ಜೀವನದಲ್ಲಿ ಒಮ್ಮೆಯಾದರೂ ಮಾತ್ರೆ ಸೇವಿಸುವ ಸಂದರ್ಭ ಬಹುತೇಕ ಎಲ್ಲರಿಗೂ ಬರುತ್ತದೆ. ಕೆಲವರಿಗೆ ಮಾತ್ರೆ ಸೇವಿಸುವುದು ಪ್ರತಿದಿನದ ಭಾಗವಾಗಿರುತ್ತದೆ. ಹೀಗಾಗಿ ವೈದ್ಯರು ಸೂಚಿಸಿದ ಔಷಧಿಯನ್ನು ಸರಿಯಾದ ಸಮಯದಲ್ಲಿ ಮತ್ತು ಸರಿಯಾದ ರೀತಿಯಲ್ಲಿ ತೆಗೆದುಕೊಳ್ಳುವುದು ಬಹಳ ಮುಖ್ಯ.ಹೆಚ್ಚಿನವರು ಬೆಳಗಿನ ಉಪಹಾರ, ಮಧ್ಯಾಹ್ನದ ಊಟ ಅಥವಾ ರಾತ್ರಿ ಊಟದ ಬಳಿಕ ಮಾತ್ರೆ ಸೇವಿಸುತ್ತಾರೆ. ಆದರೆ ಊಟವಾದ ತಕ್ಷಣವೇ ಮಾತ್ರೆ ತೆಗೆದುಕೊಳ್ಳಬೇಕಾ? ಅಥವಾ ಸ್ವಲ್ಪ ಸಮಯ ಕಾಯಬೇಕಾ ಎಂಬ ಗೊಂದಲ ಹಲವರಲ್ಲಿದೆ.
ಆಹಾರ ಔಷಧಿಯ ಮೇಲೆ ಪರಿಣಾಮ ಬೀರಬಹುದು
ನಾವು ಸೇವಿಸುವ ಆಹಾರವು ದೇಹದಲ್ಲಿ ಹಲವು ಬದಲಾವಣೆಗಳನ್ನು ಉಂಟುಮಾಡುತ್ತದೆ. ಜೀರ್ಣಕ್ರಿಯೆ, ಹೊಟ್ಟೆಯ ಆಮ್ಲೀಯತೆ, ಪಿತ್ತರಸದ ಉತ್ಪಾದನೆ ಸೇರಿದಂತೆ ಹಲವು ಅಂಶಗಳು ಬದಲಾಗಬಹುದು.ಇದರಿಂದ ಕೆಲವು ಔಷಧಿಗಳು ದೇಹದಲ್ಲಿ ಹೀರಿಕೊಳ್ಳುವ ರೀತಿಯ ಮೇಲೂ ಪರಿಣಾಮ ಉಂಟಾಗಬಹುದು. ಹೀಗಾಗಿ ಮಾತ್ರೆ ಸೇವಿಸುವಾಗ ಆಹಾರ ಮತ್ತು ಕೆಲವು ಪಾನೀಯಗಳ ಬಗ್ಗೆ ಕೂಡ ಗಮನ ಹರಿಸಬೇಕು.
ಎಲ್ಲ ಮಾತ್ರೆಗಳಿಗೂ ಒಂದೇ ನಿಯಮವಿಲ್ಲ
ಊಟವಾದ ಎರಡು ಗಂಟೆಗಳ ಬಳಿಕವೇ ಎಲ್ಲ ಮಾತ್ರೆಗಳನ್ನು ತೆಗೆದುಕೊಳ್ಳಬೇಕು ಎನ್ನುವುದು ಸರಿಯಾದ ನಿಯಮವಲ್ಲ. ಯಾವ ಔಷಧಿಯನ್ನು ಯಾವ ಸಮಯದಲ್ಲಿ ತೆಗೆದುಕೊಳ್ಳಬೇಕು ಎನ್ನುವುದು ಔಷಧಿಯ ಪ್ರಕಾರವನ್ನು ಅವಲಂಬಿಸಿರುತ್ತದೆ.
ಕೆಲವು ಮಾತ್ರೆಗಳನ್ನು ಖಾಲಿ ಹೊಟ್ಟೆಯಲ್ಲಿ ತೆಗೆದುಕೊಳ್ಳಬೇಕು. ಇನ್ನೂ ಕೆಲವು ಔಷಧಿಗಳನ್ನು ಊಟದೊಂದಿಗೆ ಅಥವಾ ಊಟವಾದ ಬಳಿಕ ಸೇವಿಸುವಂತೆ ವೈದ್ಯರು ಸೂಚಿಸುತ್ತಾರೆ. ಆದ್ದರಿಂದ ಮಾತ್ರೆಯ ಲೇಬಲ್ ಅಥವಾ ವೈದ್ಯರ ಸೂಚನೆಯನ್ನು ಪಾಲಿಸುವುದು ಮುಖ್ಯ.ಊಟದ ತಕ್ಷಣ ಔಷಧಿ ಸೇವಿಸುವುದರಿಂದ ಕೆಲವರಿಗೆ ಹೊಟ್ಟೆಯಲ್ಲಿ ಕಿರಿಕಿರಿ, ವಾಕರಿಕೆ ಅಥವಾ ಇತರ ಅಡ್ಡಪರಿಣಾಮಗಳು ಕಾಣಿಸಿಕೊಳ್ಳಬಹುದು. ಆದರೆ ಇದು ಎಲ್ಲ ಔಷಧಿಗಳಿಗೂ ಅನ್ವಯಿಸುವುದಿಲ್ಲ.
ವೈದ್ಯರ ಸಲಹೆಯೇ ಮುಖ್ಯ
ಯಾವುದೇ ಔಷಧಿಯನ್ನು ಸ್ವತಃ ನಿರ್ಧರಿಸಿ ಸೇವಿಸುವುದು ಅಥವಾ ಸಮಯ ಬದಲಿಸುವುದು ಸರಿಯಲ್ಲ. ವೈದ್ಯರು ಊಟದ ಬಳಿಕವೇ ಮಾತ್ರೆ ತೆಗೆದುಕೊಳ್ಳುವಂತೆ ಸೂಚಿಸಿದ್ದರೆ ಅದೇ ರೀತಿಯಲ್ಲಿ ಸೇವಿಸಬೇಕು.ಅದೇ ರೀತಿ, ಔಷಧಿಯನ್ನು ಖಾಲಿ ಹೊಟ್ಟೆಯಲ್ಲಿ ತೆಗೆದುಕೊಳ್ಳಬೇಕು ಎಂದು ಸೂಚಿಸಿದ್ದರೆ ಊಟದ ನಂತರ ಸೇವಿಸುವುದು ಔಷಧಿಯ ಪರಿಣಾಮದ ಮೇಲೆ ಪರಿಣಾಮ ಬೀರಬಹುದು.
ಮಾತ್ರೆ ಸೇವಿಸುವಾಗ ಈ ವಿಷಯ ನೆನಪಿಡಿ
ಸಾಮಾನ್ಯವಾಗಿ ಮಾತ್ರೆಯನ್ನು ಒಂದು ಗ್ಲಾಸ್ ನೀರಿನೊಂದಿಗೆ ಸೇವಿಸುವುದು ಸೂಕ್ತ.
ವೈದ್ಯರ ಸಲಹೆ ಇಲ್ಲದೆ ಮಾತ್ರೆಯನ್ನು ಮುರಿಯುವುದು, ಪುಡಿ ಮಾಡುವುದು ಅಥವಾ ಅಗಿಯುವುದು ಬೇಡ.
ಕೆಲವು ಮಾತ್ರೆಗಳಿಗೆ ವಿಶೇಷ ಲೇಪನವಿರುತ್ತದೆ. ಇಂತಹ ಮಾತ್ರೆಗಳನ್ನು ಮುರಿದರೆ ಔಷಧಿ ದೇಹದಲ್ಲಿ ಬಿಡುಗಡೆಯಾಗುವ ವಿಧಾನ ಬದಲಾಗಬಹುದು.
ಔಷಧಿಯನ್ನು ಬಿಸಿ ಪಾನೀಯದಲ್ಲಿ ಬೆರೆಸಿ ಸೇವಿಸುವ ಮೊದಲು ವೈದ್ಯರು ಅಥವಾ ಫಾರ್ಮಸಿಸ್ಟ್ ಸಲಹೆ ಪಡೆಯಿರಿ.
ಕೆಲವು ಔಷಧಿಗಳೊಂದಿಗೆ ಆಲ್ಕೋಹಾಲ್ ಸೇವಿಸುವುದು ಅಪಾಯಕಾರಿ. ಔಷಧಿ ತೆಗೆದುಕೊಳ್ಳುವಾಗ ಆಲ್ಕೋಹಾಲ್ ತಪ್ಪಿಸುವುದು ಅಥವಾ ವೈದ್ಯರ ಸಲಹೆ ಪಡೆಯುವುದು ಉತ್ತಮ.
ವಿಟಮಿನ್ಗಳು ಅಥವಾ ಇತರ ಔಷಧಿಗಳನ್ನು ನಿಮ್ಮ ಇಚ್ಛೆಯಂತೆ ಒಂದೇ ಸಮಯದಲ್ಲಿ ಸೇರಿಸಿಕೊಳ್ಳಬೇಡಿ. ವೈದ್ಯರಿಗೆ ನೀವು ಸೇವಿಸುತ್ತಿರುವ ಎಲ್ಲಾ ಔಷಧಿಗಳ ಬಗ್ಗೆ ತಿಳಿಸಿ.
ಮಾತ್ರೆ ತೆಗೆದುಕೊಳ್ಳುವ ಸಮಯ ಹೇಗೆ ತಿಳಿಯಬೇಕು?
ಮಾತ್ರೆಯ ಪ್ಯಾಕ್ ಮೇಲೆ Before food, After food, With food ಅಥವಾ Empty stomach ಎಂಬ ಸೂಚನೆಗಳಿರಬಹುದು. ಅವುಗಳನ್ನು ಗಮನಿಸಿ ಔಷಧಿ ಸೇವಿಸಬೇಕು.
ಔಷಧಿಯ ಬಗ್ಗೆ ಅನುಮಾನವಿದ್ದರೆ ವೈದ್ಯರು ಅಥವಾ ಫಾರ್ಮಸಿಸ್ಟ್ ಬಳಿ ಕೇಳಿ ತಿಳಿದುಕೊಳ್ಳುವುದು ಅತ್ಯಂತ ಸುರಕ್ಷಿತ. ನಿಮ್ಮ ಆರೋಗ್ಯ ಸ್ಥಿತಿ ಮತ್ತು ನೀವು ಸೇವಿಸುತ್ತಿರುವ ಔಷಧಿಯನ್ನು ಆಧರಿಸಿಯೇ ಸರಿಯಾದ ಸಮಯವನ್ನು ನಿರ್ಧರಿಸಬೇಕು.
