ಹೈದರಾಬಾದ್: ದೇಶದಲ್ಲಿ ಕೋಮು ಸೂಕ್ಷ್ಮತೆಗಳು ಆಗಾಗ ಸದ್ದು ಮಾಡುತ್ತಿರುವ ಬೆನ್ನಲ್ಲೇ, ತೆಲಂಗಾಣದ ರಾಜಧಾನಿ ಹೈದರಾಬಾದ್ನಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿರುವ ಆಘಾತಕಾರಿ ಘಟನೆಯೊಂದು ಬೆಳಕಿಗೆ ಬಂದಿದೆ. ಖಾಸಗಿ ಶಾಲೆಯೊಂದರಲ್ಲಿ ಎರಡನೇ ತರಗತಿಯ ಹಿಂದೂ ವಿದ್ಯಾರ್ಥಿಗೆ ಇಸ್ಲಾಂ ಧರ್ಮದ ಪವಿತ್ರ ಪಠಣಗಳಾದ ಕಲ್ಮಾ ಮತ್ತು ಸೂರಾ ಅಲ್-ಫಾತಿಹಾ ವನ್ನು ಬಾಯಿಪಾಠ ಮಾಡುವಂತೆ ಶಿಕ್ಷಕಿಯೊಬ್ಬರು ಹೋಮ್ವರ್ಕ್ ನೀಡಿರುವುದು ತೀವ್ರ ವಿವಾದಕ್ಕೆ ನಾಂದಿ ಹಾಡಿದೆ. ವಿಷಯ ತಿಳಿಯುತ್ತಿದ್ದಂತೆ ಎಚ್ಚೆತ್ತ ಶಾಲಾ ಆಡಳಿತ ಮಂಡಳಿಯು ಆರೋಪಿ ಶಿಕ್ಷಕಿಯನ್ನು ತಕ್ಷಣದಿಂದಲೇ ಜಾರಿಗೆ ಬರುವಂತೆ ಕೆಲಸದಿಂದ ವಜಾಗೊಳಿಸಿದೆ.
ಪುಸ್ತಕ ಪರಿಶೀಲಿಸಿದಾಗ ಬಯಲಾಯ್ತು ಶಿಕ್ಷಕಿಯ ಕೃತ್ಯ
ಹೈದರಾಬಾದ್ನ ಸಯೀದಾಬಾದ್ನಲ್ಲಿರುವ ಸಕ್ಸಸ್, ದಿ ಸ್ಕೂಲ್ʼನಲ್ಲಿ ಈ ಘಟನೆ ನಡೆದಿದೆ. ಶಾಲೆಯ ಶಿಕ್ಷಕಿ ಶೇಖ್ ಆಯಿಷಾ ಪರ್ವೀನ್ ಎಂಬುವವರು 2ನೇ ತರಗತಿಯ ವಿದ್ಯಾರ್ಥಿಯೊಬ್ಬನಿಗೆ ಈ ಧಾರ್ಮಿಕ ಹೋಮ್ವರ್ಕ್ ನೀಡಿದ್ದರು. ಶಾಲೆ ಮುಗಿದ ಬಳಿಕ ಮಗುವನ್ನು ಕರೆದುಕೊಂಡು ಹೋಗಲು ಬಂದಿದ್ದ ಆತನ ಸಂಬಂಧಿ ಸುಪ್ರಿಯಾ ಗೌಡ್ ಎಂಬುವವರು ಮಗುವಿನ ಡೈರಿ/ಪುಸ್ತಕವನ್ನು ಪರಿಶೀಲಿಸಿದಾಗ ಈ ಕೃತ್ಯ ಬೆಳಕಿಗೆ ಬಂದಿದೆ. ಸಾಮಾನ್ಯ ಶೈಕ್ಷಣಿಕ ಪಾಠಗಳ ಬದಲು ಧಾರ್ಮಿಕ ಪಠಣಗಳನ್ನು ಬರೆಯಲು ಮತ್ತು ಕಲಿಯಲು ಸೂಚಿಸಿರುವುದನ್ನು ಕಂಡು ಪೋಷಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿ ಶಾಲೆಯ ಮುಂದೆ ಪ್ರತಿಭಟಿಸಿದ್ದಾರೆ.
ಘಟನೆ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದಂತೆ ತೀವ್ರ ರಾಜಕೀಯ ಸ್ವರೂಪ ಪಡೆದುಕೊಂಡಿದೆ. ಕೇಂದ್ರ ಸಚಿವ ಬಂಡಿ ಸಂಜಯ್ ಕುಮಾರ್ ಈ ಬಗ್ಗೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, “ಇದು ಹಿಂದೂ ಸಂಸ್ಕೃತಿಯ ಮೇಲೆ ನಡೆಸಿರುವ ಬಲವಂತದ ದಾಳಿ” ಎಂದು ಖಂಡಿಸಿದ್ದಾರೆ.
ಇನ್ನೊಂದೆಡೆ ಘಟನೆಯ ಗಂಭೀರತೆ ಅರಿತು ತನಿಖೆ ಕೈಗೊಂಡಿರುವ ಚಾರ್ಮಿನಾರ್ ವಲಯದ ಡಿಸಿಪಿ (DCP), “ಸಂಬಂಧಿತ ತರಗತಿಯಲ್ಲಿ ಒಟ್ಟು 25 ಮಕ್ಕಳಿದ್ದು, ಆ ಪೈಕಿ ಒಬ್ಬ ವಿದ್ಯಾರ್ಥಿಯನ್ನು ಹೊರತುಪಡಿಸಿ ಉಳಿದ 24 ಮಕ್ಕಳು ಮುಸ್ಲಿಂ ಸಮುದಾಯಕ್ಕೆ ಸೇರಿದವರಾಗಿದ್ದಾರೆ. ಆದಾಗ್ಯೂ, ಮಗುವಿನ ಧರ್ಮಕ್ಕೆ ವಿರುದ್ಧವಾಗಿ ಇಂತಹ ಹೋಮ್ವರ್ಕ್ ನೀಡಿರುವುದು ಶಾಲಾ ನಿಯಮಗಳ ಸ್ಪಷ್ಟ ಉಲ್ಲಂಘನೆಯಾಗಿದೆ” ಎಂದು ತಿಳಿಸಿದ್ದಾರೆ.
ಪೋಷಕರ ಆಕ್ರೋಶ ಹಾಗೂ ಶಾಲಾ ಮಂಡಳಿ ಕ್ರಮ
ವಿವಾದ ಭುಗಿಲೇಳುತ್ತಿದ್ದಂತೆ ಪೋಷಕರ ಸಭೆ ಕರೆದ ಶಾಲಾ ಆಡಳಿತ ಮಂಡಳಿಯು ಶಿಕ್ಷಕಿ ಶೇಖ್ ಆಯಿಷಾ ಪರ್ವೀನ್ ಅವರನ್ನು ಶಾಶ್ವತವಾಗಿ ಅನರ್ಹಗೊಳಿಸಿ ಕೆಲಸದಿಂದ ವಜಾ ಮಾಡಿದೆ.
ಪೋಷಕರ ಆಕ್ರೋಶದ ನುಡಿ: “ಶಾಲೆಗೆ ವಿವಿಧ ಧರ್ಮಗಳ ಮಕ್ಕಳು ಉತ್ತಮ ಗುಣಮಟ್ಟದ ಶಿಕ್ಷಣಕ್ಕಾಗಿ ಬರುತ್ತಾರೆ. ಶಿಕ್ಷಣದಲ್ಲಿ ಧರ್ಮ ಯಾಕೆ ಬೇಕು? ಒಂದು ವೇಳೆ ಶಾಲೆಯಲ್ಲಿ ಧಾರ್ಮಿಕ ಪಾಠಗಳನ್ನು ಕಲಿಸುವುದೇ ಆದಲ್ಲಿ, ಕೇವಲ ಒಂದೇ ಧರ್ಮಕ್ಕೆ ಆದ್ಯತೆ ನೀಡದೆ ಭಗವದ್ಗೀತೆ ಮತ್ತು ಬೈಬಲ್ಗೂ ಸಮಾನ ಮಹತ್ವ ನೀಡಬೇಕು. ಸದ್ಯ ತಪ್ಪು ಮಾಡಿದ ಶಿಕ್ಷಕಿಯನ್ನು ವಜಾಗೊಳಿಸಿ ಶಾಲಾ ಆಡಳಿತ ಮಂಡಳಿ ಒಳ್ಳೆಯ ಕೆಲಸ ಮಾಡಿದೆʼʼ ಎಂದು ಪೋಷಕರು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
ಶಾಲೆಗಳು ಮತಾಂತರದ ಕೇಂದ್ರಗಳಾಗುತ್ತಿವೆಯೇ ಎಂಬ ಸಾಮಾಜಿಕ ಜಾಲತಾಣಗಳ ಚರ್ಚೆಯ ನಡುವೆ, ಹೈದರಾಬಾದ್ ಪೊಲೀಸ್ ಮತ್ತು ಶಿಕ್ಷಣ ಇಲಾಖೆ ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿದ್ದು ಆಂತರಿಕ ತನಿಖೆ ಮುಂದುವರಿಸಿದೆ.
