ಕಳೆದ ಮೂರು ದಶಕಗಳಿಂದ ಸ್ಯಾಮ್ ಪೀಟರ್, ರಾಹುಲ್ ಪೀಟರ್, ಡೆನ್ನಿ ತಾರಕ್ಕನ್, ರಾಜೇಶ್ ರಾಬಿನ್ಸನ್ ಮತ್ತು ಆಂಥೋನಿ ಫ್ರಾನ್ಸಿಸ್ ಎಂಬ ವಿಭಿನ್ನ ಹೆಸರುಗಳಲ್ಲಿ ಗುರುತಿಸಿಕೊಂಡು ಲಕ್ಷಾಂತರ ರೂಪಾಯಿ ವಂಚಿಸುತ್ತಿದ್ದ 64 ವರ್ಷದ ಸ್ಯಾಮ್ ಆಂಥೋನಿ ಅಲಿಯಾಸ್ ಸ್ಯಾಮ್ ಪೀಟರ್ ಎಂಬ ಖದೀಮನನ್ನು ಕೊನೆಗೂ ಮಂಗಳೂರು ನಗರ ಪೊಲೀಸರು ಕೇರಳದ ಕಣ್ಣೂರಿನಲ್ಲಿ ಬಂಧಿಸಿದ್ದಾರೆ. ಕೇಂದ್ರ ತನಿಖಾ ಸಂಸ್ಥೆಗಳ ಅಧಿಕಾರಿ ಎಂದು ಹೇಳಿಕೊಂಡು ಕೋಟ್ಯಂತರ ರೂಪಾಯಿ ವಂಚಿಸುತ್ತಿದ್ದ ಈತನ ಅಪರಾಧ ಜಗತ್ತಿನ ಕಥೆ ಬಾಲಿವುಡ್ನ ‘ಸ್ಪೆಷಲ್ 26’ ಸಿನಿಮಾವನ್ನೂ ಮೀರಿಸುವಂತಿದೆ.
ಕೈಯಲ್ಲಿ ನಕಲಿ ಗುರುತಿನ ಚೀಟಿಗಳು, ಪಾಸ್ಪೋರ್ಟ್ಗಳು ಹಾಗೂ ನಕಲಿ ದಾಖಲೆಗಳನ್ನು ಇಟ್ಟುಕೊಂಡು ಪ್ರಭಾವಿ ಅಧಿಕಾರಿಯಂತೆ ನಟಿಸುತ್ತಿದ್ದ ಈತನನ್ನು ಕೊನೆಗೂ 2019ರ ಹಳೆಯ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಿಸಿಬಿ ಪೊಲೀಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ವಂಚನೆಯ ಖತರ್ನಾಕ್ ಮಾದರಿ
ಕೊಲ್ಲಂನಲ್ಲಿ ಎಂಬಿಎ ಮುಗಿಸಿರುವ ಸ್ಯಾಮ್ ಆಂಥೋನಿ, ಇಂಗ್ಲಿಷ್ ಭಾಷೆಯ ಮೇಲೆ ಅಪಾರ ಪ್ರಭುತ್ವ ಹೊಂದಿದ್ದ. ಅಚ್ಚುಕಟ್ಟಾದ ಉಡುಗೆ, ಬ್ಯುಸಿನೆಸ್ಮ್ಯಾನ್ ಶೈಲಿಯ ಮಾತುಕತೆಯಿಂದ ಎದುರಿದ್ದವರನ್ನು ಕ್ಷಣಾರ್ಧದಲ್ಲಿ ನಂಬಿಸುತ್ತಿದ್ದ. ತೆರಿಗೆ ವಿವಾದ, ಬ್ಯಾಂಕ್ ವಂಚನೆ ಮತ್ತು ಕೇಂದ್ರ ತನಿಖಾ ಸಂಸ್ಥೆಗಳ ತನಿಖೆ ಎದುರಿಸುತ್ತಿದ್ದ ಶ್ರೀಮಂತ ಉದ್ಯಮಿಗಳನ್ನೇ ಈತ ಹೆಚ್ಚಾಗಿ ಗುರಿ ಮಾಡುತ್ತಿದ್ದ. ತಾವು ನ್ಯಾಷನಲ್ ಕ್ರೈಮ್ ಇನ್ವೆಸ್ಟಿಗೇಷನ್ ಬ್ಯೂರೋ ಸಂಸ್ಥೆಯ ಹಿರಿಯ ಅಧಿಕಾರಿ ಎಂದು ಪರಿಚಯಿಸಿಕೊಂಡು, ಕಾನೂನು ತೊಡಕುಗಳನ್ನು ಬಗೆಹರಿಸಿಕೊಡುವುದಾಗಿ ಹೇಳಿ ಕೋಟ್ಯಂತರ ರೂಪಾಯಿ ವಸೂಲಿ ಮಾಡುತ್ತಿದ್ದ.
2018ರಲ್ಲಿ ಮಂಗಳೂರಿನ ಉದ್ಯಮಿಯೊಬ್ಬರ ಸಹೋದರ ಕಸ್ಟಮ್ಸ್ ಪ್ರಕರಣದಲ್ಲಿ ಸಿಲುಕಿದ್ದಾಗ, ಪ್ರಕರಣ ಮುಚ್ಚಿಹಾಕಲು NCIB ಅಧಿಕಾರಿ ಎಂದು ನಂಬಿಸಿ ಬರೋಬ್ಬರಿ 1.13 ಕೋಟಿ ರೂಪಾಯಿ ಪಡcounted ಪಡೆದಿದ್ದ. ಈ ಕುರಿತು 2019ರಲ್ಲಿ ಕೋಣಾಜೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.
ಪೊಲೀಸರ ಕಣ್ಣಿಗೆ ಮಣ್ಣೆರಚಿ ಪರಾರಿಯಾಗಿದ್ದ ಗ್ಯಾಂಗ್ಸ್ಟರ್
2019ರಲ್ಲಿ ಮಂಗಳೂರಿನ ಲಾಡ್ಜ್ವೊಂದರಲ್ಲಿ ನಕಲಿ ಅಧಿಕಾರಿಯಂತೆ ಉಳಿದುಕೊಂಡಿದ್ದಾಗ ಪೊಲೀಸರು ಈತನನ್ನು ಮೊದಲ ಬಾರಿಗೆ ಬಂಧಿಸಿದ್ದರು. ಆಗ ಈತನ ಬಳಿಯಿಂದ ಬಂದೂಕುಗಳು, ನಕಲಿ ಗುರುತಿನ ಚೀಟಿಗಳು ಮತ್ತು ವಾಹನಗಳನ್ನು ಜಪ್ತಿ ಮಾಡಲಾಗಿತ್ತು. ನಂತರ 2023ರಲ್ಲಿ ಜಾಮೀನು ಪಡೆದು ಹೊರಬಂದ ಈತ ತಲೆಮರೆಸಿಕೊಂಡಿದ್ದ. ಮೊಬೈಲ್ ಸಿಮ್ ಕಾರ್ಡ್ ಅಥವಾ ಬ್ಯಾಂಕ್ ಖಾತೆಗಳನ್ನು ತನ್ನ ಹೆಸರಿನಲ್ಲಿ ಬಳಸದೆ ಪೊಲೀಸರಿಗೆ ಸಿಗದಂತೆ ಎಚ್ಚರ ವಹಿಸುತ್ತಿದ್ದ.
ಇತ್ತೀಚೆಗೆ ಕೇರಳದ ರಾಜಕಾರಣಿಯೊಬ್ಬರ ಜೊತೆ ನಿಕಟ ಸಂಪರ್ಕ ಹೊಂದಿದ್ದ ಈತ, ‘ಡೆನಿಯಲ್ ತಾರಕ್ಕನ್’ ಎಂಬ ಹೆಸರಿನಲ್ಲಿ ಮಾಧ್ಯಮ ಕಾರ್ಯಕ್ರಮವೊಂದಕ್ಕೆ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದ. ಈ ಫೋಟೋಗಳ ಆಧಾರದ ಮೇಲೆ ಕಾರ್ಯಾಚರಣೆ ನಡೆಸಿದ ಮಂಗಳೂರು ಸಿಸಿಬಿ ಪೊಲೀಸರು ಕೊನೆಗೂ ಈತನನ್ನು ಕಣ್ಣೂರಿನಲ್ಲಿ ಬಂಧಿಸಿದ್ದಾರೆ.
ಪ್ರಸ್ತುತ ಈತನ ವಿರುದ್ಧ ದೇಶಾದ್ಯಂತ 17ಕ್ಕೂ ಹೆಚ್ಚು ಪ್ರಕರಣಗಳು ಪತ್ತೆಯಾಗಿದ್ದು, ಇಂಟರ್ಪೋಲ್ ರೆಡ್ ಕಾರ್ನರ್ ನೋಟಿಸ್ ಕೂಡ ಜಾರಿಯಾಗಿತ್ತು. 1997ರಿಂದ ಅಪರಾಧ ಕೃತ್ಯಗಳಲ್ಲಿ ತೊಡಗಿಸಿಕೊಂಡಿದ್ದ ಈ ಕುಖ್ಯಾತ ವಂಚಕನ ಪೂರ್ಣ ಚರಿತ್ರೆಯನ್ನು ಪೊಲೀಸರು ಕಲೆಹಾಕುತ್ತಿದ್ದಾರೆ.
