ಅಮೆರಿಕದಲ್ಲಿ ನೆಲೆಸಿರುವ ಭಾರತೀಯ ಮೂಲದ ಸಿಇಒ ಸಚಿನ್ ಜೈನ್ ಅವರು ತಮ್ಮ ತಾಯಿಯ ಸ್ಫೂರ್ತಿದಾಯಕ ಯಶೋಗಾಥೆಯನ್ನು ಹಂಚಿಕೊಂಡಿದ್ದಾರೆ. 70ರ ದಶಕದಲ್ಲಿ ಅಮೆರಿಕಕ್ಕೆ ವಲಸೆ ಹೋದ ಮಹಿಳೆಯೊಬ್ಬರು ಸಣ್ಣ ಮನೆಯಲ್ಲೇ ಉದ್ಯಮ ಆರಂಭಿಸಿ, ಒಂದು ವರ್ಷದಲ್ಲಿ 10,000 ಡಾಲರ್ ಉಳಿತಾಯ ಮಾಡಿದ ಸಾಹಸದ ಕಥೆ ಈಗ ಜಾಲತಾಣಗಳಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿದೆ.
ಜಾಹೀರಾತಿನಿಂದ ಬದಲಾದ ಬದುಕು ಸ್ಕ್ಯಾನ್ ಗ್ರೂಪ್‌ನ ಸಿಇಒ ಆಗಿರುವ ಸಚಿನ್ ಜೈನ್ ಅವರು ‘ಎಕ್ಸ್’ (ಟ್ವಿಟರ್) ಮೂಲಕ ಈ ನೆನಪುಗಳನ್ನು ಮೆಲುಕು ಹಾಕಿದ್ದಾರೆ. 1970ರಲ್ಲಿ ಸಚಿನ್ ಅವರ ತಂದೆ ವೈದ್ಯಕೀಯ ಶಿಕ್ಷಣ ಪಡೆದು ಕೆಲಸಕ್ಕಾಗಿ ಅಹೋರಾತ್ರಿ ಶ್ರಮಿಸುತ್ತಿದ್ದರು. ಆ ಸಮಯದಲ್ಲಿ ಅವರ ತಾಯಿ ಮನೆಯಲ್ಲೇ ಇರುತ್ತಿದ್ದರು. ಒಂದು ದಿನ ಅಪಾರ್ಟ್‌ಮೆಂಟ್‌ನ ನೋಟಿಸ್ ಬೋರ್ಡ್‌ನಲ್ಲಿ ‘ಮಕ್ಕಳನ್ನು ನೋಡಿಕೊಳ್ಳುವವರು ಬೇಕಾಗಿದ್ದಾರೆ’ (Babysitter) ಎಂಬ ಜಾಹೀರಾತನ್ನು ನೋಡಿ ಸಚಿನ್ ಅವರ ತಾಯಿ ಅದಕ್ಕೆ ಪ್ರತಿಕ್ರಿಯಿಸಿದರು. ಅದೇ ಅವರ ಬದುಕಿನ ತಿರುವು ಆಯಿತು.
ಮನೆಯೇ ಆಯಿತು ಡೇ-ಕೇರ್ ಸೆಂಟರ್ ಮೊದಲಿಗೆ ಒಬ್ಬ ಮಗುವನ್ನು ನೋಡಿಕೊಳ್ಳಲು ಆರಂಭಿಸಿದ ಅವರು, ಅತಿ ಕಡಿಮೆ ಹಣಕ್ಕೆ ಸೇವೆಯನ್ನು ನೀಡುತ್ತಿದ್ದರು. ಅವರ ಪ್ರೀತಿ ಮತ್ತು ಮಕ್ಕಳನ್ನು ನೋಡಿಕೊಳ್ಳುವ ರೀತಿಗೆ ಮಾರುಹೋದ ಅಪಾರ್ಟ್‌ಮೆಂಟ್‌ನ ಎಲ್ಲರೂ ತಮ್ಮ ಮಕ್ಕಳನ್ನು ಇವರ ಬಳಿಯೇ ಬಿಡತೊಡಗಿದರು. ಹೀಗೆ ಸಣ್ಣ ಅಪಾರ್ಟ್‌ಮೆಂಟ್ ಒಂದು ಅನಧಿಕೃತ ಡೇ-ಕೇರ್ ಸೆಂಟರ್ ಆಗಿ ಬದಲಾಯಿತು. ಅಲ್ಲಿನ ಮಕ್ಕಳು ಸಚಿನ್ ಅವರ ತಾಯಿ ಮಾಡುವ ಅಡುಗೆಯನ್ನು ಬಹಳ ಇಷ್ಟಪಡುತ್ತಿದ್ದರು. ವಿಶೇಷವಾಗಿ ಒಲೆಯ ಮೇಲೆ ಅರಳುತ್ತಿದ್ದ ‘ರೊಟ್ಟಿ’ಗಳನ್ನು ಕಂಡು ಅಚ್ಚರಿಪಡುತ್ತಿದ್ದ ಮಕ್ಕಳು, “ಜೈನ್ ಅವರ ಕೈಯಲ್ಲಿ ಮ್ಯಾಜಿಕ್ ಇದೆ” ಎಂದು ಕಿರುಚಾಡುತ್ತಿದ್ದರು ಎಂದು ಸಚಿನ್ ನೆನಪಿಸಿಕೊಂಡಿದ್ದಾರೆ.
ದುಡಿಮೆಯ ಹಣದಲ್ಲಿ ಮೊದಲ ಮನೆ ತಮ್ಮ ಶ್ರಮ ಮತ್ತು ಛಲದಿಂದ ವಾರಕ್ಕೆ 200 ಡಾಲರ್ ಸಂಪಾದಿಸುತ್ತಿದ್ದ ಜೈನ್ ಅವರ ತಾಯಿ, ಒಂದು ವರ್ಷದ ಅವಧಿಯಲ್ಲಿ ಬರೊಬ್ಬರಿ 10,000 ಡಾಲರ್ ಹಣವನ್ನು ಉಳಿತಾಯ ಮಾಡಿದ್ದರು. ಅಚ್ಚರಿಯ ವಿಷಯವೆಂದರೆ, ಈ ಉಳಿತಾಯದ ಹಣವೇ ಆ ಕುಟುಂಬ ಅಮೆರಿಕದಲ್ಲಿ ತಮ್ಮ ಮೊದಲ ಮನೆಯನ್ನು ಖರೀದಿಸಲು ಮುಂಗಡ ಹಣವಾಯಿತು (Down Payment).
ಒಬ್ಬ ಗೃಹಿಣಿಯಾಗಿ ಪರದೇಶದಲ್ಲಿ ಸಣ್ಣ ಉದ್ಯಮವೊಂದನ್ನು ಕಟ್ಟಿ ಬೆಳೆಸಿದ ತಮ್ಮ ತಾಯಿಯ ಛಲ ಮತ್ತು ಧೈರ್ಯದ ಬಗ್ಗೆ ಸಚಿನ್ ಜೈನ್ ಹೆಮ್ಮೆಯಿಂದ ಬರೆದುಕೊಂಡಿದ್ದಾರೆ. ಅವರ ಈ ಪೋಸ್ಟ್‌ಗೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದ್ದು, ಕಷ್ಟಪಟ್ಟು ಮೇಲೆ ಬಂದ ಭಾರತೀಯರ ಶ್ರಮಕ್ಕೆ ನೆಟ್ಟಿಗರು ಸೆಲ್ಯೂಟ್ ಹೊಡೆಯುತ್ತಿದ್ದಾರೆ.
