ಕೇರಳದ ಕಣ್ಣೂರಿನಲ್ಲಿ ನಡೆದ ಮದುವೆ ಸಮಾರಂಭವೊಂದರಲ್ಲಿ ವೈದ್ಯೆಯೊಬ್ಬರು ತಮ್ಮ ಮದುವೆಯ ಸಂಭ್ರಮದ ನಡುವೆಯೇ ಮಾನವೀಯತೆ ಮೆರೆದಿದ್ದಾರೆ. ಪನೂರ್ ಮೂಲದ ಡಾ. ಶಿರಿನ್ ಸುಬೈರ್ ಅವರು ತಮ್ಮ ವಿವಾಹ ಸಮಾರಂಭದಲ್ಲಿ ಅಸ್ವಸ್ಥರಾದ ಇಬ್ಬರು ಕ್ಯಾಟರಿಂಗ್ ಸಿಬ್ಬಂದಿಗೆ ಮದುವೆಯ ಉಡುಪಿನಲ್ಲೇ ಪ್ರಥಮ ಚಿಕಿತ್ಸೆ ನೀಡಿದ್ದಾರೆ.
ಶಿರಿನ್ ಅವರು ಡಾ. ರಿಜಾಜ್ ಅವರನ್ನು ವಿವಾಹವಾಗುತ್ತಿದ್ದ ವೇಳೆ ಕ್ಯಾಟರಿಂಗ್ ತಂಡದ ಇಬ್ಬರು ಮಹಿಳೆಯರು ಅಸ್ವಸ್ಥರಾಗಿದ್ದರು. ಒಬ್ಬರಿಗೆ ಮೂಗಿನಿಂದ ರಕ್ತಸ್ರಾವವಾಗಿದ್ದರೆ, ಮತ್ತೊಬ್ಬರಿಗೆ ತಲೆಸುತ್ತು ಕಾಣಿಸಿಕೊಂಡು ಕುಸಿಯುವಂತಾಗಿತ್ತು. ಈ ಸಮಯದಲ್ಲಿ ಸ್ಥಳದಲ್ಲಿದ್ದವರು ವೈದ್ಯೆಯಾಗಿರುವ ಶಿರಿನ್ ಅವರ ನೆರವು ಕೋರಿದ್ದರು.
ತಕ್ಷಣ ಸ್ಪಂದಿಸಿದ ಶಿರಿನ್ ವೇದಿಕೆಯಿಂದ ಕೆಳಗಿಳಿದು ರಕ್ತಸ್ರಾವವಾಗುತ್ತಿದ್ದ ಮಹಿಳೆಗೆ ಮೂಗನ್ನು 10ರಿಂದ 15 ನಿಮಿಷಗಳ ಕಾಲ ಬಿಗಿಯಾಗಿ ಹಿಡಿದುಕೊಳ್ಳುವಂತೆ ಸೂಚಿಸಿದರು. ಮತ್ತೊಬ್ಬ ಮಹಿಳೆಯನ್ನು ಮಲಗಿಸಿ ಕಾಲುಗಳನ್ನು ಮೇಲಕ್ಕೆತ್ತಿ ಇರಿಸುವಂತೆ ಮಾಡಿ ಪ್ರಥಮ ಚಿಕಿತ್ಸೆ ನೀಡಿದರು. ಆಸ್ಪತ್ರೆಗೆ ಕರೆದೊಯ್ಯುವ ಮೊದಲು ನೀಡಬಹುದಾದ ಮೂಲಭೂತ ಪ್ರಥಮ ಚಿಕಿತ್ಸೆ ಇದು ಎಂದು ಶಿರಿನ್ ತಿಳಿಸಿದರು.
ಒಟ್ಟಪ್ಪಾಲಂನ ವಲ್ಲುವನಾಡ್ ಆಸ್ಪತ್ರೆಯಲ್ಲಿ ತುರ್ತು ವೈದ್ಯಕೀಯ ವಿಭಾಗದಲ್ಲಿ ಮೊದಲ ವರ್ಷದ MD ವ್ಯಾಸಂಗ ಮಾಡುತ್ತಿರುವ ಶಿರಿನ್ ತಾನು ಮಾಡಿದ್ದು ಅಸಾಧಾರಣ ಕೆಲಸವಲ್ಲ ಎಂದು ಹೇಳಿದರು. ತುರ್ತು ಸಂದರ್ಭದಲ್ಲಿ ಸಾಧ್ಯವಾದಷ್ಟು ಬೇಗ ಪ್ರಥಮ ಚಿಕಿತ್ಸೆ ನೀಡುವುದು ಮುಖ್ಯ ಎಂದು ಅವರು ತಿಳಿಸಿದರು.
ಮದುವೆ ಸಮಾರಂಭದಲ್ಲಿ ನಡೆದ ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಮದುವೆಯ ಸಂಭ್ರಮದ ನಡುವೆಯೂ ಕರ್ತವ್ಯಕ್ಕೆ ಸ್ಪಂದಿಸಿದ ವೈದ್ಯೆಯ ಕಾರ್ಯಕ್ಕೆ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.
