ಮಿಸ್ ಯೂನಿವರ್ಸ್ ಇಂಡಿಯಾ 2026ರ ಗ್ರ್ಯಾಂಡ್ ಫಿನಾಲೆ ರಾಜಸ್ಥಾನದ ಜೈಪುರದಲ್ಲಿ ಅದ್ದೂರಿಯಾಗಿ ನಡೆದಿದ್ದು, ಕೇರಳದ 19 ವರ್ಷದ ಬಾಲಕಿ ಕಾಜಿಯಾ ಲಿಜ್ ಮೆಜೋ (Kaziah Liz Mejo) ‘ಮಿಸ್ ಯೂನಿವರ್ಸ್ ಇಂಡಿಯಾ 2026’ ಕಿರೀಟವನ್ನು ತಮ್ಮದಾಗಿಸಿಕೊಂಡಿದ್ದಾರೆ. ದೇಶಾದ್ಯಂತ ಆಯ್ಕೆಯಾಗಿದ್ದ 52 ಸ್ಪರ್ಧಿಗಳನ್ನು ಹಿಂದಿಕ್ಕಿ ಕಾಜಿಯಾ ಈ ಸಾಧನೆ ಮಾಡಿದ್ದಾರೆ.
ಮಾವೆಲಿಕ್ಕರ ಮೂಲದ ಕಾಜಿಯಾ ಪ್ರಸ್ತುತ ಕಾನೂನು ವಿದ್ಯಾರ್ಥಿನಿಯಾಗಿದ್ದು, ರೂಪದರ್ಶಿಯಾಗಿಯೂ ಸಕ್ರಿಯರಾಗಿದ್ದಾರೆ. ಇವರು 2025 ರ ‘ಮಿಸ್ ಟೀನ್ ಇಂಟರ್ನ್ಯಾಷನಲ್’ ಸ್ಪರ್ಧೆಯಲ್ಲೂ ಭಾರತವನ್ನು ಪ್ರತಿನಿಧಿಸಿದ್ದರು. ಈ ಗೆಲುವಿನೊಂದಿಗೆ, ನವೆಂಬರ್‌ನಲ್ಲಿ ಪೋರ್ಟೊ ರಿಕೊದಲ್ಲಿ ನಡೆಯಲಿರುವ 75 ನೇ ಜಾಗತಿಕ ‘ಮಿಸ್ ಯೂನಿವರ್ಸ್’ ಸ್ಪರ್ಧೆಯಲ್ಲಿ ಕಾಜಿಯಾ ಭಾರತದ ಧ್ವಜವನ್ನು ಎತ್ತಿಹಿಡಿಯಲಿದ್ದಾರೆ.
https://x.com/ANI_MP_CG_RJ/status/2091716871674614155
ರನ್ನರ್ ಅಪ್‌ಗಳು:
ಮೊದಲ ರನ್ನರ್ ಅಪ್: ತಮಿಳುನಾಡಿನ ವೈಷ್ಣವಿ ಗಣೇಶ್ (ಮಿಸ್ ಇಂಟರ್ನ್ಯಾಷನಲ್ ಇಂಡಿಯಾ 2026 ಪ್ರಶಸ್ತಿ).
ಎರಡನೇ ರನ್ನರ್ ಅಪ್: ಗುಜರಾತ್‌ನ ಅನುಶ್ರೀ ಸತವ್ಲೇಕರ್.
ತಾರಾಗಣದಿಂದ ಕೂಡಿದ್ದ ತೀರ್ಪುಗಾರರ ಸಮಿತಿ:
ಈ ಬಾರಿಯ ಫಿನಾಲೆಯಲ್ಲಿ ಭಾರತದ ಮೊದಲ ಮಿಸ್ ಯೂನಿವರ್ಸ್ (1994) ಸುಶ್ಮಿತಾ ಸೇನ್ ನೇತೃತ್ವದ ಉನ್ನತ ಮಟ್ಟದ ತೀರ್ಪುಗಾರರ ತಂಡವಿತ್ತು. ಸಮಿತಿಯಲ್ಲಿ ಮಾಜಿ ಮಿಸ್ ಯೂನಿವರ್ಸ್ ಇಂಡಿಯಾ ವಿಜೇತರಾದ ಸೆಲೀನಾ ಜೇಟ್ಲಿ (2001) ಮತ್ತು ಉರ್ವಶಿ ರೌಟೇಲಾ (2015) ಜೊತೆಗೆ ಮಿಸ್ ಯೂನಿವರ್ಸ್ ಇಂಡಿಯಾ 2024 ರಿಯಾ ಸಿಂಘಾ, ಚಲನಚಿತ್ರ ನಿರ್ಮಾಪಕಿ ಪ್ರಜ್ಞಾ ಕಪೂರ್, ಮಿಸ್ ಚಾರ್ಮ್ 2025 ಅನ್ನಾ ಬ್ಲಾಂಕೊ, ಉದ್ಯಮಿ ವಿಶಾ ಲಾಧಿಯಾ ಹಾಗೂ ಚರ್ಮರೋಗ ತಜ್ಞೆ ಡಾ. ಸ್ತುತಿ ಖರೆ ಶುಕ್ಲಾ ಭಾಗವಹಿಸಿದ್ದರು. ‘ಗ್ಲಾಮಾನಂದ್ ಗ್ರೂಪ್’ 2024 ರಲ್ಲಿ ಮಿಸ್ ಯೂನಿವರ್ಸ್ ಇಂಡಿಯಾ ಫ್ರಾಂಚೈಸಿಯನ್ನು ವಹಿಸಿಕೊಂಡಿದ್ದು, ಅಂದಿನಿಂದ ಪ್ರಮುಖ ರಾಷ್ಟ್ರೀಯ ಸೌಂದರ್ಯ ಸ್ಪರ್ಧೆಯನ್ನು ಯಶಸ್ವಿಯಾಗಿ ಆಯೋಜಿಸಿಕೊಂಡು ಬರುತ್ತಿದೆ.
