ಬಿಹಾರದ ಮಾಜಿ ಮುಖ್ಯಮಂತ್ರಿ ಹಾಗೂ ಆರ್‌ಜೆಡಿ ಮುಖ್ಯಸ್ಥ ಲಾಲು ಪ್ರಸಾದ್ ಯಾದವ್ ಅವರ ಮೊಮ್ಮಗ ಆದಿತ್ಯ ಈಗ ಸುದ್ದಿಯ ಕೇಂದ್ರಬಿಂದುವಾಗಿದ್ದಾರೆ. ರಾಜಕೀಯ ಪ್ರವೇಶದಿಂದಲ್ಲ, ಆದರೆ ಸೇನಾ ತರಬೇತಿಗೆ ಕಾಲಿಟ್ಟಿರುವುದರಿಂದ ಅವರು ಗಮನ ಸೆಳೆದಿದ್ದಾರೆ.
18 ವರ್ಷದ ಆದಿತ್ಯ ಸಿಂಗಾಪುರದಲ್ಲಿ ಮೂಲ ಮಿಲಿಟರಿ ತರಬೇತಿ (BMT) ಆರಂಭಿಸಿದ್ದು, ಇದು ದೇಶಾದ್ಯಂತ ಚರ್ಚೆಗೆ ಕಾರಣವಾಗಿದೆ. ವಿಶೇಷವೆಂದರೆ, ಆದಿತ್ಯ ಭಾರತೀಯ ಸೇನೆಯಲ್ಲ, ಬದಲಾಗಿ ವಿದೇಶಿ ಸೇನೆಯನ್ನು ಸೇರುತ್ತಿದ್ದಾರೆ. ಈ ಅಚ್ಚರಿಯ ನಿರ್ಧಾರವೇ ಜನರ ಕುತೂಹಲಕ್ಕೆ ಕಾರಣವಾಗಿದೆ.
ತಾಯಿ ರೋಹಿಣಿ ಆಚಾರ್ಯ ಅವರ ಭಾವುಕ ಪೋಸ್ಟ್
ಲಾಲು ಪ್ರಸಾದ್ ಯಾದವ್ ಅವರ ಪುತ್ರಿ ರೋಹಿಣಿ ಆಚಾರ್ಯ ಅವರು ತಮ್ಮ ಮಗ ಆದಿತ್ಯ ಸೇನಾ ತರಬೇತಿಗೆ ತೆರಳಿರುವ ವಿಷಯವನ್ನು ಎಕ್ಸ್ (X) ವೇದಿಕೆಯಲ್ಲಿ ಹಂಚಿಕೊಂಡಿದ್ದಾರೆ.
“ನನ್ನ ಹಿರಿಯ ಮಗ ಆದಿತ್ಯ 18ನೇ ವಯಸ್ಸಿನಲ್ಲಿ, ಪದವಿ ಪೂರ್ವ ಶಿಕ್ಷಣ ಮುಗಿಸಿದ ನಂತರ ಎರಡು ವರ್ಷಗಳ ಮೂಲಭೂತ ಮಿಲಿಟರಿ ತರಬೇತಿಗೆ ತೆರಳಿದ್ದಾನೆ,” ಎಂದು ಅವರು ಬರೆದುಕೊಂಡಿದ್ದಾರೆ. ಶಿಸ್ತು ಮತ್ತು ಧೈರ್ಯದ ಹಾದಿಯನ್ನು ಮಗ ಆಯ್ಕೆ ಮಾಡಿಕೊಂಡಿದ್ದಾನೆ ಎಂಬುದಕ್ಕೆ ತಾವು ಹೆಮ್ಮೆಯನ್ನೂ ವ್ಯಕ್ತಪಡಿಸಿದ್ದಾರೆ.
ಆದಿತ್ಯ ರೋಹಿಣಿ ಆಚಾರ್ಯ ಹಾಗೂ ಸಮರೇಶ್ ಸಿಂಗ್ ದಂಪತಿಯ ಹಿರಿಯ ಪುತ್ರ. ಇತ್ತೀಚೆಗಷ್ಟೇ ಪ್ರೀ-ಯೂನಿವರ್ಸಿಟಿ ಶಿಕ್ಷಣ ಪೂರ್ಣಗೊಳಿಸಿರುವ ಆತ ಈಗ ಸಮವಸ್ತ್ರ ಧರಿಸಿ ಸೇನಾ ತರಬೇತಿಗೆ ಕಾಲಿಟ್ಟಿದ್ದಾನೆ.
ಮಗನ ಸಮವಸ್ತ್ರದ ಫೋಟೋವನ್ನು ಹಂಚಿಕೊಂಡ ರೋಹಿಣಿ ಆಚಾರ್ಯ, ನನ್ನ ಮಗ ನಿರ್ಭೀತ ಮತ್ತು ಶಿಸ್ತಿನ ಸಿಪಾಯಿ ಎಂದು ಬರೆದುಕೊಂಡಿದ್ದಾರೆ. ಜೊತೆಗೆ, ಇಂದು ನನ್ನ ಹೃದಯ ಹೆಮ್ಮೆಯಿಂದ ತುಂಬಿದೆ. ಕಠಿಣ ಹೋರಾಟಗಳೇ ಯೋಧರನ್ನು ರೂಪಿಸುತ್ತವೆ. ಗೆದ್ದು ಬಾ ಮಗನೇ, ಎಂದು ಭಾವುಕವಾಗಿ ಹೇಳಿದ್ದಾರೆ.
ಭಾರತೀಯ ಸೇನೆಯಲ್ಲ, ಸಿಂಗಾಪುರ ಸೇನೆಯನ್ನೇ ಸೇರಿದ್ದೇಕೆ?
ಆದಿತ್ಯ ಸಿಂಗಾಪುರ ಸೇನೆ ಸೇರಿರುವುದು ಯಾವುದೋ ಆಸಕ್ತಿಗಲ್ಲ, ಬದಲಾಗಿ ಅಲ್ಲಿನ ಕಟ್ಟುನಿಟ್ಟಾದ ಕಾನೂನಿನ ಕಾರಣಕ್ಕೆ.
ಕಡ್ಡಾಯ ರಾಷ್ಟ್ರೀಯ ಸೇವೆ (NS): ಸಿಂಗಾಪುರದ ಕಾನೂನಿನ ಪ್ರಕಾರ, ಅಲ್ಲಿನ ಪ್ರತಿಯೊಬ್ಬ ಪುರುಷ ನಾಗರಿಕ ಮತ್ತು ಎರಡನೇ ತಲೆಮಾರಿನ ಖಾಯಂ ನಿವಾಸಿಗಳು (Permanent Residents) 18 ವರ್ಷ ತುಂಬಿದ ನಂತರ ಕಡ್ಡಾಯವಾಗಿ 2 ವರ್ಷಗಳ ಕಾಲ ಸೇನೆಯಲ್ಲಿ ಸೇವೆ ಸಲ್ಲಿಸಲೇಬೇಕು.
ಇದರಲ್ಲಿ ಯಾವುದೇ ವಿನಾಯಿತಿ ಇರುವುದಿಲ್ಲ. ಒಂದು ವೇಳೆ ಈ ಸೇವೆಯಿಂದ ನುಣುಚಿಕೊಂಡರೆ ಅಂತಹವರಿಗೆ ಭಾರಿ ದಂಡ ಮತ್ತು ಜೈಲು ಶಿಕ್ಷೆಯೂ ಆಗಬಹುದು.
ಏನಿದು BMT ಮತ್ತು ಕಡ್ಡಾಯ ರಾಷ್ಟ್ರೀಯ ಸೇವೆ (NS)?
ಸಿಂಗಾಪುರದಲ್ಲಿ ನೆಲೆಸಿರುವ ಆದಿತ್ಯ ಅಲ್ಲಿನ ಸೇನೆಗೆ ಸೇರುತ್ತಿರುವುದು ಸ್ವಯಂ ಇಚ್ಛೆಯ ನಿರ್ಧಾರಕ್ಕಿಂತ ಹೆಚ್ಚು, ಅಲ್ಲಿನ ಕಾನೂನುಬದ್ಧ ವ್ಯವಸ್ಥೆಯ ಭಾಗವಾಗಿದೆ.
ಕಡ್ಡಾಯ ರಾಷ್ಟ್ರೀಯ ಸೇವೆ (NS):
ಸಿಂಗಾಪುರದ ಕಾನೂನಿನ ಪ್ರಕಾರ, 18 ವರ್ಷ ತುಂಬಿದ ಪ್ರತಿಯೊಬ್ಬ ಪುರುಷ ನಾಗರಿಕ ಹಾಗೂ ಎರಡನೇ ತಲೆಮಾರಿನ ಖಾಯಂ ನಿವಾಸಿಗಳು (Permanent Residents) ಕಡ್ಡಾಯವಾಗಿ ಎರಡು ವರ್ಷಗಳ ಕಾಲ ರಾಷ್ಟ್ರೀಯ ಸೇವೆ ಸಲ್ಲಿಸಬೇಕು. ಇದು ದೇಶರಕ್ಷಣೆ ಹಾಗೂ ಶಿಸ್ತುಬದ್ಧ ನಾಗರಿಕತೆ ನಿರ್ಮಾಣದ ಉದ್ದೇಶ ಹೊಂದಿದೆ.
BMT (Basic Military Training):
BMT ಎಂದರೆ ಮೂಲ ಮಿಲಿಟರಿ ತರಬೇತಿ. ಇದು ಸೇನಾ ಜೀವನದ ಮೊದಲ ಹಂತವಾಗಿದ್ದು, ಇಲ್ಲಿ ಯುವಕರಿಗೆ ದೈಹಿಕ ಸಾಮರ್ಥ್ಯ, ಶಿಸ್ತು, ಸಹನಶೀಲತೆ ಹಾಗೂ ನಾಯಕತ್ವದ ಗುಣಗಳನ್ನು ತರಬೇತಿಯಾಗಿ ನೀಡಲಾಗುತ್ತದೆ.
ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆ
ರೋಹಿಣಿ ಆಚಾರ್ಯ ಅವರು ತಮ್ಮ ಪೋಸ್ಟ್‌ಗೆ ಕಮೆಂಟ್ ಸೆಕ್ಷನ್ ಅನ್ನು ಆಫ್ ಮಾಡಿದ್ದಾರೆ. ಆದರೆ, ಆದಿತ್ಯ ಸೇನಾ ಸಮವಸ್ತ್ರದಲ್ಲಿ ಕಾಣಿಸಿಕೊಂಡಿರುವ ಫೋಟೋ ಹಾಗೂ ಈ ಸಂಬಂಧದ ಸುದ್ದಿ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ವೈರಲ್ ಆಗುತ್ತಿದೆ.
ಸೋಶಿಯಲ್ ಮೀಡಿಯಾದಲ್ಲಿ ಹವಾ
ರೋಹಿಣಿ ಆಚಾರ್ಯ ಅವರ ಪೋಸ್ಟ್ ವೈರಲ್ ಆಗುತ್ತಿದ್ದಂತೆಯೇ, ಅನೇಕರು ಆದಿತ್ಯ ಭಾರತೀಯ ಸೇನೆಗೆ ಸೇರಿದ್ದಾರೆ ಎಂದು ಭಾವಿಸಿದ್ದರು. ಆದರೆ ಆದಿತ್ಯ ಸಿಂಗಾಪುರ ಸೇನೆ ಸೇರಿರುವುದು ದೃಢಪಟ್ಟಿದೆ. ಆದರೂ, ಒಬ್ಬ ಪ್ರಭಾವಿ ರಾಜಕಾರಣಿಯ ಮೊಮ್ಮಗನಾಗಿದ್ದರೂ ಯಾವುದೇ ವಿನಾಯಿತಿ ಪಡೆಯದೆ ಸಾಮಾನ್ಯರಂತೆ ಕಠಿಣ ಸೇನಾ ತರಬೇತಿಗೆ ಹಾಜರಾಗಿರುವುದು ಜನರ ಮೆಚ್ಚುಗೆಗೆ ಕಾರಣವಾಗಿದೆ.
