ಬೆಂಗಳೂರು: ರಾಜ್ಯ ರಾಜಕೀಯದಲ್ಲಿ ಇದೀಗ ಮಾಜಿ ಮುಖ್ಯಮಂತ್ರಿ ಡಿ.ವಿ. ಸದಾನಂದ ಗೌಡರ ಹೇಳಿಕೆಯೊಂದು ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಡಿಕೆಶಿ ಸಿಎಂ ಹುದ್ದೆಯ ಸವಾಲುಗಳು ಹಾಗೂ ಅವರ ಭವಿಷ್ಯದ ಬಗ್ಗೆ ಸದಾನಂದ ಗೌಡರು ಮುಕ್ತವಾಗಿ ಮಾತನಾಡಿದ್ದಾರೆ.
“ಇದು ಮುಳ್ಳಿನ ಹಾಸಿಗೆಯಿದ್ದಂತೆ”
ಡಿಕೆಶಿ ಸಿಎಂ ಹುದ್ದೆಯನ್ನು ಪಡೆದಿರುವ ಬಗ್ಗೆ ತಮ್ಮ ಸಂತೋಷವನ್ನು ಹಂಚಿಕೊಂಡರೂ, ಆ ಹುದ್ದೆಯ ಜವಾಬ್ದಾರಿ ಮತ್ತು ಸವಾಲುಗಳ ಬಗ್ಗೆ ಅವರು ಗಂಭೀರವಾಗಿ ಮಾತನಾಡಿದ್ದಾರೆ. “ಅವರಿಗೆ ಸಿಎಂ ಹುದ್ದೆ ಸಿಕ್ಕಿರುವುದು ಖುಷಿಯ ವಿಷಯ, ಆದರೆ ಇದು ಮುಳ್ಳಿನ ಹಾಸಿಗೆಯ ಮೇಲೆ ಮಲಗಿದಂತಾಗಿದೆ. ಡಿಕೆಶಿ ಅವರು ಛಲದಂಕ ಮಲ್ಲನಂತೆ ಪಟ್ಟು ಬಿಡದೇ ಸಿಎಂ ಹುದ್ದೆ ಗಿಟ್ಟಿಸಿಕೊಂಡಿದ್ದಾರೆ. 2 ವರ್ಷಗಳಲ್ಲಿ ಅವರಿಗೆ ದೊಡ್ಡ ಸವಾಲಿನ ಕೆಲಸವಿದೆ ಎಂದರು.
“3 ವರ್ಷದಲ್ಲಿ ಅಭಿವೃದ್ಧಿಯೇ ಗುರಿ” ಕೇವಲ ಹುದ್ದೆ ಅಲಂಕರಿಸುವುದು ಮಾತ್ರ ಮುಖ್ಯವಲ್ಲ, ಸಿಕ್ಕಿರುವ ಅವಧಿಯಲ್ಲಿ ಜನಪರ ಕೆಲಸ ಮಾಡುವುದು ಮುಖ್ಯ ಎಂಬುದು ಅವರ ಅಭಿಮತ. “ಕಳೆದ ಮೂರು ವರ್ಷಗಳಲ್ಲಿ ಆಗಿರುವ ಕೆಲಸಗಳಿಗಿಂತ ಮೀರಿ ಹೆಚ್ಚಿನ ಅಭಿವೃದ್ಧಿ ಕಾರ್ಯಗಳನ್ನು ಮಾಡಿದರೆ ಮಾತ್ರ ಸಾರ್ಥಕತೆ,” ಎಂದು ಅವರು ತಮ್ಮ ನಿಲುವನ್ನು ಸ್ಪಷ್ಟಪಡಿಸಿದ್ದಾರೆ.
“ನಾನು ಲಾಬಿಯ ರಾಜಕಾರಣಿಯಲ್ಲ” ಮುಂದಿನ ರಾಜಕೀಯ ನಡೆ ಮತ್ತು ರಾಜ್ಯಸಭಾ ಟಿಕೆಟ್ ಆಕಾಂಕ್ಷೆಯ ಬಗ್ಗೆ ಮಾತನಾಡುತ್ತಾ, ತಮ್ಮ ತತ್ವಗಳನ್ನು ಎತ್ತಿಹಿಡಿದಿದ್ದಾರೆ. “ನಾನು ಯಾವುದೇ ಸನ್ಯಾಸಿಯಲ್ಲ, ರಾಜಕಾರಣಿ. ಆದರೆ, ನಾನು ಲಾಬಿ ಮಾಡುವುದರಲ್ಲಿ ನಂಬಿಕೆ ಇಟ್ಟವನಲ್ಲ. ಅಧಿಕಾರಕ್ಕಾಗಿ ದೊಡ್ಡವರ ಹಿಂದೆ ಹೋಗುವ ಜಾಯಮಾನ ನನ್ನದಲ್ಲ. ಪಕ್ಷದ ವರಿಷ್ಠರಿಗೆ ಅಥವಾ ಕೇಂದ್ರ ನಾಯಕರಿಗೆ ನಾನು ಅರ್ಹ ಅಭ್ಯರ್ಥಿ ಎಂದು ಅನಿಸಿದರೆ, ಅವರೇ ನನಗೆ ರಾಜ್ಯಸಭಾ ಟಿಕೆಟ್ ನೀಡಲಿ. ನನಗೆ ಸಿಕ್ಕಿರುವ ಅವಕಾಶದಲ್ಲಿ ನಾನು ಸಂತೃಪ್ತನಾಗಿದ್ದೇನೆ,” ಎಂದು ಅವರು ಖಡಕ್ ಆಗಿ ನುಡಿದಿದ್ದಾರೆ.ಒಟ್ಟಾರೆಯಾಗಿ, ಡಿ.ವಿ. ಸದಾನಂದ ಗೌಡರ ಈ ಹೇಳಿಕೆಯು ರಾಜಕೀಯ ವಲಯದಲ್ಲಿ ಹಲವು ಆಯಾಮಗಳಲ್ಲಿ ಚರ್ಚೆಯಾಗುತ್ತಿದೆ. ಅಧಿಕಾರಕ್ಕಿಂತಲೂ ಮೌಲ್ಯ ಮತ್ತು ಆತ್ಮಗೌರವಕ್ಕೆ ಆದ್ಯತೆ ನೀಡುವ ಅವರ ಈ ನಡೆ ಗಮನ ಸೆಳೆದಿದೆ.
