ಪ್ರಸಿದ್ಧ ನಟಿ ಕರಿಷ್ಮಾ ತನ್ನಾ ಹಾಗೂ ಪತಿ ವರುಣ್ ಬಂಗೇರಾ ತಮ್ಮ ಚೊಚ್ಚಲ ಗಂಡು ಮಗುವಿನ ಹೆಸರನ್ನು ಜನ್ಮಾಷ್ಟಮಿಯ ಪವಿತ್ರ ದಿನದಂದು ಜಗತ್ತಿಗೆ ಪರಿಚಯಿಸಿದ್ದಾರೆ. ಜುಲೈ 29ರ ಗುರು ಪೂರ್ಣಿಮೆಯಂದು ಗಂಡು ಮಗುವಿಗೆ ಜನ್ಮ ನೀಡಿದ್ದ ಈ ದಂಪತಿ, ಈಗ ತಮ್ಮ ಮಗನಿಗೆ ‘ವೇದ್ ತನ್ನಾ ಬಂಗೇರಾ’ ಎಂದು ನಾಮಕರಣ ಮಾಡಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ವಿಶೇಷ ಪೋಸ್ಟ್ ಹಂಚಿಕೊಂಡ ಜೋಡಿ, “ಕೃಷ್ಣನ ಆಶೀರ್ವಾದದೊಂದಿಗೆ ನಮ್ಮ ಪುಟ್ಟ ಪವಾಡವನ್ನು ಪರಿಚಯಿಸುತ್ತಿದ್ದೇವೆ. ವೇದ್ ಎಂದರೆ ಪವಿತ್ರ ಜ್ಞಾನ, ಬುದ್ಧಿವಂತಿಕೆ ಮತ್ತು ಬೆಳಕು ಎಂದರ್ಥ” ಎಂದು ಬರೆದುಕೊಂಡಿದ್ದಾರೆ. ‘ವೇದ್’ ಎಂಬ ಹೆಸರು ಸಂಸ್ಕೃತ ಮೂಲದ ಪ್ರಸಿದ್ಧ ವೇದಗಳಿಂದ ಬಂದಿದ್ದು, ಭಾರತೀಯ ಸಂಸ್ಕೃತಿ ಮತ್ತು ಆಧ್ಯಾತ್ಮಿಕತೆಗೆ ಹತ್ತಿರವಾದ ಅರ್ಥವನ್ನು ಹೊಂದಿದೆ.
2022ರಲ್ಲಿ ಉದ್ಯಮಿ ವರುಣ್ ಬಂಗೇರಾ ಅವರೊಂದಿಗೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದ ಕರಿಷ್ಮಾ, ಈ ವರ್ಷದ ಏಪ್ರಿಲ್ನಲ್ಲಿ ತಾವು ತಾಯಿಯಾಗುತ್ತಿರುವ ವಿಷಯವನ್ನು ತಿಳಿಸಿದ್ದರು. ‘ಕ್ಯೂಂಕಿ ಸಾಸ್ ಭಿ ಕಭಿ ಬಹು ಥಿ’ ಧಾರಾವಾಹಿ ಮೂಲಕ ನಟನೆಗೆ ಬಂದ ಕರಿಷ್ಮಾ, ಇತ್ತೀಚೆಗೆ ಒಟಿಟಿಯ ‘ಸ್ಕೂಪ್’ ಸರಣಿಯಲ್ಲಿ ಪತ್ರಕರ್ತೆಯ ಪಾತ್ರದಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದರು. ಶೀಘ್ರದಲ್ಲೇ ಅವರು ಖುಷಿ ಕಪೂರ್ ಜೊತೆ ‘ಮಾಮ್ 2’ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
