ಭಾರತೀಯ ಹಣ್ಣುಗಳ ರಾಜ ಮಾವಿನ ಕೃಷಿ: ಸಂಪೂರ್ಣ ವಿವರ ಮತ್ತು ಯಶಸ್ಸಿನ ಸೂತ್ರ ಇಲ್ಲಿದೆ

ಬೆಂಗಳೂರು: ಭಾರತದಲ್ಲಿ ಮಾವು ಎಂದರೆ ಕೇವಲ ಹಣ್ಣಲ್ಲ, ಅದೊಂದು ಭಾವನೆ. ಹಣ್ಣುಗಳ ರಾಜ ಎಂದೇ ಕರೆಯಲ್ಪಡುವ ಮಾವಿಗೆ ದೇಶ-ವಿದೇಶಗಳಲ್ಲಿ ಭಾರಿ ಬೇಡಿಕೆಯಿದೆ. ಸಾಂಪ್ರದಾಯಿಕ ಪದ್ಧತಿಯ ಬದಲಿಗೆ ವೈಜ್ಞಾನಿಕ ಕ್ರಮಗಳನ್ನು ಅಳವಡಿಸಿಕೊಂಡರೆ ರೈತರು ಅಲ್ಪ ಅವಧಿಯಲ್ಲಿ ಅಧಿಕ ಇಳುವರಿ ಮತ್ತು ಲಕ್ಷಾಂತರ ರೂಪಾಯಿ ಲಾಭ ಗಳಿಸಬಹುದು. ರೈತರಿಗೆ ನೆರವಾಗಲು ಸರ್ಕಾರವು ರಾಷ್ಟ್ರೀಯ ಮಾವು ದತ್ತಾಂಶ (National Mango Database) ಎಂಬ ಯೋಜನೆಯನ್ನು ಕೂಡ ಜಾರಿಗೆ ತಂದಿದೆ.

ಮಣ್ಣು ಮತ್ತು ಹವಾಮಾನ
ಮಣ್ಣು: ನೀರು ಹಿಡಿದಿಟ್ಟುಕೊಳ್ಳುವ ಸಾಮರ್ಥ್ಯವಿರುವ ಆಳವಾದ ಮರಳು ಮಿಶ್ರಿತ ಲೋಮಿ ಮಣ್ಣು ಅತ್ಯುತ್ತಮ. ಮಣ್ಣಿನ pH ಮಟ್ಟ 5.5 ರಿಂದ 7.5 ಇರಬೇಕು.

ಹವಾಮಾನ: ಮಾವು ಉಷ್ಣವಲಯದ ಬೆಳೆಯಾಗಿದ್ದು, 25-27°C ತಾಪಮಾನ ಮತ್ತು ವಾರ್ಷಿಕ 125 ಸೆಂ.ಮೀ ಮಳೆ ಬೆಳವಣಿಗೆಗೆ ಪೂರಕವಾಗಿದೆ.

ಭಾರತದ ಜನಪ್ರಿಯ ಮಾವಿನ ತಳಿಗಳು:
ಮಲ್ಲಿಕಾ: ಪ್ರತಿ ಮರಕ್ಕೆ 65-70 ಕೆಜಿ ಇಳುವರಿ ನೀಡುತ್ತದೆ. ಇದರಲ್ಲಿ ಶೇ. 73 ರಷ್ಟು ತಿರುಳು (Pulp) ಇರುತ್ತದೆ.

ಸುಂದರ್ಜಾ: ಸುಗಂಧಭರಿತ ಈ ತಳಿ ಪ್ರತಿ ಮರಕ್ಕೆ 65 ಕೆಜಿ ಇಳುವರಿ ನೀಡುತ್ತದೆ.

ಆಮ್ರಪಾಲಿ: ಅತಿ ಸಾಂದ್ರ ಬೇಸಾಯಕ್ಕೆ (High-density) ಇದು ಹೇಳಿ ಮಾಡಿಸಿದ ತಳಿ.

ದಶೇರಿ: ಸಿಹಿ ರುಚಿಗೆ ಹೆಸರುವಾಸಿಯಾದ ಈ ತಳಿ ಪ್ರತಿ ಮರಕ್ಕೆ ಸುಮಾರು 80 ಕೆಜಿ ಇಳುವರಿ ಕೊಡುತ್ತದೆ.

ನಾಟಿ ಮಾಡುವ ವಿಧಾನ
ಅಂತರ: ಸಾಮಾನ್ಯ ತೋಟಗಳಲ್ಲಿ 10×10 ಮೀಟರ್ ಅಂತರವಿರಲಿ. ಅತಿ ಸಾಂದ್ರ ಬೇಸಾಯಕ್ಕೆ 2.5 ರಿಂದ 4 ಮೀಟರ್ ಅಂತರ ಸಾಕು.

ಗುಂಡಿ ಸಿದ್ಧತೆ: 1×1×1 ಮೀಟರ್ ಗುಂಡಿ ತೆಗೆದು, ಅದಕ್ಕೆ ಸಾವಯವ ಗೊಬ್ಬರ, ಬೇವಿನ ಹಿಂಡಿ ಮತ್ತು ಮೂಳೆ ಪುಡಿ (Bone meal) ಬೆರೆಸಿ ತುಂಬಬೇಕು.

ನೀರಾವರಿ ಮತ್ತು ಗೊಬ್ಬರ ನಿರ್ವಹಣೆ
ನೀರಾವರಿ: ಎಳೆಯ ಗಿಡಗಳಿಗೆ ಬೇಸಿಗೆಯಲ್ಲಿ ಪ್ರತಿ 4-7 ದಿನಕ್ಕೊಮ್ಮೆ ನೀರು ನೀಡಿ. ಫಲ ನೀಡುವ ದೊಡ್ಡ ಮರಗಳಿಗೆ ಅಕ್ಟೋಬರ್‌ನಿಂದ ಜನವರಿಯವರೆಗೆ ನೀರು ನಿಲ್ಲಿಸಬೇಕು, ಇದರಿಂದ ಹೂವು ಚೆನ್ನಾಗಿ ಬರುತ್ತದೆ.

ಗೊಬ್ಬರ: ಮರದ ವಯಸ್ಸಿಗೆ ಅನುಗುಣವಾಗಿ ಕೊಟ್ಟಿಗೆ ಗೊಬ್ಬರ, ಯೂರಿಯಾ, ಸಿಂಗಲ್ ಸೂಪರ್ ಫಾಸ್ಫೇಟ್ ಮತ್ತು ಮ್ಯೂರಿಯೇಟ್ ಆಫ್ ಪೊಟ್ಯಾಶ್ ನೀಡಬೇಕು.

ಅಂತರ ಬೆಳೆ ಮತ್ತು ಲಾಭ
ಮಾವಿನ ಮರಗಳು ಪೂರ್ಣ ಫಲ ನೀಡಲು 10-12 ವರ್ಷ ಬೇಕಾಗುವುದರಿಂದ, ಅಲ್ಲಿಯವರೆಗೆ ರೈತರು ಮರಗಳ ನಡುವೆ ಹೆಸರು ಬೇಳೆ, ಉದ್ದು, ಕಡಲೆ, ಬಟಾಣಿ ಅಥವಾ ಬೆಂಡೆಕಾಯಿಯನ್ನು ಅಂತರ ಬೆಳೆಯಾಗಿ ಬೆಳೆಯಬಹುದು. ಇದರಿಂದ ಭೂಮಿಯ ಫಲವತ್ತತೆ ಹೆಚ್ಚುವುದಲ್ಲದೆ ರೈತರಿಗೆ ಹೆಚ್ಚುವರಿ ಆದಾಯವೂ ಸಿಗುತ್ತದೆ.

ಲಾಭ: ಒಂದು ಹೆಕ್ಟೇರ್ ಮಾವಿನ ತೋಟದಿಂದ (ಸುಮಾರು 100 ಮರಗಳು) 80 ಕ್ವಿಂಟಾಲ್ ಇಳುವರಿ ಪಡೆಯಬಹುದು. ಇದರಿಂದ ವಾರ್ಷಿಕ ಸುಮಾರು ₹2.5 ಲಕ್ಷ ಆದಾಯ ಗಳಿಸಬಹುದು.

ರೋಗಗಳ ಮೇಲೆ ನಿಗಾ ಇರಲಿ
ಬೂದಿ ರೋಗ (Powdery Mildew): ಹೂಗೊಂಚಲುಗಳ ಮೇಲೆ ಬೂದಿ ಬಣ್ಣದ ಶಿಲೀಂಧ್ರ ಕಾಣಿಸಿಕೊಂಡರೆ 0.2% ಗಂಧಕವನ್ನು ಸಿಂಪಡಿಸಿ.

ಆಂಥ್ರಾಕ್ನೋಸ್ (Anthracnose): ಎಲೆ ಮತ್ತು ಹಣ್ಣಿನ ಮೇಲೆ ಕಂದು ಚುಕ್ಕೆಗಳಾದರೆ ಕಾರ್ಬೆಂಡಾಜಿಮ್ ಸಿಂಪಡಿಸಿ.

ಡೈಬ್ಯಾಕ್ (Dieback): ಕೊಂಬೆಗಳು ಒಣಗುತ್ತಿದ್ದರೆ ಬಾಡೋ ಮಿಶ್ರಣವನ್ನು ಹಚ್ಚಿ ರಕ್ಷಿಸಿ.

ಸರಿಯಾದ ತಳಿ ಆಯ್ಕೆ ಮತ್ತು ವೈಜ್ಞಾನಿಕ ನಿರ್ವಹಣೆ ಮಾಡಿದರೆ ಮಾವು ರೈತರ ಪಾಲಿನ ಅಕ್ಷಯ ಪಾತ್ರೆಯಾಗುವುದರಲ್ಲಿ ಸಂಶಯವಿಲ್ಲ.