ಬೆಂಗಳೂರು: ಸುರಕ್ಷಿತವಾಗಿ ಮನೆ ತಲುಪಬಹುದು ಎಂಬ ನಂಬಿಕೆಯಿಂದ ಮಹಿಳೆಯರು ಬೈಕ್ ಟ್ಯಾಕ್ಸಿಗಳನ್ನು ಬುಕ್ ಮಾಡುತ್ತಾರೆ. ಆದರೆ, ಪ್ರಯಾಣ ಆರಂಭಕ್ಕೂ ಮುನ್ನವೇ ಚಾಲಕನಿಂದ ಅಸಭ್ಯ ಮಾತುಗಳು ಕೇಳಿಬಂದರೆ ಆ ಮಹಿಳೆಯ ಪರಿಸ್ಥಿತಿ ಹೇಗಿರಬಹುದು? ಬೆಂಗಳೂರಿನಲ್ಲಿ ರ್ಯಾಪಿಡೋ ಬೈಕ್ ಟ್ಯಾಕ್ಸಿ ಬುಕ್ ಮಾಡಿದ್ದ ಯುವತಿಯೊಬ್ಬರಿಗೆ ಇಂತಹದ್ದೇ ಆಘಾತಕಾರಿ ಅನುಭವ ಎದುರಾಗಿದೆ.
ಪಿಕಪ್ ಸ್ಥಳಕ್ಕೆ ಬಂದಿದ್ದೀರಾ ಎಂದು ತಿಳಿದುಕೊಳ್ಳಲು ಚಾಲಕನಿಗೆ ಕರೆ ಮಾಡಿದ ಯುವತಿಗೆ, ಆತ ‘ಸೆಕ್ಸ್‌ಗೆ ಬರುತ್ತೀರಾ?’ ಎಂಬ ಅಸಭ್ಯ ಪ್ರಶ್ನೆ ಕೇಳಿದ್ದಾನೆ ಎನ್ನಲಾಗಿದೆ. ಈ ಅನಿರೀಕ್ಷಿತ ಮಾತಿನಿಂದ ಬೆಚ್ಚಿಬಿದ್ದ ಯುವತಿ, ನಡೆದ ಘಟನೆಯನ್ನು ವಿಡಿಯೋ ಮೂಲಕ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಇದೀಗ ವಿಡಿಯೋ ವೈರಲ್ ಆಗಿದ್ದು, ಮಹಿಳೆಯರ ಸುರಕ್ಷತೆ ಮತ್ತು ಸಾರ್ವಜನಿಕ ಸಾರಿಗೆ ಸೇವೆಗಳಲ್ಲಿ ಚಾಲಕರ ಜವಾಬ್ದಾರಿಯ ಬಗ್ಗೆ ತೀವ್ರ ಚರ್ಚೆ ಆರಂಭವಾಗಿದೆ.
ಕರೆ ಮಾಡಿದ್ದಕ್ಕೆ ಅಸಭ್ಯ ಉತ್ತರ!
ಮಹಿಳೆಯೊಬ್ಬರು ರ್ಯಾಪಿಡೋ ಬೈಕ್ ಟ್ಯಾಕ್ಸಿ ಬುಕ್ ಮಾಡಿದ್ದರು. ಬುಕ್ಕಿಂಗ್ ಬಳಿಕ ಚಾಲಕ ನಿಗದಿತ ಪಿಕಪ್ ಸ್ಥಳದಿಂದ ದೂರ ಹೋಗುತ್ತಿರುವ ಸಂದೇಶ ಬಂದ ಹಿನ್ನೆಲೆಯಲ್ಲಿ ಮಹಿಳೆ ಆತನಿಗೆ ಕರೆ ಮಾಡಿದ್ದಾರೆ. ಸ್ಥಳಕ್ಕೆ ಬಂದಿದ್ದೀರಾ ಎಂದು ವಿಚಾರಿಸಿದಾಗ, ತಾನು ಅಲ್ಲಿಗೆ ಬಂದು ಹೋಗಿರುವುದಾಗಿ ಚಾಲಕ ಉತ್ತರಿಸಿದ್ದಾನೆ ಎನ್ನಲಾಗಿದೆ.
ಇದರಿಂದ ಅಸಮಾಧಾನಗೊಂಡ ಮಹಿಳೆ, ಸ್ಥಳಕ್ಕೆ ಬಂದಾಗ ಕರೆ ಮಾಡಬೇಕಲ್ಲವೇ? ಕರೆ ಮಾಡದೆ ಹೋದರೆ ಪ್ರಯಾಣಿಕರಿಗೆ ಹೇಗೆ ತಿಳಿಯಬೇಕು ಎಂದು ಪ್ರಶ್ನಿಸಿದ್ದಾರೆ. ಆದರೆ, ಇದಕ್ಕೆ ಸಮರ್ಪಕ ಉತ್ತರ ನೀಡುವ ಬದಲು ಚಾಲಕ ಸ್ಥಳೀಯ ಭಾಷೆಯಲ್ಲಿ ‘ಸೆಕ್ಸ್‌ಗೆ ಬರುತ್ತೀರಾ?’ ಎಂಬ ಅಸಭ್ಯ ಪ್ರಶ್ನೆ ಕೇಳಿದ್ದಾನೆ ಎಂದು ಮಹಿಳೆ ಆರೋಪಿಸಿದ್ದಾರೆ.
ಸಾಮಾನ್ಯ ಪ್ರಯಾಣದ ಮಾಹಿತಿ ಕೇಳಲು ಕರೆ ಮಾಡಿದಾಗ ಇಂತಹ ಅನುಭವ ಎದುರಾಗಿರುವುದು ಮಹಿಳೆಯನ್ನು ತೀವ್ರ ಆಘಾತಕ್ಕೀಡು ಮಾಡಿದೆ. ಈ ಹಿನ್ನೆಲೆಯಲ್ಲಿ ಕರೆಯ ಸಂಭಾಷಣೆಯನ್ನು ವಿಡಿಯೋದಲ್ಲಿ ಹಂಚಿಕೊಂಡಿದ್ದು, ಅದು ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಗ್ರಾಸವಾಗಿದೆ.
ಬಳಿಕ ಕ್ಷಮೆಯಾಚಿಸಿದ ಚಾಲಕ?
ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ಬಳಿಕ ಮತ್ತೊಂದು ಬೆಳವಣಿಗೆಯೂ ನಡೆದಿದೆ. ಆರೋಪಿತ ಚಾಲಕನೇ ಮಹಿಳೆಯನ್ನು ಸಂಪರ್ಕಿಸಿ ಕ್ಷಮೆಯಾಚಿಸಿದ್ದಾನೆ ಎಂದು ಮಹಿಳೆ ತಿಳಿಸಿದ್ದಾರೆ. ಆದರೆ, ಈ ಕ್ಷಮೆಯಾಚನೆಯಿಂದ ಮಹಿಳೆಗೆ ಎದುರಾದ ಅಹಿತಕರ ಅನುಭವದ ಗಂಭೀರತೆ ಕಡಿಮೆಯಾಗುವುದಿಲ್ಲ ಎಂಬ ಅಭಿಪ್ರಾಯಗಳು ವ್ಯಕ್ತವಾಗಿವೆ.
ರ‍್ಯಾಪಿಡೋದಿಂದ ಚಾಲಕನ ವಿರುದ್ಧ ತಕ್ಷಣ ಕ್ರಮ
ಘಟನೆ ವೈರಲ್ ಆಗುತ್ತಿದ್ದಂತೆ ರ್ಯಾಪಿಡೋ ಕಂಪನಿ ಪ್ರತಿಕ್ರಿಯಿಸಿದೆ. ಮಹಿಳೆ ಅನುಭವಿಸಿದ ಘಟನೆಗೆ ವಿಷಾದ ವ್ಯಕ್ತಪಡಿಸಿರುವ ಕಂಪನಿ, ಪ್ರಯಾಣಿಕರ ಸುರಕ್ಷತೆ ಮತ್ತು ಗೌರವಕ್ಕೆ ಹೆಚ್ಚಿನ ಆದ್ಯತೆ ನೀಡುವುದಾಗಿ ತಿಳಿಸಿದೆ.
ಅಲ್ಲದೆ, ಘಟನೆಯನ್ನು ಪರಿಶೀಲಿಸಿ ಆರೋಪಿತ ಚಾಲಕನನ್ನು ತಕ್ಷಣದಿಂದಲೇ ತನ್ನ ವೇದಿಕೆಯಿಂದ ತೆಗೆದುಹಾಕಿರುವುದಾಗಿ ಸ್ಪಷ್ಟಪಡಿಸಿದೆ.
ಮಹಿಳೆಯರು ಸೇರಿದಂತೆ ಪ್ರತಿಯೊಬ್ಬ ಪ್ರಯಾಣಿಕರೂ ಸುರಕ್ಷಿತವಾಗಿ ಮತ್ತು ಗೌರವಯುತವಾಗಿ ಪ್ರಯಾಣಿಸುವ ವಾತಾವರಣ ಕಲ್ಪಿಸುವುದು ಕಂಪನಿಯ ಜವಾಬ್ದಾರಿ. ಯಾವುದೇ ರೀತಿಯ ಅಸಭ್ಯ ವರ್ತನೆಯನ್ನು ಸಹಿಸುವುದಿಲ್ಲ. ನಿಯಮ ಉಲ್ಲಂಘಿಸುವ ಚಾಲಕರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ರ್ಯಾಪಿಡೋ ಹೇಳಿದೆ.
ಹಕ್ಕು ನಿರಾಕರಣೆ (Disclaimer): ಈ ವರದಿಯಲ್ಲಿನ ಮಾಹಿತಿ ಮಹಿಳೆ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ವಿಡಿಯೋ ಹಾಗೂ ಲಭ್ಯವಿರುವ ಮಾಧ್ಯಮ ವರದಿಗಳನ್ನು ಆಧರಿಸಿದೆ. ವರದಿಯಲ್ಲಿನ ಆರೋಪಗಳ ಸತ್ಯಾಸತ್ಯತೆ ಅಥವಾ ಅದರ ಪರಿಣಾಮಗಳಿಗೆ ನಮ್ಮ ಸಂಸ್ಥೆ ಯಾವುದೇ ರೀತಿಯ ಜವಾಬ್ದಾರಿಯನ್ನು ಹೊರುವುದಿಲ್ಲ. ಮಾಹಿತಿ ಓದುಗರ ಅರಿವಿಗಾಗಿ ಮಾತ್ರ ಪ್ರಕಟಿಸಲಾಗಿದೆ.
