ಉನ್ನತ ಶಿಕ್ಷಣ ಪಡೆದು ವಿದೇಶಗಳಲ್ಲಿ ದೊಡ್ಡ ಕಂಪನಿಗಳಲ್ಲಿ ಕೆಲಸ ಮಾಡುವುದು ಅದೆಷ್ಟೋ ಯುವಕರ ಕನಸು. ಆದರೆ ಐಐಟಿ ಪದವೀಧರ ದಂಪತಿಯೊಬ್ಬರು ಲಂಡನ್‌ನ ಅದ್ದೂರಿ ಕಾರ್ಪೊರೇಟ್ ಬದುಕನ್ನು ಬದಿಗಿಟ್ಟು, ಭಾರತೀಯ ಮೂಲದ ಪಾನಿ ಪುರಿ ಮಾರುವ ಮೂಲಕ ಸುದ್ದಿಯಲ್ಲಿದ್ದಾರೆ. ಅಂಕಿತಾ ಖಾಂತೆ ಮತ್ತು ಅಮನ್ ಕೃಷ್ಣ ಎಂಬ ದಂಪತಿ ಲಂಡನ್‌ನಲ್ಲಿ ದಿ ಬೌಜಿ ಕ್ಲಬ್ ಎಂಬ ವಿಶಿಷ್ಟ ಭೋಜನ ಕೂಟವನ್ನು ಆರಂಭಿಸಿದ್ದು, ಅಲ್ಲಿ ಒಂದು ಹೊತ್ತಿನ ಊಟಕ್ಕೆ ತಲಾ 6,000 ರೂಪಾಯಿ ಚಾರ್ಜ್ ಮಾಡುತ್ತಿದ್ದಾರೆ.
ಐಐಟಿ ಪದವೀಧರರ ಸಾಹಸ ಅಂಕಿತಾ ಅವರು ಐಐಟಿ ಗುವಾಹಟಿಯಲ್ಲಿ ಸ್ನಾತಕೋತ್ತರ ಪದವಿ ಮುಗಿಸಿ ಬೆಂಗಳೂರಿನ ಸ್ಯಾಮ್ ಸಂಗ್ ಕಂಪನಿಯಲ್ಲಿ ವಿನ್ಯಾಸಕಿಯಾಗಿ ಕೆಲಸ ಮಾಡುತ್ತಿದ್ದರು. ಅವರ ಪತಿ ಅಮನ್ ಐಐಟಿ ಧನ್ ಬಾದ್ ಮತ್ತು ಟ್ರಿಪಲ್ ಐಟಿ ಹೈದರಾಬಾದ್ ನ ಪದವೀಧರರಾಗಿದ್ದಾರೆ. 2024ರಲ್ಲಿ ಮದುವೆಯಾಗಿ ಲಂಡನ್ ಗೆ ತೆರಳಿದ ಈ ದಂಪತಿಗೆ ಅಲ್ಲಿನ ಉದ್ಯೋಗ ಮಾರುಕಟ್ಟೆಯಲ್ಲಿ ತೊಡಗಿಸಿಕೊಳ್ಳುವ ಬದಲು ಸ್ವಂತವಾಗಿ ಏನಾದರೂ ಮಾಡಬೇಕು ಎಂಬ ಆಲೋಚನೆ ಬಂದಿದೆ. ಅಡುಗೆ ಮಾಡುವುದು ಮತ್ತು ಅತಿಥಿ ಸತ್ಕಾರ ಮಾಡುವುದು ಇವರಿಬ್ಬರಿಗೂ ಮೊದಲಿನಿಂದಲೂ ಇಷ್ಟವಿದ್ದ ಕಾರಣ ಈ ಭೋಜನ ಕ್ಲಬ್ ಜನ್ಮತಾಳಿದೆ.
ಪಾನಿ ಪುರಿ ಎಂಬ ಸಂಭಾಷಣೆಯ ಕೀಲಿ ಕೈ ಈ ದಂಪತಿ ಪ್ರತಿ ತಿಂಗಳು ಸುಮಾರು 10 ರಿಂದ 12 ಅತಿಥಿಗಳಿಗಾಗಿ ವಿಶೇಷ ಊಟದ ಕೂಟವನ್ನು ಏರ್ಪಡಿಸುತ್ತಾರೆ. ಇದರಲ್ಲಿ ಏಳು ಹಂತದ ಭಾರತೀಯ ಶೈಲಿಯ ಊಟ ಇರುತ್ತದೆ. ಆರಂಭದಲ್ಲಿ ಬಂದ ಅತಿಥಿಗಳು ಪರಸ್ಪರ ಮಾತನಾಡಲು ಹಿಂಜರಿಯುತ್ತಿದ್ದನ್ನು ಗಮನಿಸಿದ ದಂಪತಿ, ಮೊಟ್ಟಮೊದಲ ಕೋರ್ಸ್ ಆಗಿ ಪಾನಿ ಪುರಿಯನ್ನು ನೀಡಲು ಆರಂಭಿಸಿದರು. ಪಾನಿ ಪುರಿ ನೀಡಿದ ತಕ್ಷಣ ಜನರು ತಮ್ಮ ಬಾಲ್ಯದ ನೆನಪುಗಳನ್ನು ಹಂಚಿಕೊಳ್ಳುತ್ತಾ ಒಬ್ಬರಿಗೊಬ್ಬರು ಹತ್ತಿರವಾಗುತ್ತಿದ್ದಾರೆ. ಈಗ ಈ ಪಾನಿ ಪುರಿಯೇ ಇವರ ಕ್ಲಬ್ ನ ಪ್ರಮುಖ ಆಕರ್ಷಣೆಯಾಗಿದೆ.
ಸವಾಲುಗಳ ನಡುವೆಯೂ ಸಾರ್ಥಕತೆ ಹೋಟೆಲ್ ಉದ್ಯಮದ ಯಾವುದೇ ಹಿನ್ನೆಲೆ ಇಲ್ಲದಿದ್ದರೂ, ದಪ್ಪನಾದ ಸಂಬಳದ ಕೆಲಸ ಬಿಟ್ಟು ಇಂತಹ ಕೆಲಸ ಮಾಡುತ್ತಿರುವ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಇದಕ್ಕೆ ಉತ್ತರಿಸಿರುವ ಅಂಕಿತಾ, ನಾವು ನಮ್ಮ ಶಿಕ್ಷಣ ಮತ್ತು ಸಂಸ್ಥೆಗಳ ಬಗ್ಗೆ ಹೆಮ್ಮೆಪಡುತ್ತೇವೆ. ಐಐಟಿಯಲ್ಲಿ ಕಲಿತ ಶಿಕ್ಷಣವು ನಮಗೆ ರಿಸ್ಕ್ ತೆಗೆದುಕೊಳ್ಳುವ ಮತ್ತು ಹೊಸದನ್ನು ಶೂನ್ಯದಿಂದ ಕಟ್ಟುವ ಧೈರ್ಯ ನೀಡಿದೆ ಎಂದು ಹೇಳಿದ್ದಾರೆ. ಲಂಡನ್ ನಿವಾಸಿಗಳ ರುಚಿಗೆ ತಕ್ಕಂತೆ ಮಸಾಲೆಯ ಸಮತೋಲನ ಕಾಪಾಡುವುದು ಇವರಿಗೆ ಆರಂಭದಲ್ಲಿ ದೊಡ್ಡ ಸವಾಲಾಗಿತ್ತು.
ಈ ದಂಪತಿಯ ಯಶೋಗಾಥೆಯು ಕೇವಲ ಉದ್ಯೋಗ ಮಾಡುವುದಷ್ಟೇ ಬದುಕಲ್ಲ, ಬದಲಾಗಿ ನಮ್ಮ ಇಷ್ಟದ ಕೆಲಸವನ್ನು ಮಾಡುವಲ್ಲಿ ನಿಜವಾದ ಸುಖವಿದೆ ಎಂಬ ಸಂದೇಶ ಸಾರುತ್ತಿದೆ. ವಿದೇಶಿ ನೆಲದಲ್ಲಿ ಭಾರತೀಯ ಮೂಲದ ಪಾನಿ ಪುರಿಗೆ ಈ ದಂಪತಿಗಳು ರಾಜಮರ್ಯಾದೆ ತಂದುಕೊಟ್ಟಿದ್ದಾರೆ.
https://www.instagram.com/p/DUTDEMlkzYv/?utm_source=ig_web_copy_link
