ಬೆಳಗಿನ ಉಪಹಾರಕ್ಕೆ ಹಾಗೂ ಸಂಜೆಯ ತಿಂಡಿಗೆ ಸವಿಯಲು ಪ್ರೋಟೀನ್ ಮತ್ತು ಪೋಷಕಾಂಶಗಳಿಂದ ಕೂಡಿದ ‘ಮಸಾಲೆ ಚಿಕನ್ ಎಗ್ ಬುರ್ಜಿ ಸ್ಯಾಂಡ್‌ವಿಚ್’ ಅತ್ಯುತ್ತಮ ಆಹಾರವಾಗಿದೆ. ಕೋಳಿ ಮಾಂಸ ಹಾಗೂ ಮೊಟ್ಟೆಯ ಅಪರೂಪದ ಸಂಯೋಜನೆಯಲ್ಲಿ ತಯಾರಾಗುವ ಈ ಖಾದ್ಯವು ಹೊಟ್ಟೆಯನ್ನು ದೀರ್ಘಕಾಲದವರೆಗೆ ತುಂಬಿಡುವಂತೆ ಮಾಡುತ್ತದೆ. ಮನೆಯಲ್ಲೇ ಅತ್ಯಂತ ಸರಳವಾಗಿ ಮತ್ತು ರುಚಿಕರವಾಗಿ ಈ ಸ್ಯಾಂಡ್‌ವಿಚ್ ತಯಾರಿಸುವ ವಿಧಾನ ಇಲ್ಲಿದೆ.
ಬೇಕಾಗುವ ಸಾಮಗ್ರಿಗಳು:
200 ಗ್ರಾಂ ಚಿಕನ್, 4 ಮೊಟ್ಟೆಗಳು, 1 ದೊಡ್ಡ ಈರುಳ್ಳಿ (ಸಣ್ಣಗೆ ಹೆಚ್ಚಿದ್ದು), 1 ಟೊಮೆಟೊ (ಸಣ್ಣಗೆ ಹೆಚ್ಚಿದ್ದು), 2 ಹಸಿಮೆಣಸಿನಕಾಯಿ, 2 ಚಮಚ ಅರಶಿನ ಪುಡಿ, 2 ಚಮಚ ಜೀರಿಗೆ ಪುಡಿ, 2 ಚಮಚ ಧನಿಯಾ ಪುಡಿ, 2 ಚಮಚ ಅಚ್ಚಖಾರದ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು, ಅಗತ್ಯಕ್ಕೆ ತಕ್ಕಷ್ಟು ಎಣ್ಣೆ ಹಾಗೂ ಬೆಣ್ಣೆ, ಅರ್ಧ ಕಪ್ ಮಯೋನೈಸ್ ಮತ್ತು 6 ಬ್ರೆಡ್ ಸ್ಲೈಸ್‌ಗಳು.
ತಯಾರಿಸುವ ವಿಧಾನ:
ಮೊದಲಿಗೆ ಚಿಕನ್ ಅನ್ನು ಚೆನ್ನಾಗಿ ತೊಳೆದು, ಪ್ರೆಶರ್ ಕುಕ್ಕರ್‌ನಲ್ಲಿ ಸ್ವಲ್ಪ ನೀರು ಮತ್ತು ಉಪ್ಪು ಸೇರಿಸಿ ಮೆದುವಾಗುವವರೆಗೆ ಬೇಯಿಸಿಕೊಳ್ಳಿ. ಚಿಕನ್ ಆರಿದ ನಂತರ, ಎರಡು ಫೋರ್ಕ್ ಬಳಸಿ ಮೂಳೆಗಳನ್ನು ಬೇರ್ಪಡಿಸಿ ಮಾಂಸವನ್ನು ಸಣ್ಣ ಚೂರುಗಳಾಗಿ (ಶ್ರೆಡ್) ಮಾಡಿ ಪಕ್ಕಕ್ಕೆ ಇಡಿ.
ಮತ್ತೊಂದು ಪಾತ್ರೆಯಲ್ಲಿ ಮೊಟ್ಟೆಗಳನ್ನು ಒಡೆದು ಹಾಕಿ, ಅದಕ್ಕೆ ಅರಶಿನ, ಉಪ್ಪು, ಧನಿಯಾ ಪುಡಿ, ಜೀರಿಗೆ ಪುಡಿ ಹಾಗೂ ಅಚ್ಚಖಾರದ ಪುಡಿ ಸೇರಿಸಿ ಚೆನ್ನಾಗಿ ಕಲಸಿ. ಈಗ ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಕಾಯಿಸಿ, ಹೆಚ್ಚಿದ ಈರುಳ್ಳಿ ಮತ್ತು ಹಸಿಮೆಣಸಿನಕಾಯಿ ಹಾಕಿ ಈರುಳ್ಳಿ ಹೊಂಬಣ್ಣಕ್ಕೆ ಬರುವವರೆಗೆ ಹುರಿಯಿರಿ. ನಂತರ ಟೊಮೆಟೊ ಸೇರಿಸಿ ಮೃದುವಾಗುವವರೆಗೆ ಬೇಯಿಸಿ.
ಈಗ ಉರಿಯನ್ನು ಕಡಿಮೆ ಮಾಡಿ, ಕಲಸಿಟ್ಟ ಮೊಟ್ಟೆಯ ಮಿಶ್ರಣವನ್ನು ಬಾಣಲೆಗೆ ಸುರಿದು ನಿರಂತರವಾಗಿ ಕೈಯಾಡಿಸುತ್ತಾ ಬುರ್ಜಿ (ಸ್ಕ್ರ್ಯಾಂಬಲ್) ತಯಾರಿಸಿ. ಮೊಟ್ಟೆ ಅರ್ಧ ಬೆಂದಾಗ ಅದಕ್ಕೆ ಬೇಯಿಸಿಟ್ಟ ಚಿಕನ್ ಚೂರುಗಳನ್ನು ಸೇರಿಸಿ ಚೆನ್ನಾಗಿ ಬೆರೆಸಿ. ಮಿಶ್ರಣವು ಸಂಪೂರ್ಣವಾಗಿ ಬೆಂದ ನಂತರ, ಸ್ಯಾಂಡ್‌ವಿಚ್‌ನಲ್ಲಿ ತುಂಬಲು ಅನುಕೂಲವಾಗುವಂತೆ ಸಣ್ಣ ತುಂಡುಗಳಾಗಿ ಮಾಡಿ ಇಳಿಸಿಕೊಳ್ಳಿ.
ಬ್ರೆಡ್ ಸ್ಲೈಸ್‌ಗಳ ಎರಡೂ ಬದಿಗೆ ಬೆಣ್ಣೆ ಹಚ್ಚಿ ಹಗುರವಾಗಿ ಟೋಸ್ಟ್ ಮಾಡಿಕೊಳ್ಳಿ. ಒಂದು ಬ್ರೆಡ್ ಸ್ಲೈಸ್ ಮೇಲೆ ಮಯೋನೈಸ್ ಹಚ್ಚಿ, ಅದರ ಮೇಲೆ ತಯಾರಿಸಿದ ಚಿಕನ್ ಎಗ್ ಬುರ್ಜಿ ಮಿಶ್ರಣವನ್ನು ಇಡಿ. ಮತ್ತೊಂದು ಬ್ರೆಡ್ ಸ್ಲೈಸ್‌ನಿಂದ ಮುಚ್ಚಿ, ಮಧ್ಯಕ್ಕೆ ಓರೆಯಾಗಿ (ಡಯಾಗನಲ್) ಕತ್ತರಿಸಿದರೆ ಬಿಸಿಬಿಸಿಯಾದ ಮಸಾಲ ಚಿಕನ್ ಎಗ್ ಬುರ್ಜಿ ಸ್ಯಾಂಡ್‌ವಿಚ್ ಸಿದ್ಧ.
