ಕಚೇರಿಗೆ ಅಥವಾ ಶಾಲೆಗೆ ದಿನನಿತ್ಯ ಕೊಂಡೊಯ್ಯುವ ಲಂಚ್ ಬಾಕ್ಸ್‌ಗಳನ್ನು ಸರಿಯಾಗಿ ತೊಳೆಯದಿದ್ದರೆ ಅವುಗಳಲ್ಲಿ ಬ್ಯಾಕ್ಟೀರಿಯಾಗಳು ಬೆಳೆದು, ದುರ್ವಾಸನೆ ಹಾಗೂ ಕಲೆಗಳು ಉಂಟಾಗುತ್ತವೆ. ಸರಳವಾಗಿ ನೀರಿನಲ್ಲಿ ತೊಳೆದರೆ ಮೇಲ್ನೋಟದ ಕೊಳಕು ಹೋಗಬಹುದಾದರೂ, ಅವುಗಳನ್ನು ಸಂಪೂರ್ಣವಾಗಿ ಸೋಂಕುರಹಿತ ಹಾಗೂ ದುರ್ವಾಸನೆ ರಹಿತವಾಗಿಡಲು ಆಳವಾದ ಸ್ವಚ್ಛತೆ (Deep Cleaning) ಅತ್ಯಗತ್ಯ. ವಿಭಿನ್ನ ಮಾದರಿಯ ಲಂಚ್ ಬಾಕ್ಸ್‌ಗಳನ್ನು ಸುಲಭವಾಗಿ ಕ್ಲೀನ್ ಮಾಡುವ ವಿಧಾನಗಳು ಇಲ್ಲಿವೆ:
ಎಲ್ಲಾ ಮಾದರಿಯ ಲಂಚ್ ಬಾಕ್ಸ್‌ಗಳಿಗೆ ಸಾಮಾನ್ಯ ಸಲಹೆಗಳು:
-
ತಕ್ಷಣವೇ ತೊಳೆಯಿರಿ: ಊಟವಾದ ತಕ್ಷಣ ಡಬ್ಬಿಯಲ್ಲಿರುವ ಆಹಾರದಳಿಕೆಗಳನ್ನು ತೆಗೆದು, ಬಿಸಿ ನೀರು ಮತ್ತು ಪಾತ್ರೆ ತೊಳೆಯುವ ಸೋಪ್‌ನಿಂದ ತೊಳೆಯಬೇಕು.
-
ಬೆಕಿಂಗ್ ಸೋಡಾ ಬಳಸಿ: ಯಾವುದೇ ಲಂಚ್ ಬಾಕ್ಸ್‌ನಿಂದ ಕೆಟ್ಟ ವಾಸನೆ ಬರುತ್ತಿದ್ದರೆ, ಸ್ವಲ್ಪ ಬೇಕಿಂಗ್ ಸೋಡಾ ಮತ್ತು ಬಿಸಿ ನೀರು ಹಾಕಿ 15 ರಿಂದ 20 ನಿಮಿಷ ಇಟ್ಟು ನಂತರ ತೊಳೆದರೆ ದುರ್ವಾಸನೆ ಮಾಯವಾಗುತ್ತದೆ.
-
ಮುಚ್ಚಳದ ಗ್ಯಾಸ್ಕೆಟ್ ಗಮನಿಸಿ: ಲಂಚ್ ಬಾಕ್ಸ್ ಮುಚ್ಚಳದ ಮೂಲೆಗಳು ಹಾಗೂ ಸಿಲಿಕಾನ್ ರಬ್ಬರ್‌‌ಗಳಲ್ಲಿ ಆಹಾರದ ಎಣ್ಣೆಯಂಶ ಕುಳಿತಿರುತ್ತದೆ. ಇದನ್ನು ಹಳೆಯ ಟೂತ್ ಬ್ರಷ್ ಬಳಸಿ ಸರಿಯಾಗಿ ಸ್ವಚ್ಛಗೊಳಿಸಬೇಕು.
ಪ್ಲಾಸ್ಟಿಕ್ ಲಂಚ್ ಬಾಕ್ಸ್ ಸ್ವಚ್ಛಗೊಳಿಸುವ ವಿಧಾನ: ಪ್ಲಾಸ್ಟಿಕ್ ಡಬ್ಬಿಗಳು ಸುಲಭವಾಗಿ ಎಣ್ಣೆ ಜಿಡ್ಡು ಹಾಗೂ ಸಾಂಬಾರ್ ಕಲೆಗಳನ್ನು ಹೀರಿಕೊಳ್ಳುತ್ತವೆ. ಕಠಿಣ ಕಲೆಗಳಿದ್ದರೆ ಬೇಕಿಂಗ್ ಸೋಡಾಕ್ಕೆ ಸ್ವಲ್ಪ ನೀರು ಬೆರೆಸಿ ಪೇಸ್ಟ್ ಮಾಡಿ ಕಲೆಗಳಿದ್ದ ಜಾಗಕ್ಕೆ ಹಚ್ಚಿ ಉಜ್ಜಬೇಕು. ದುರ್ವಾಸನೆ ಹೋಗಲಾಡಿಸಲು ಉಗುರುಬೆಚ್ಚಗಿನ ನೀರಿಗೆ ಸ್ವಲ್ಪ ವೈಟ್ ವಿನೆಗರ್ ಹಾಕಿ 20 ನಿಮಿಷ ನೆನೆಸಿಟ್ಟು ನಂತರ ತೊಳೆಯಬೇಕು.
ಸ್ಟೀಲ್ ಲಂಚ್ ಬಾಕ್ಸ್ ಸ್ವಚ್ಛಗೊಳಿಸುವ ವಿಧಾನ: ಸ್ಟೀಲ್ ಡಬ್ಬಿಗಳಿಗೆ ಜಿಡ್ಡಿನ ಕಲೆಗಳಾಗಿದ್ದರೆ ಬೇಕಿಂಗ್ ಸೋಡಾ ಬಳಸಿ ತೊಳೆಯಬಹುದು. ನೀರಿನ ಕಲೆಗಳು ಹಾಗೆಯೇ ಉಳಿದಿದ್ದರೆ, ಸ್ವಲ್ಪ ವಿನೆಗರ್‌ನಿಂದ ಒರೆಸಿ ನಂತರ ನೀರಿನಿಂದ ತೊಳೆಯಬೇಕು. ತೊಳೆದ ತಕ್ಷಣ ಒಣ ಬಟ್ಟೆಯಿಂದ ಒರೆಸಿದರೆ ನೀರಿನ ಕಲೆಗಳು ಬೀಳುವುದಿಲ್ಲ.
ಗ್ಲಾಸ್ (ಗಾಜಿನ) ಲಂಚ್ ಬಾಕ್ಸ್ ಸ್ವಚ್ಛಗೊಳಿಸುವ ವಿಧಾನ: ಗಾಜಿನ ಡಬ್ಬಿಗಳನ್ನು ತೊಳೆಯುವ ಮುನ್ನ ಕೆಲವು ನಿಮಿಷ ಬಿಸಿ ಸೋಪ್ ನೀರಿನಲ್ಲಿ ನೆನೆಸಬೇಕು. ಗೀರುಗಳು ಬೀಳದಂತೆ ಮೆದುವಾದ ಸ್ಪಾಂಜ್ ಬಳಸಿ ತೊಳೆಯುವುದು ಸೂಕ್ತ. ಸಂಪೂರ್ಣವಾಗಿ ಒಣಗಿದ ನಂತರವೇ ಮುಚ್ಚಳವನ್ನು ಮುಚ್ಚಿ ಎತ್ತಿಡಬೇಕು.
ಯಾವುದೇ ಲಂಚ್ ಬಾಕ್ಸ್ ತೊಳೆದ ನಂತರ ತೇವಾಂಶ ಸಂಪೂರ್ಣವಾಗಿ ಹೋಗುವವರೆಗೆ ಗಾಳಿಯಲ್ಲಿ ಒಣಗಲು ಬಿಡಬೇಕು. ತೇವಾಂಶವಿದ್ದಾಗಲೇ ಮುಚ್ಚಳ ಮುಚ್ಚಿಟ್ಟರೆ ಶಿಲೀಂಧ್ರ (Mould) ಹಾಗೂ ದುರ್ವಾಸನೆ ಉಂಟಾಗುವ ಸಾಧ್ಯತೆ ಹೆಚ್ಚಿರುತ್ತದೆ.
