ಬಾಲಿವುಡ್ ನಟಿ ಕಂಗನಾ ರಣಾವತ್ ತಮ್ಮ ವಿಶಿಷ್ಟ ಶೈಲಿಯ ಫ್ಯಾಷನ್ ಹಾಗೂ ಸಾಂಪ್ರದಾಯಿಕ ಉಡುಗೆಗಳಿಂದ ಸದಾ ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡುತ್ತಿರುತ್ತಾರೆ. ಇತ್ತೀಚೆಗೆ ಅಹಮದಾಬಾದ್‌ನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿದ್ದ ಅವರು, ಗುಜರಾತ್‌ನ ಶ್ರೀಮಂತ ಸಾಂಸ್ಕೃತಿಕ ಪರಂಪರೆಯನ್ನು ಬಿಂಬಿಸುವ ಉಡುಪಿನಲ್ಲಿ ಕಂಗೊಳಿಸುವ ಮೂಲಕ ಹಬ್ಬದ ಋತುವಿನ ಫ್ಯಾಷನ್ ಪ್ರಿಯರ ಗಮನ ಸೆಳೆದಿದ್ದಾರೆ.
ವೈಭವದ ಸೀರೆಯಲ್ಲಿ ಕಂಗನಾ ಮಿಂಚಿಂಗ್ ಗಾಢ ನೀಲಿ, ಪಚ್ಚೆ ಹಸಿರು ಹಾಗೂ ಮಾಣಿಕ್ಯ ಕೆಂಪು ಬಣ್ಣಗಳ ಅಪೂರ್ವ ಸಮ್ಮಿಶ್ರಣ ಹೊಂದಿದ್ದ ಬಹುಬಣ್ಣದ ಆಕರ್ಷಕ ಸೀರೆಯನ್ನು ಕಂಗನಾ ತೊಟ್ಟಿದ್ದರು. ಭಾರತೀಯ ಸಾಂಪ್ರದಾಯಿಕ ನೇಕಾರಿಕೆಯ ಕಲಾತ್ಮಕ ವಿನ್ಯಾಸ, ಭಾರಿ ಬಾರ್ಡರ್ ಮತ್ತು ಕುಂಚಲಗಳ ಕೆಲಸ ಈ ಸೀರೆಯ ಅಂದವನ್ನು ಹೆಚ್ಚಿಸಿತ್ತು. ಈ ಭವ್ಯ ಸೀರೆಗೆ ಹೊಂದುವಂತೆ ಅವರು ಭಾರಿ ಕಸೂತಿ, ಮಣಿ ಕೆಲಸ ಹಾಗೂ ಕನ್ನಡಿ ವಿನ್ಯಾಸ ಹೊಂದಿದ್ದ ಬ್ಲೌಸ್ ಆಯ್ಕೆ ಮಾಡಿಕೊಂಡಿದ್ದರು.
ಆಭರಣ ಮತ್ತು ಅಲಂಕಾರದ ಗಾಂಭೀರ್ಯ ತಮ್ಮ ರಾಜೇಶಾಹಿ ಲುಕ್‌ಗೆ ತಕ್ಕಂತೆ ಕಂಗನಾ ಮುಖದ ಸೌಂದರ್ಯ ಹೆಚ್ಚಿಸುವ ನೆಕ್ಲೇಸ್ ಚೋಕರ್, ಕಿವಿಯೋಲೆ ಹಾಗೂ ಕೈಗಳಿಗೆ ಸಾಂಪ್ರದಾಯಿಕ ಮಾದರಿಯ ಕಡಾ ಮತ್ತು ಬಳೆಗಳನ್ನು ಧರಿಸಿದ್ದರು. ಹಣೆ ಮೇಲಿನ ಸಣ್ಣ ಕಪ್ಪು ಬಿಂದಿ ಅವರ ಸಾಂಪ್ರದಾಯಿಕ ಲುಕ್‌ಗೆ ಮತ್ತಷ್ಟು ಮೆರುಗು ನೀಡಿತ್ತು.
ಸರಳ ಹಾಗೂ ಜಟಿಲವಿಲ್ಲದ ಮೇಕಪ್‌ನೊಂದಿಗೆ, ತಲೆಕೂದಲನ್ನು ಗಂಟುಕಟ್ಟಿ ಅದಕ್ಕೆ ತಾಜಾ ಹೂವುಗಳನ್ನು ಮುಡಿದು ಅವರು ಕ್ಯಾಮೆರಾಗಳಿಗೆ ಪೋಸ್ ನೀಡಿದ್ದಾರೆ. ಹಬ್ಬಗಳು ಹಾಗೂ ಸಂಭ್ರಮದ ಸಮಾರಂಭಗಳಲ್ಲಿ ವೈಭವದ ಉಡುಪು ಧರಿಸಲು ಬಯಸುವವರಿಗೆ ಕಂಗನಾ ಅವರ ಈ ಫ್ಯಾಷನ್ ಶೈಲಿ ಹೊಸ ಸ್ಪೂರ್ತಿಯಾಗಿದೆ.
