ಸಂಜಯ್ ಲೀಲಾ ಭನ್ಸಾಲಿ ನಿರ್ದೇಶನದ ಬಹುನಿರೀಕ್ಷಿತ ‘ಲವ್ ಅಂಡ್ ವಾರ್’ ಸಿನಿಮಾದಿಂದ ನಟ ರಣ್‌ಬೀರ್ ಕಪೂರ್ ಅವರ ರಗಡ್ ಲುಕ್ ಹೊರಬಿದ್ದ ಬೆನ್ನಲ್ಲೇ, ಈಗ ನಟಿ ಆಲಿಯಾ ಭಟ್ ಅವರ ಮೊದಲ ನೋಟ ಕೂಡ ಅನಾವರಣಗೊಂಡಿದೆ. ಭನ್ಸಾಲಿ ಪ್ರೊಡಕ್ಷನ್ಸ್ ಸಂಸ್ಥೆಯು ಶುಕ್ರವಾರ ಆಲಿಯಾ ಭಟ್ ಅವರ ಪೋಸ್ಟರ್ ಅನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದು, ಸಿನಿಕಲಾರಲ್ಲಿ ಭಾರಿ ಕುತೂಹಲ ಮೂಡಿಸಿದೆ.
ಈ ಪೋಸ್ಟರ್‌ನಲ್ಲಿ ಆಲಿಯಾ ಭಟ್ ರೆಟ್ರೋ ಶೈಲಿಯ ಕ್ಯಾಬರೆ ಡ್ಯಾನ್ಸರ್ ರೂಪದಲ್ಲಿ ಕಂಗೊಳಿಸುತ್ತಿದ್ದಾರೆ. ಕೆಂಪು ಬಣ್ಣದ ಹೊಳೆಯುವ ಉಡುಪು ಹಾಗೂ ತಲೆಗೆ ಧರಿಸಿರುವ ಗರಿಗಳ ವಿನ್ಯಾಸದ ಆಭರಣ ಅವರ ಗ್ಲಾಮರಸ್ ಲುಕ್‌ಗೆ ಮತ್ತಷ್ಟು ಮೆರುಗು ನೀಡಿದೆ. ಸ್ವತಃ ಆಲಿಯಾ ಭಟ್ ಕೂಡ ಈ ಚಿತ್ರವನ್ನು ಭನ್ಸಾಲಿ ಅತ್ಯಂತ ಅಚ್ಚುಕಟ್ಟಾಗಿ ರೂಪಿಸಿದ್ದಾರೆ ಎಂದು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.
ಇದಕ್ಕೂ ಮುನ್ನ ಬಿಡುಗಡೆಯಾಗಿದ್ದ ರಣ್‌ಬೀರ್ ಕಪೂರ್ ಅವರ ಲುಕ್‌ನಲ್ಲಿ, ಅವರು ರಕ್ತಸಿಕ್ತ ಮುಖ ಹಾಗೂ ಗಾಯಗೊಂಡ ಕೈಯೊಂದಿಗೆ ಕಾರಿನಲ್ಲಿ ಕುಳಿತಿರುವ ವಿಂಟೇಜ್ ಅವತಾರದಲ್ಲಿ ಕಾಣಿಸಿಕೊಂಡಿದ್ದರು. ಈ ಚಿತ್ರದಲ್ಲಿ ರಣ್‌ಬೀರ್, ಆಲಿಯಾ ಜೊತೆಗೆ ವಿಕ್ಕಿ ಕೌಶಲ್ ಕೂಡ ಪ್ರಮುಖ ಪಾತ್ರದಲ್ಲಿದ್ದಾರೆ. ‘ಬ್ರಹ್ಮಾಸ್ತ್ರ’ ನಂತರ ರಣ್‌ಬೀರ್-ಆಲಿಯಾ, ‘ರಾಜಿ’ ನಂತರ ಆಲಿಯಾ-ವಿಕ್ಕಿ ಹಾಗೂ ‘ಸಂಜು’ ನಂತರ ರಣ್‌ಬೀರ್-ವಿಕ್ಕಿ ಕಾಂಬಿನೇಷನ್ ಮತ್ತೆ ಒಂದಾಗುತ್ತಿರುವುದು ಈ ಸಿನಿಮಾದ ಮೇಲಿನ ನಿರೀಕ್ಷೆಯನ್ನು ದ್ವಿಗುಣಗೊಳಿಸಿದೆ.
‘ಸಾವರಿಯಾ’ ಹಾಗೂ ‘ಗಂಗೂಬಾಯಿ ಕಾಠಿಯಾವಾಡಿ’ ಚಿತ್ರಗಳ ನಂತರ ರಣ್‌ಬೀರ್ ಮತ್ತು ಆಲಿಯಾ ಅವರಿಗೆ ಭನ್ಸಾಲಿ ಜೊತೆ ಇದು ಎರಡನೇ ಸಿನಿಮಾವಾಗಿದೆ. ಈ ಬಹುಭಾಷಾ ಚಿತ್ರವು ಕನ್ನಡ, ತೆಲುಗು, ತಮಿಳು ಮತ್ತು ಹಿಂದಿ ಭಾಷೆಗಳಲ್ಲಿ 2027 ರ ಜನವರಿ 21 ರಂದು ಜಾಗತಿಕವಾಗಿ ತೆರೆಗೆ ಬರಲಿದೆ.
