ಐಪಿಎಲ್ 2026ರ ಶನಿವಾರದ ಪಂದ್ಯದಲ್ಲಿ ಕನ್ನಡಿಗ ಕೆ.ಎಲ್. ರಾಹುಲ್ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿ ಕ್ರಿಕೆಟ್ ಲೋಕವನ್ನೇ ಬೆರಗುಗೊಳಿಸಿದ್ದಾರೆ. ದೆಹಲಿ ಕ್ಯಾಪಿಟಲ್ಸ್ ಮತ್ತು ಪಂಜಾಬ್ ಕಿಂಗ್ಸ್ ನಡುವಿನ ಹಣಾಹಣಿಯಲ್ಲಿ ರಾಹುಲ್ ಅಕ್ಷರಶಃ ರನ್ ಮಳೆ ಸುರಿಸಿದ್ದು, ಹಲವು ದಾಖಲೆಗಳನ್ನು ಪುಡಿಪುಡಿ ಮಾಡಿದ್ದಾರೆ.
ದಾಖಲೆಯ ಇನ್ನಿಂಗ್ಸ್: ಕೇವಲ 67 ಎಸೆತಗಳಲ್ಲಿ 152 ರನ್ ಸಿಡಿಸಿದ ಕೆ.ಎಲ್. ರಾಹುಲ್, ಐಪಿಎಲ್ ಇತಿಹಾಸದಲ್ಲಿ ಗರಿಷ್ಠ ವೈಯಕ್ತಿಕ ಮೊತ್ತ ದಾಖಲಿಸಿದ ಮೊದಲ ಭಾರತೀಯ ಎಂಬ ಕೀರ್ತಿಗೆ ಭಾಜನರಾಗಿದ್ದಾರೆ. ಕ್ರಿಸ್ ಗೇಲ್ (175) ಮತ್ತು ಬ್ರೆಂಡನ್ ಮೆಕಲಮ್ (158) ನಂತರದ ಸ್ಥಾನದಲ್ಲಿ ರಾಹುಲ್ ಈಗ ಗುರುತಿಸಿಕೊಂಡಿದ್ದಾರೆ. ತಮ್ಮ ಈ ಸ್ಫೋಟಕ ಇನ್ನಿಂಗ್ಸ್‌ನಲ್ಲಿ ಅವರು 16 ಬೌಂಡರಿ ಹಾಗೂ 9 ಭರ್ಜರಿ ಸಿಕ್ಸರ್‌ಗಳನ್ನು ಸಿಡಿಸಿದರು. ಕೇವಲ 47 ಎಸೆತಗಳಲ್ಲಿ ಶತಕ ಪೂರೈಸಿದ್ದು ಅವರ ಬ್ಯಾಟಿಂಗ್ ವೇಗಕ್ಕೆ ಸಾಕ್ಷಿಯಾಯಿತು.
ಪತ್ನಿ ಆತಿಯಾ ಶೆಟ್ಟಿ ಸಂಭ್ರಮ: ರಾಹುಲ್ ಅವರ ಈ ಅಮೋಘ ಪ್ರದರ್ಶನಕ್ಕೆ ಅವರ ಪತ್ನಿ ಹಾಗೂ ನಟಿ ಆತಿಯಾ ಶೆಟ್ಟಿ ಸಾಮಾಜಿಕ ಜಾಲತಾಣದಲ್ಲಿ ಸಂಭ್ರಮ ವ್ಯಕ್ತಪಡಿಸಿದ್ದಾರೆ. ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ ರಾಹುಲ್ ಅವರ ವಿಡಿಯೋ ಹಂಚಿಕೊಂಡಿರುವ ಅವರು “Just Insane” (ಇದು ಹುಚ್ಚುತನದ ಅದ್ಭುತ ಪ್ರದರ್ಶನ) ಎಂದು ಬರೆದುಕೊಂಡು ಪತಿಯ ಸಾಧನೆಯನ್ನು ಕೊಂಡಾಡಿದ್ದಾರೆ. ಆತಿಯಾ ಅವರ ಸಹೋದರ ಅಹನ್ ಶೆಟ್ಟಿ ಕೂಡ “ಇದೇನು ಅದ್ಭುತ ಸಾಧನೆ ರಾಹುಲ್” ಎಂದು ಅಭಿನಂದಿಸಿದ್ದಾರೆ.
ಮಿಶ್ರ ಪ್ರತಿಕ್ರಿಯೆ: ಇಷ್ಟೊಂದು ದೊಡ್ಡ ಮೊತ್ತ ಗಳಿಸಿದರೂ ಪಂದ್ಯದಲ್ಲಿ ದೆಹಲಿ ಕ್ಯಾಪಿಟಲ್ಸ್ ತಂಡ ಜಯ ಸಾಧಿಸಲು ಸಾಧ್ಯವಾಗಲಿಲ್ಲ. ಪಂಜಾಬ್ ಕಿಂಗ್ಸ್ 264 ರನ್‌ಗಳ ಬೃಹತ್ ಮೊತ್ತವನ್ನು ಬೆನ್ನಟ್ಟಿ ಜಯಗಳಿಸಿತು. ಪಂದ್ಯದ ನಂತರ ಮಾತನಾಡಿದ ರಾಹುಲ್, “ಬಿಸಿಲಿನ ತಾಪದಿಂದಾಗಿ ಸುಸ್ತಾಗಿದ್ದೇನೆ, ಉತ್ತಮ ಆರೋಗ್ಯ ಚೇತರಿಕೆಯ ಅಗತ್ಯವಿದೆ. ನನ್ನ ವೈಯಕ್ತಿಕ ಸಾಧನೆ ಖುಷಿ ಕೊಟ್ಟಿದ್ದರೂ ಪಂದ್ಯ ಸೋತಿರುವುದು ಬೇಸರ ತಂದಿದೆ” ಎಂದು ತಮ್ಮ ಮಿಶ್ರ ಭಾವನೆಗಳನ್ನು ಹಂಚಿಕೊಂಡಿದ್ದಾರೆ.
ಕೆ.ಎಲ್. ರಾಹುಲ್ ಮತ್ತು ಆತಿಯಾ ಶೆಟ್ಟಿ 2023ರಲ್ಲಿ ವಿವಾಹವಾಗಿದ್ದು, 2025ರ ಮಾರ್ಚ್‌ನಲ್ಲಿ ಹೆಣ್ಣು ಮಗುವನ್ನು ಬರಮಾಡಿಕೊಂಡಿದ್ದರು ಎಂಬುದು ಉಲ್ಲೇಖಾರ್ಹ.
