ಇತ್ತೀಚಿನ ದಿನಗಳಲ್ಲಿ ತೂಕ ಇಳಿಸುವ ಔಷಧಿಗಳು ಹಾಗೂ ಇಂಜೆಕ್ಷನ್‌ಗಳ ಬಳಕೆ ಹೆಚ್ಚಾಗುತ್ತಿದ್ದು, ಅತಿ ಕಡಿಮೆ ಅವಧಿಯಲ್ಲಿ ದಪ್ಪಗಿದ್ದವರು ಸಣ್ಣಗಾಗುವ ಟ್ರೆಂಡ್ ಜೋರಾಗಿದೆ. ಕಣ್ಣಿಗೆ ಕಾಣುವ ಈ ತ್ವರಿತ ಬದಲಾವಣೆಗಳು ಆಕರ್ಷಕವಾಗಿ ಕಂಡರೂ, ಇಷ್ಟು ವೇಗವಾಗಿ ತೂಕ ಕಡಿಮೆಯಾದಾಗ ದೇಹದ ಒಳಗಡೆ ಏನಾಗುತ್ತದೆ ಮತ್ತು ನಮ್ಮ ಅಂಗಾಂಗಗಳು ಇದಕ್ಕೆ ಹೇಗೆ ಪ್ರತಿಕ್ರಿಯಿಸುತ್ತವೆ ಎಂಬ ಆತಂಕಕಾರಿ ವಿಷಯದ ಬಗ್ಗೆ ತಜ್ಞರು ಕೆಲವು ಪ್ರಮುಖ ಎಚ್ಚರಿಕೆಗಳನ್ನು ನೀಡಿದ್ದಾರೆ.
ನಾವು ಕೇವಲ ಕೊಬ್ಬು ಕರಗುತ್ತಿದೆ ಎಂದುಕೊಂಡರೆ ಅದು ತಪ್ಪು. ತೂಕ ಇಳಿಯುವ ಪ್ರಕ್ರಿಯೆಯಲ್ಲಿ ದೇಹವು ತನ್ನ ಹಾರ್ಮೋನ್‌ಗಳು, ಶಕ್ತಿ ಮತ್ತು ಚಯಾಪಚಯ ಕ್ರಿಯೆಯನ್ನು ತಕ್ಷಣವೇ ಬದಲಾಯಿಸಿಕೊಳ್ಳಬೇಕಾಗುತ್ತದೆ. ಹೀಗಾಗಿ ಹೊರಗಿನ ಬದಲಾವಣೆಗೂ ಒಳಗಿನ ಆರೋಗ್ಯಕ್ಕೂ ದೊಡ್ಡ ವ್ಯತ್ಯಾಸವಿರುತ್ತದೆ. ತೂಕ ಇಳಿಸುವ ಮಾತ್ರೆಗಳು ಅಥವಾ ಇಂಜೆಕ್ಷನ್‌ಗಳ ಮೂಲಕ ತೂಕ ಕಡಿಮೆ ಮಾಡಿಕೊಂಡಾಗ ಶರೀರವು ಕೇವಲ ತೆಳ್ಳಗಾಗುತ್ತದೆಯೇ ಹೊರತು ಆಂತರಿಕ ಆರೋಗ್ಯ ಸುಧಾರಿಸುವುದಿಲ್ಲ ಎಂದು ವೈದ್ಯರು ಸ್ಪಷ್ಟಪಡಿಸಿದ್ದಾರೆ.
ಹಾರ್ಮೋನ್ ಸಮತೋಲನದಲ್ಲಿ ಏರುಪೇರು
ನಮ್ಮ ದೇಹದಲ್ಲಿರುವ ಕೊಬ್ಬಿನಂಶವು ಕೇವಲ ಬೊಜ್ಜು ಮಾತ್ರವಲ್ಲ, ಅದು ಹಾರ್ಮೋನ್‌ಗಳನ್ನು ನಿಯಂತ್ರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಹಸಿವು ಮತ್ತು ಸಂತಾನೋತ್ಪತ್ತಿ ಪ್ರಕ್ರಿಯೆಯನ್ನು ಇದು ನಿಯಂತ್ರಿಸುತ್ತದೆ. ದಿಢೀರನೆ ತೂಕ ಇಳಿಸಿಕೊಂಡಾಗ ಲೆಪ್ಟಿನ್, ಕಾರ್ಟಿಸೋಲ್ ಮತ್ತು ಈಸ್ಟ್ರೋಜನ್ ನಂತಹ ಹಾರ್ಮೋನ್‌ಗಳ ಸಮತೋಲನ ತಪ್ಪುತ್ತದೆ. ಆರಂಭದಲ್ಲಿ ಇದು ತಿಳಿಯದಿದ್ದರೂ, ದಿನಕಳೆದಂತೆ ಅತಿಯಾದ ಹಸಿವು, ಸುಸ್ತು, ಮೂಡ್ ಸ್ವಿಂಗ್ಸ್, ನಿದ್ದೆಯ ಕೊರತೆ ಮತ್ತು ಮಹಿಳೆಯರಲ್ಲಿ ಮುಟ್ಟಿನ ಸಮಸ್ಯೆಗಳು ಕಾಣಿಸಿಕೊಳ್ಳಲಾರಂಭಿಸುತ್ತವೆ.
ದೇಹದ ತೂಕ ವೇಗವಾಗಿ ಇಳಿದಾಗ ಸ್ನಾಯುಗಳ ನಷ್ಟ ಉಂಟಾಗುತ್ತದೆ ಹಾಗೂ ಪೌಷ್ಟಿಕಾಂಶದ ಕೊರತೆ ಎದುರಾಗುತ್ತದೆ. ಇದರೊಂದಿಗೆ ದೇಹದ ಚಯಾಪಚಯ ಕ್ರಿಯೆಯ ದರ ಕುಂಠಿತಗೊಂಡು, ಭವಿಷ್ಯದಲ್ಲಿ ತೂಕವನ್ನು ನಿಯಂತ್ರಣದಲ್ಲಿಡುವುದು ಅತ್ಯಂತ ಕಷ್ಟಕರವಾಗುತ್ತದೆ.
ಮಾನಸಿಕ ಸ್ಥಿರತೆಯೂ ಮುಖ್ಯ
ಕೇವಲ ದೈಹಿಕವಾಗಿ ತೂಕ ಇಳಿಸಿಕೊಳ್ಳುವುದು ಯಶಸ್ಸಲ್ಲ, ಅದರೊಂದಿಗೆ ಮಾನಸಿಕ ಮತ್ತು ಭಾವನಾತ್ಮಕ ಸಮತೋಲನವೂ ಮುಖ್ಯ ಎಂದು ಆರೋಗ್ಯ ತಜ್ಞರು ಅಭಿಪ್ರಾಯಪಡುತ್ತಾರೆ. ಮಾನಸಿಕವಾಗಿ ಸಿದ್ಧರಾಗದೆ ಕೇವಲ ಔಷಧಿಗಳ ಮೂಲಕ ತೂಕ ಇಳಿಸಿಕೊಂಡಾಗ, ಆರಂಭದ ಉತ್ಸಾಹ ಕಡಿಮೆಯಾದ ತಕ್ಷಣ ಮತ್ತೆ ಹತಾಶೆ ಮೂಡುತ್ತದೆ. ವ್ಯಾಯಾಮ ಮಾಡುವುದು ಒಂದು ಒತ್ತಡದಂತೆ ಭಾಸವಾಗತೊಡಗುತ್ತದೆ. ಆದ್ದರಿಂದ ನಿಧಾನಗತಿಯ ಮತ್ತು ನೈಸರ್ಗಿಕವಾದ ತೂಕ ಇಳಿಕೆಯೇ ದೀರ್ಘಕಾಲದ ಆರೋಗ್ಯಕ್ಕೆ ಮತ್ತು ಸ್ನಾಯುಗಳ ಬಲಕ್ಕೆ ಉತ್ತಮ ಎಂದು ವೈದ್ಯರು ಸಲಹೆ ನೀಡಿದ್ದಾರೆ.
