ಸಾಮಾಜಿಕ ಜಾಲತಾಣಗಳಲ್ಲಿ ವೇಗವಾಗಿ ಹರಡುವ ಪ್ರತಿಯೊಂದು ಪೋಸ್ಟ್‌ನ್ನು ಪರಿಶೀಲಿಸದೆ ನಂಬುವುದು ಎಷ್ಟು ಅಪಾಯಕಾರಿ ಎಂಬುದಕ್ಕೆ ಮತ್ತೊಂದು ಉದಾಹರಣೆ ಬೆಳಕಿಗೆ ಬಂದಿದೆ. ಭಾರತದ ಕ್ರಿಕೆಟ್ ತಾರೆ ವಿರಾಟ್ ಕೊಹ್ಲಿ ಅವರ ಹೆಸರಿನಲ್ಲಿ X (ಹಿಂದಿನ ಟ್ವಿಟರ್) ವೇದಿಕೆಯಲ್ಲಿ ವೈರಲ್ ಆಗಿರುವ ಪೋಸ್ಟ್ ಒಂದು ಭಾರೀ ಚರ್ಚೆಗೆ ಕಾರಣವಾಗಿದೆ.
ವಿದ್ಯಾರ್ಥಿಗಳ ಪರೀಕ್ಷೆಗಳು, ಪಾರದರ್ಶಕತೆ ಮತ್ತು ಮೆರಿಟ್ ವ್ಯವಸ್ಥೆಯ ಕುರಿತು ವಿರಾಟ್ ಕೊಹ್ಲಿ ಪ್ರತಿಕ್ರಿಯಿಸಿದ್ದಾರೆ ಎಂಬ ರೀತಿಯಲ್ಲಿ ಒಂದು ಸ್ಕ್ರೀನ್‌ಶಾಟ್ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗುತ್ತಿದೆ. ಆದರೆ ಫ್ಯಾಕ್ಟ್ ಚೆಕ್‌ನಲ್ಲಿ ಈ ಪೋಸ್ಟ್ ಸಂಪೂರ್ಣ ನಕಲಿ ಎಂಬುದು ಬಹಿರಂಗವಾಗಿದೆ.
ವೈರಲ್ ಪೋಸ್ಟ್‌ನಲ್ಲಿ ಏನಿತ್ತು?
ವೈರಲ್ ಆಗಿರುವ ಸ್ಕ್ರೀನ್‌ಶಾಟ್‌ನಲ್ಲಿ ವಿದ್ಯಾರ್ಥಿಗಳಿಗೆ ನ್ಯಾಯಸಮ್ಮತ ಪರೀಕ್ಷಾ ವ್ಯವಸ್ಥೆ, ಪಾರದರ್ಶಕ ಮೌಲ್ಯಮಾಪನ ವ್ಯವಸ್ಥೆ ಇರಬೇಕು ಹಾಗೂ ಅವರ ಬೇಡಿಕೆಗಳಿಗೆ ಅಧಿಕಾರಿಗಳು ತಕ್ಷಣ ಸ್ಪಂದಿಸಬೇಕು ಎಂದು ವಿರಾಟ್ ಕೊಹ್ಲಿ ಬರೆದಿರುವಂತೆ ತೋರಿಸಲಾಗಿದೆ. ಪೋಸ್ಟ್‌ನಲ್ಲಿ ವಿರಾಟ್ ಕೊಹ್ಲಿ ಅವರ ಹೆಸರು, ಪ್ರೊಫೈಲ್ ಫೋಟೋ ಮತ್ತು ಬ್ಲೂ ಟಿಕ್ ಕಾಣಿಸಿಕೊಂಡಿದ್ದರಿಂದ ಅನೇಕರು ಅದನ್ನು ನಿಜವಾದ ಪೋಸ್ಟ್ ಎಂದು ಭಾವಿಸಿ ವ್ಯಾಪಕವಾಗಿ ಹಂಚಿಕೊಂಡಿದ್ದಾರೆ.
ಅಸಲಿ ಸತ್ಯವೇನು?
ಪರಿಶೀಲನೆ ನಡೆಸಿದಾಗ ವೈರಲ್ ಸ್ಕ್ರೀನ್‌ಶಾಟ್‌ನಲ್ಲಿದ್ದ ಖಾತೆಯ ಯೂಸರ್‌ನೇಮ್ @Highonchurma ಆಗಿದ್ದು, ಅದು ವಿರಾಟ್ ಕೊಹ್ಲಿಯ ಅಧಿಕೃತ ಖಾತೆಯಲ್ಲ ಎಂಬುದು ತಿಳಿದುಬಂದಿದೆ. ವಿರಾಟ್ ಕೊಹ್ಲಿ ಅವರ ಅಧಿಕೃತ, ಪರಿಶೀಲಿತ X ಖಾತೆಯ ಯೂಸರ್‌ನೇಮ್ @imVkohli ಆಗಿದೆ. X ವೇದಿಕೆಯ ಪ್ರೀಮಿಯಂ ಸಬ್‌ಸ್ಕ್ರಿಪ್ಷನ್ ಸೌಲಭ್ಯವನ್ನು ದುರುಪಯೋಗಪಡಿಸಿಕೊಂಡ ವ್ಯಕ್ತಿಯೊಬ್ಬ ತನ್ನ ಡಿಸ್‌ಪ್ಲೇ ಹೆಸರು ಹಾಗೂ ಪ್ರೊಫೈಲ್ ಚಿತ್ರವನ್ನು ತಾತ್ಕಾಲಿಕವಾಗಿ ವಿರಾಟ್ ಕೊಹ್ಲಿಯಂತೆಯೇ ಬದಲಾಯಿಸಿ ಈ ಪೋಸ್ಟ್ ಪ್ರಕಟಿಸಿದ್ದಾನೆ. ಬ್ಲೂ ಟಿಕ್ ಇದ್ದ ಕಾರಣ ಹಲವರು ಅದನ್ನು ನಿಜವಾದ ಖಾತೆ ಎಂದು ತಪ್ಪಾಗಿ ನಂಬಿದ್ದಾರೆ.
ಯೂಸರ್‌ ನೇಮ್ ಪರಿಶೀಲನೆ ಏಕೆ ಮುಖ್ಯ?
ಸಾಮಾಜಿಕ ಜಾಲತಾಣಗಳಲ್ಲಿ ಕೇವಲ ಹೆಸರು, ಪ್ರೊಫೈಲ್ ಫೋಟೋ ಅಥವಾ ಬ್ಲೂ ಟಿಕ್ ನೋಡಿ ಯಾವುದೇ ಮಾಹಿತಿಯನ್ನು ನಂಬಬಾರದು. ಯಾವುದೇ ಗಣ್ಯ ವ್ಯಕ್ತಿಯ ಪೋಸ್ಟ್ ವೈರಲ್ ಆದಾಗ, ಅದರ @ಯೂಸರ್‌ನೇಮ್ ಅನ್ನು ಪರಿಶೀಲಿಸುವುದು ಅತ್ಯಂತ ಮುಖ್ಯ.ವಿರಾಟ್ ಕೊಹ್ಲಿ ಅವರು ತಮ್ಮ ಅಧಿಕೃತ ಸಾಮಾಜಿಕ ಜಾಲತಾಣ ಖಾತೆಗಳಲ್ಲಿ ವಿದ್ಯಾರ್ಥಿಗಳ ಪರೀಕ್ಷೆಗಳು ಅಥವಾ ಪರೀಕ್ಷಾ ವ್ಯವಸ್ಥೆ ಕುರಿತು ಯಾವುದೇ ಪೋಸ್ಟ್ ಮಾಡಿಲ್ಲ ಎಂಬುದು ಸ್ಪಷ್ಟವಾಗಿದೆ. ನಕಲಿ ಹಾಗೂ ಎಡಿಟ್ ಮಾಡಿದ ಸ್ಕ್ರೀನ್‌ಶಾಟ್‌ಗಳು ಕ್ಷಣಾರ್ಧದಲ್ಲಿ ವೈರಲ್ ಆಗುವ ಈ ಕಾಲದಲ್ಲಿ, ಇಂತಹ ಸೂಕ್ಷ್ಮ ಮಾಹಿತಿಯನ್ನು ಹಂಚಿಕೊಳ್ಳುವ ಮೊದಲು ಸಂಬಂಧಿತ ವ್ಯಕ್ತಿಯ ಅಧಿಕೃತ ಖಾತೆ ಅಥವಾ ವಿಶ್ವಾಸಾರ್ಹ ಮಾಧ್ಯಮಗಳ ಮೂಲಕ ಸತ್ಯಾಸತ್ಯತೆ ಪರಿಶೀಲಿಸುವುದು ಅತ್ಯಗತ್ಯ.
