಳನ್ನು ನಿಷೇಧಿಸುವುದು.

ಪ್ರಧಾನಿ ಮೆಲೋನಿ, “ಇಟಲಿಗೆ ಬಂದು ಇಲ್ಲಿ ತಮ್ಮ ಭವಿಷ್ಯವನ್ನು ರೂಪಿಸಿಕೊಳ್ಳಲು ಬಯಸುವ ಪ್ರತಿಯೊಬ್ಬರೂ ನಮ್ಮ ಭಾಷೆಯನ್ನು ಕಲಿಯುವುದು, ನಮ್ಮ ಸಂಸ್ಕೃತಿಯನ್ನು ಅರ್ಥಮಾಡಿಕೊಳ್ಳುವುದು ಮತ್ತು ನಮ್ಮ ನಿಯಮಗಳನ್ನು ಗೌರವಿಸುವುದು ಅತ್ಯಗತ್ಯ. ಅವರನ್ನು ಸ್ವಾಗತಿಸಲು ಇದೇ ಸರಿಯಾದ ಮಾರ್ಗ. ಇದೇ ಕಾರಣಕ್ಕಾಗಿ, ಪ್ರತಿ ತರಗತಿಯಲ್ಲಿನ ವಿದೇಶಿ ವಿದ್ಯಾರ್ಥಿಗಳ ಸಂಖ್ಯೆಗೆ ಕಾನೂನುಬದ್ಧವಾಗಿ ಗರಿಷ್ಠ ಮಿತಿಯನ್ನು ವಿಧಿಸುವ ಪ್ರಸ್ತಾವನೆಯನ್ನು ಸಚಿವರ ಮಂಡಳಿಯ ಮುಂದೆ ಮಂಡಿಸಲಾಗುತ್ತಿದೆ. ಜೊತೆಗೆ, ಶಾಲಾ ವ್ಯವಸ್ಥೆಯೊಂದಿಗೆ ಹೊಂದಿಕೊಳ್ಳಲು ಕಷ್ಟಪಡುವ ವಿದೇಶಿ ವಿದ್ಯಾರ್ಥಿಗಳ ಪೋಷಕರು ಇಟಾಲಿಯನ್ ಭಾಷೆಯನ್ನು ಕಲಿಯುವುದನ್ನು ಈ ಪ್ರಸ್ತಾವನೆಯು ಕಡ್ಡಾಯಗೊಳಿಸುತ್ತದೆ ಮತ್ತು ಶಾಲೆಗಳಲ್ಲಿ ಬುರ್ಖಾ ಹಾಗೂ ನಿಕಾಬ್ ಧರಿಸುವುದನ್ನು ನಿಷೇಧಿಸುತ್ತದೆ. ನೀವು ಇದನ್ನು ಒಪ್ಪುತ್ತೀರಿ ಎಂದು ನಾನು ಭಾವಿಸುತ್ತೇನೆ; ಏಕೆಂದರೆ ನೀವು ಮುಖವನ್ನು ಮುಚ್ಚಿಕೊಳ್ಳದೆ ಶಾಲೆಗೆ ಹೋಗುತ್ತೀರಿ ಮತ್ತು ಇಟಲಿಯಲ್ಲಿ, ನೈಜ ಅಥವಾ ಕಲ್ಪಿತ ಸಂಪ್ರದಾಯದ ಹೆಸರಿನಲ್ಲಿ ಯುವತಿಯೊಬ್ಬಳು ತನ್ನನ್ನು ತಾನು ಮರೆಮಾಚಿಕೊಂಡು ಇರಬೇಕೆಂದು ಯಾರೂ ನಿರ್ಧರಿಸುವಂತಿಲ್ಲ” ಎಂದು ಹೇಳಿದ್ದಾರೆ.

ಮುಂದಿನ ವರ್ಷ ಇಟಲಿಯಲ್ಲಿ ಚುನಾವಣೆ

ಇಟಲಿಯು ತನ್ನ ಮುಂದಿನ ಸಾರ್ವತ್ರಿಕ ಚುನಾವಣೆಯನ್ನು 2027ರಲ್ಲಿ ನಡೆಸಲು ನಿರ್ಧರಿಸಿದೆ. ಪ್ರಧಾನಿ ಮೆಲೋನಿ ಇತ್ತೀಚೆಗೆ ತಮ್ಮ ಸರ್ಕಾರದ ಸುದೀರ್ಘ ಅವಧಿಯನ್ನು ಪೂರೈಸಿದ ಮೈಲಿಗಲ್ಲನ್ನು ತಲುಪಿದ್ದಾರೆ; ಇದು ಎರಡನೇ ಮಹಾಯುದ್ಧದ ನಂತರ ದೇಶದಲ್ಲಿ ಅಡೆತಡೆಯಿಲ್ಲದೆ ಸುದೀರ್ಘ ಕಾಲ ಅಧಿಕಾರದಲ್ಲಿರುವ ಸರ್ಕಾರವಾಗಿದೆ.

2027ರ ಸಾರ್ವತ್ರಿಕ ಚುನಾವಣೆಗೂ ಮುನ್ನ, ತಮ್ಮ ಜನಪ್ರಿಯತೆಯನ್ನು ಕಾಯ್ದುಕೊಳ್ಳಲು ಸಹಾಯ ಮಾಡುವ ವಿಷಯಗಳತ್ತ ಮೆಲೋನಿ ಗಮನಹರಿಸುತ್ತಿದ್ದಾರೆ. ವಲಸೆ ಮತ್ತು ರಾಷ್ಟ್ರೀಯ ಗುರುತು ಯಾವಾಗಲೂ ಇಟಲಿಯಲ್ಲಿ ಪ್ರಮುಖ ಮತ್ತು ಸೂಕ್ಷ್ಮ ಚುನಾವಣಾ ವಿಷಯಗಳಾಗಿವೆ; ತಮ್ಮ ವಿರೋಧ ಪಕ್ಷಗಳು ಅಧಿಕಾರಕ್ಕೆ ಮರಳಲು ಈ ವಿಷಯಗಳನ್ನು ಬಳಸಿಕೊಳ್ಳುವುದನ್ನು ಮೆಲೋನಿ ಬಯಸುವುದಿಲ್ಲ.

ಬಲಪಂಥೀಯ ರಾಜಕೀಯ ಹಿನ್ನೆಲೆ ಹೊಂದಿರುವ ಮೆಲೋನಿ, ವಲಸೆಯ ವಿಷಯದಲ್ಲಿ ಯಾವಾಗಲೂ ಕಠಿಣ ನಿಲುವನ್ನು ಹೊಂದಿದ್ದಾರೆ. ಆದರೆ ಪ್ರಧಾನಿಯಾಗಿ ತಮ್ಮ ಅಧಿಕಾರಾವಧಿಯಲ್ಲಿ ಅವರು ರಾಜಕೀಯವಾಗಿ ಬದಲಾವಣೆ ಹೊಂದಿದ್ದಾರೆ; ರಾಷ್ಟ್ರೀಯವಾದಿ ನಿಲುವಿನಿಂದ ಯುರೋಪಿಯನ್ ಒಕ್ಕೂಟದ ರಾಜಕಾರಣಿಗಳ ನಡುವೆ ಪ್ರಮುಖ ಹಾಗೂ ಸ್ವೀಕೃತ ನಾಯಕಿಯಾಗಿ (establishment figure) ರೂಪುಗೊಂಡಿದ್ದಾರೆ.

ಆದಾಗ್ಯೂ, ಮುಂದಿನ ವರ್ಷ ನಡೆಯಲಿರುವ ಸಾರ್ವತ್ರಿಕ ಚುನಾವಣೆಗೂ ಮುನ್ನ ತಮ್ಮ ಜನಪ್ರಿಯತೆಯನ್ನು ಹೆಚ್ಚಿಸಿಕೊಳ್ಳಲು ಅವರು ಉತ್ಸುಕರಾಗಿದ್ದಾರೆ. ಈ ಗುರಿಯನ್ನು ಸಾಧಿಸುವ ನಿಟ್ಟಿನಲ್ಲಿ ಅವರು ಹಲವು ನೀತಿಗಳನ್ನು ಜಾರಿಗೆ ತರುತ್ತಿದ್ದಾರೆ; ಇದರಲ್ಲಿ ಸಣ್ಣ ಮತ್ತು ಮಧ್ಯಮ ಗಾತ್ರದ ಕಾರುಗಳು ಹಾಗೂ ಸ್ಕೂಟರ್‌ ಗಳ ಮೇಲಿನ, ಜನರಿಗೆ ಅಸಮಾಧಾನ ತಂದಿದ್ದ ಆಸ್ತಿ ತೆರಿಗೆಯಿಂದ ವಿನಾಯಿತಿ ನೀಡುವುದು ಕೂಡ ಸೇರಿದೆ.