ನಿನ್ನೆ ( ಮೇ 26 ) ಧರಂಶಾಲಾ ಕ್ರೀಡಾಂಗಣದಲ್ಲಿ ನಡೆದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹಾಗೂ ಗುಜರಾತ್ ಟೈಟನ್ಸ್ ತಂಡಗಳ ನಡುವಿನ ಐಪಿಎಲ್ 2026ರ ಒಂದನೇ ಕ್ವಾಲಿಫಯರ್ ಪಂದ್ಯದಲ್ಲಿ ಆರ್‌ಸಿಬಿ ಗುಜರಾತ್ ವಿರುದ್ಧ 92 ರನ್‌ಗಳ ಭರ್ಜರಿ ಗೆಲುವನ್ನು ದಾಖಲಿಸಿ ಫೈನಲ್ ಪಂದ್ಯಕ್ಕೆ ಪ್ರವೇಶ ಪಡೆದುಕೊಂಡಿತು. ಈ ಮೂಲಕ ಕಳೆದ ಬಾರಿ ಟ್ರೋಫಿ ಗೆದ್ದಿದ್ದ ಆರ್‌ಸಿಬಿ ಸತತ ಎರಡನೇ ಬಾರಿಗೆ ಫೈನಲ್‌ಗೆ ಲಗ್ಗೆ ಇಟ್ಟಿದೆ.
ಪಂದ್ಯದಲ್ಲಿ ಟಾಸ್ ಗೆದ್ದ ಗುಜರಾತ್ ಟೈಟನ್ಸ್ ಬೌಲಿಂಗ್ ಆರಿಸಿಕೊಂಡು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವನ್ನು ಮೊದಲು ಬ್ಯಾಟಿಂಗ್ ಮಾಡಲು ಆಹ್ವಾನಿಸಿತು. ಅದರಂತೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು 20 ಓವರ್‌ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 254 ರನ್ ಕಲೆಹಾಕಿ ಗುಜರಾತ್ ಟೈಟನ್ಸ್‌ಗೆ 255 ರನ್‌ಗಳ ಗುರಿಯನ್ನು ನೀಡಿತು. ಈ ಗುರಿಯನ್ನು ಬೆನ್ನಟ್ಟುವಲ್ಲಿ ವಿಫಲವಾಗಿ ಆರ್‌ಸಿಬಿ ಬೌಲಿಂಗ್ ದಾಳಿಗೆ ನಲುಗಿದ ಗುಜರಾತ್ ಟೈಟನ್ಸ್ 19.3 ಓವರ್‌ಗಳಲ್ಲಿ 162 ರನ್‌ಗಳಿಗೆ ಆಲ್‌ಔಟ್ ಆಯಿತು.
ಹೀಗೆ ಸೋಲುಂಡ ಗುಜರಾತ್ ಟೈಟನ್ಸ್ ಎಲಿಮಿನೇಟರ್‌ನಲ್ಲಿ ಗೆಲ್ಲಲಿರುವ ತಂಡದ ಜತೆ ಎರಡನೇ ಕ್ವಾಲಿಫಯರ್‌ನಲ್ಲಿ ಎರಡನೇ ಬಾರಿಗೆ ಫೈನಲ್ ಪ್ರವೇಶಕ್ಕಾಗಿ ಸೆಣಸಾಟ ನಡೆಸಲಿದೆ.
ಇನ್ನು ಈ ಪಂದ್ಯದಲ್ಲಿ ಆರ್‌ಸಿಬಿ ನೀಡಿದ ಬೃಹತ್ ಗುರಿ ಬೆನ್ನಟ್ಟಿದ ಗುಜರಾತ್ ಪರ ಆರಂಭಿಕರಾಗಿ ಕಣಕ್ಕಿಳಿದ ಸಾಯಿ ಸುದರ್ಶನ್ 9 ಎಸೆತಗಳಲ್ಲಿ 14 ರನ್ ಬಾರಿಸಿ ಔಟ್ ಆದರು. ಜೇಕಬ್ ಡಫಿ ಎಸೆದ ಮೊದಲ ಓವರ್‌ನಲ್ಲಿ ಎರಡು ಬೌಂಡರಿ ಬಾರಿಸಿದ ಸಾಯಿ ಸುದರ್ಶನ್ ಮತ್ತೆ ಡಫಿ ಎಸೆದ ಮೂರನೇ ಓವರ್‌ನ ಎರಡನೇ ಎಸೆತಕ್ಕೆ ಭರ್ಜರಿ ಬೌಂಡರಿ ಬಾರಿಸಿ ಮೂರನೇ ಎಸೆತಕ್ಕೂ ಬೌಂಡರಿ ಚಚ್ಚಿದರು. ಸಾಯಿ ಬಾರಿಸಿದ ರಭಸಕ್ಕೆ ರಾಕೆಟ್‌ನಂತೆ ಚೆಂಡು ಬೌಂಡರಿಗೆ ಸಾಗಿತು. ಆದರೆ ಸಾಯಿ ಸುದರ್ಶನ್ ಕೈನಿಂದ ಜಾರಿದ ಬ್ಯಾಟ್ ವಿಕೆಟ್‌ಗೆ ಬಡಿದು ಹಿಟ್ ವಿಕೆಟ್ ಆಗಿ ಔಟ್ ಆದರು.
ಥರ್ಡ್ ಅಂಪೈರ್ ತಮ್ಮ ನಿರ್ಣಯವನ್ನು ಮಂಡಿಸುವ ಮುನ್ನವೇ ಸಾಯಿ ಸುದರ್ಶನ್ ಬ್ಯಾಟ್ ಎತ್ತಿಕೊಂಡು ಪೆವಿಲಿಯನ್‌ನತ್ತ ಹೆಜ್ಜೆ ಹಾಕಲು ಶುರು ಮಾಡಿದರು. ನಂತರ ಅದನ್ನು ಔಟ್ ಎಂದೇ ತೀರ್ಮಾನಿಸಲಾಯಿತೂ ಕೂಡ.
ಇತ್ತ ಸಾಮಾಜಿಕ ಜಾಲತಾಣದಲ್ಲಿ ಈ ಔಟ್ ಬಗ್ಗೆ ಚರ್ಚೆಗಳು ನಡೆದಿದ್ದು, ಅಯ್ಯಯ್ಯೋ ಇದೆಂಥ ದುರಾದೃಷ್ಟ ಎಂದರೆ ಇನ್ನೂ ಕೆಲವರು ಇದು ನಾಟ್‌ಔಟ್ ಎಂದು ವಾದಿಸಿದ್ದಾರೆ. ಹೌದು, ಬ್ಯಾಟ್ಸ್‌ಮನ್ ಚೆಂಡನ್ನು ದಂಡಿಸಲು ಮುಂದಾದಾಗ ಬ್ಯಾಟ್ ವಿಕೆಟ್‌ಗೆ ತಗುಲಿದರೆ ಮಾತ್ರ ಅದು ಹಿಟ್ ವಿಕೆಟ್, ಶಾಟ್ ಪೂರ್ಣಗೊಳಿಸಿದ ಬಳಿಕ ಬ್ಯಾಟ್ ತಾಗಿದರೆ ಅದು ನಾಟ್‌ಔಟ್ ಎಂದಿದ್ದಾರೆ.
ಅಲ್ಲದೇ ಖ್ಯಾತ ಅಂಪೈರ್ ಅನಿಲ್ ಚೌಧರಿ ಸಹ ಈ ಕುರಿತು ವಿಡಿಯೊ ಮಾಡಿ ಇದು ನಾಟ್‌ಔಟ್ ಎಂದು ಹೇಳಿದ್ದಾರೆ ಎಂದು ವಿಡಿಯೊ ಹಂಚಿಕೊಳ್ಳತೊಡಗಿದ್ದಾರೆ. ಅಸಲಿಯತ್ತಿಗೆ ಆ ವಿಡಿಯೊ ಸಾಯಿ ಸುದರ್ಶನ್ ಔಟ್ ಬಗ್ಗೆ ಮಾಡಿದ ವಿಡಿಯೊವಲ್ಲ. ಬದಲಾಗಿ ಅದು ಬೇರೆ ಪಂದ್ಯದ ಒಂದು ಔಟ್ ಕುರಿತು ಅನಿಲ್ ಚೌಧರಿ ಮಾತನಾಡಿದ್ದ ವಿಡಿಯೊವಾಗಿದ್ದು, ಅದಕ್ಕೆ ಸಾಯಿ ಸುದರ್ಶನ್ ವಿಡಿಯೊ ಹಾಕಿ ತಪ್ಪಾಗಿ ಹರಡಲಾಗಿದೆ. ಅಲ್ಲದೇ ನಿಯಮದ ಪ್ರಕಾರ ಸಾಯಿ ಸುದರ್ಶನ್ ಔಟ್ ಕೂಡ ಹೌದು.
