ಪ್ರೀತಿಯಿಂದ ಕೊಂಡುಕೊಂಡ ಪ್ರೀಮಿಯಂ ಡಾರ್ಕ್ ಚಾಕೊಲೇಟ್ ಆಗಿರಲಿ ಅಥವಾ ಇಷ್ಟಪಟ್ಟು ತಂದಿಟ್ಟುಕೊಂಡ ಮಿಲ್ಕ್ ಚಾಕೊಲೇಟ್ ಆಗಿರಲಿ, ಅದನ್ನು ಸರಿಯಾದ ಕ್ರಮದಲ್ಲಿ ಸಂಗ್ರಹಿಸಿಡುವುದು ತುಂಬಾ ಮುಖ್ಯ. ಇಲ್ಲದಿದ್ದರೆ ಚಾಕೊಲೇಟ್ ತನ್ನ ಅಸಲಿ ರುಚಿ, ವಿನ್ಯಾಸ ಹಾಗೂ ನೋಟವನ್ನು ಕಳೆದುಕೊಳ್ಳುತ್ತದೆ. ಚಾಕೊಲೇಟ್ ಮೇಲ್ನೋಟಕ್ಕೆ ದೀರ್ಘಕಾಲ ಬಾಳಿಕೆ ಬರುವಂತೆ ಕಂಡರೂ, ತಪ್ಪು ವಿಧಾನದಲ್ಲಿ ಇಟ್ಟರೆ ಅದರ ಗುಣಮಟ್ಟ ಬೇಗನೆ ಹಾಳಾಗುತ್ತದೆ. ಕೆಲವೊಮ್ಮೆ ಅವಧಿ ಮುಗಿಯುವ ದಿನಾಂಕ ಹತ್ತಿರವಿಲ್ಲದಿದ್ದರೂ ಚಾಕೊಲೇಟ್ ಮೇಲೆ ಬಿಳಿ ಕಲೆಗಳು ಮೂಡುವುದು ಅಥವಾ ಅದರ ರುಚಿ ಕಡಿಮೆಯಾಗುವುದು ನೀವು ಗಮನಿಸಿರಬಹುದು. ಇದಕ್ಕೆ ಸರಿಯಾದ ರೀತಿಯಲ್ಲಿ ಅದನ್ನು ಇಡದೇ ಇರುವುದೇ ಕಾರಣ.
ಚಾಕೊಲೇಟ್ನಲ್ಲಿ ಕೋಕೋ ಬಟರ್ ಅಂಶವಿರುವುದರಿಂದ ಅದು ತಾಪಮಾನದ ಏರುಪೇರಿಗೆ ಬೇಗನೆ ಒಳಗಾಗುತ್ತದೆ. ತಾಪಮಾನ ಸರಿಯಾಗಿಲ್ಲದಿದ್ದರೆ ಈ ಕೊಬ್ಬಿನಂಶವು ಚಾಕೊಲೇಟ್ನ ಮೇಲ್ಭಾಗಕ್ಕೆ ಬಂದು ಬಿಳಿ ಬಣ್ಣದ ಲೇಯರ್ ಸೃಷ್ಟಿಸುತ್ತದೆ. ಇದನ್ನು ಫ್ಯಾಟ್ ಬ್ಲೂಮ್ ಎಂದು ಕರೆಯಲಾಗುತ್ತದೆ. ಇದನ್ನು ತಿನ್ನುವುದರಿಂದ ಯಾವುದೇ ಆರೋಗ್ಯ ಸಮಸ್ಯೆ ಉಂಟಾಗದಿದ್ದರೂ, ಚಾಕೊಲೇಟ್ನ ಅಸಲಿ ಸವಿ ಮತ್ತು ಮೃದುತ್ವ ಸಿಗುವುದಿಲ್ಲ. ಇದರೊಂದಿಗೆ ಚಾಕೊಲೇಟ್ ತನ್ನ ಸುತ್ತಮುತ್ತಲಿನ ವಾಸನೆಯನ್ನು ಬೇಗನೆ ಹೀರಿಕೊಳ್ಳುವ ಗುಣ ಹೊಂದಿದೆ. ಹಾಗಾಗಿ ತೀರಾ ವಾಸನೆ ಇರುವ ಆಹಾರ ಪದಾರ್ಥಗಳ ಬಳಿ ಇದನ್ನು ಇಡಬಾರದು.
ಚಾಕೊಲೇಟ್ ಇಡಲು ಹದಿನೈದರಿಂದ ಇಪ್ಪತ್ತು ಡಿಗ್ರಿ ಸೆಲ್ಸಿಯಸ್ ತಾಪಮಾನ ಅತ್ಯಂತ ಸೂಕ್ತವಾಗಿದೆ. ನೇರ ಸೂರ್ಯನ ಬೆಳಕು ಬೀಳದ, ಒಣಗಿದ ಮತ್ತು ತಂಪಾದ ಜಾಗದಲ್ಲಿ ಇದನ್ನು ಇಡಬೇಕು. ಅಡುಗೆ ಮನೆಯ ಕೌಂಟರ್ ಟಾಪ್ಗಿಂತಲೂ ಸಾಮಾನ್ಯ ಕಪಾಟುಗಳು ಅಥವಾ ಡ್ರಾಯರ್ಗಳಲ್ಲಿ ಇಡುವುದು ಹೆಚ್ಚು ಸುರಕ್ಷಿತ. ತಾಪಮಾನದಲ್ಲಿ ಪದೇ ಪದೇ ಏರುಪೇರಾದರೆ ಚಾಕೊಲೇಟ್ ಬೇಗನೆ ಹದಗೆಡುತ್ತದೆ. ಸಾಮಾನ್ಯವಾಗಿ ಚಾಕೊಲೇಟನ್ನು ಫ್ರಿಡ್ಜ್ನಲ್ಲಿ ಇಡುವ ಅಗತ್ಯವಿರುವುದಿಲ್ಲ. ಫ್ರಿಡ್ಜ್ನಲ್ಲಿ ಇಡುವುದರಿಂದ ಅದರಲ್ಲಿ ತೇವಾಂಶ ಉಂಟಾಗಿ, ಸಕ್ಕರೆಯ ಅಂಶವು ಮೇಲ್ಭಾಗಕ್ಕೆ ಬಂದು ಚಾಕೊಲೇಟ್ ಒರಟಾಗುವ ಸಾಧ್ಯತೆ ಇರುತ್ತದೆ. ಆದರೆ ಅತಿಯಾದ ಉಷ್ಣಾಂಶ ಹಾಗೂ ಆರ್ದ್ರತೆ ಇರುವ ಪ್ರದೇಶಗಳಲ್ಲಿ ಫ್ರಿಡ್ಜ್ ಬಳಕೆ ಅನಿವಾರ್ಯವಾಗುತ್ತದೆ.
ಒಂದು ವೇಳೆ ಚಾಕೊಲೇಟನ್ನು ಫ್ರಿಡ್ಜ್ನಲ್ಲಿ ಇಡಲೇಬೇಕಾದ ಪರಿಸ್ಥಿತಿ ಬಂದರೆ, ಮೊದಲು ಅದನ್ನು ಕವರ್ ಅಥವಾ ಫಾಯಿಲ್ ಪೇಪರ್ನಲ್ಲಿ ಗಟ್ಟಿಯಾಗಿ ಸುತ್ತಿ, ಆನಂತರ ಗಾಳಿಯಾಡದ ಡಬ್ಬದಲ್ಲಿ ಇಟ್ಟು ಫ್ರಿಡ್ಜ್ನಲ್ಲಿಡಬೇಕು. ಮುಖ್ಯವಾಗಿ ತರಕಾರಿ, ಈರುಳ್ಳಿ, ಬೆಳ್ಳುಳ್ಳಿಯಂತಹ ತೀವ್ರ ವಾಸನೆ ಇರುವ ಪದಾರ್ಥಗಳಿಂದ ಇದನ್ನು ದೂರವಿಡಬೇಕು. ಫ್ರಿಡ್ಜ್ನಿಂದ ಹೊರಗೆ ತೆಗೆದ ತಕ್ಷಣ ಡಬ್ಬವನ್ನು ತೆರೆಯದೆ, ಅದು ಕೋಣೆಯ ಸಾಮಾನ್ಯ ತಾಪಮಾನಕ್ಕೆ ಬರಲು ಬಿಡಬೇಕು. ಇದರಿಂದ ಚಾಕೊಲೇಟ್ ಮೇಲೆ ನೀರಿನ ಹನಿಗಳು ಕುಳಿತುಕೊಳ್ಳುವುದನ್ನು ತಡೆಯಬಹುದು.
ಮಿಲ್ಕ್ ಅಥವಾ ವೈಟ್ ಚಾಕೊಲೇಟ್ಗೆ ಹೋಲಿಸಿದರೆ ಡಾರ್ಕ್ ಚಾಕೊಲೇಟ್ನಲ್ಲಿ ಹಾಲಿನ ಅಂಶ ಕಡಿಮೆ ಇರುವುದರಿಂದ ಅದು ಹೆಚ್ಚು ದಿನ ಬಾಳಿಕೆ ಬರುತ್ತದೆ. ಸರಿಯಾದ ಕ್ರಮ ಅನುಸರಿಸಿದರೆ ಚಾಕೊಲೇಟ್ಗಳನ್ನು ಹಲವು ತಿಂಗಳುಗಳ ಕಾಲ ತಾಜಾವಾಗಿ ಹಾಗೂ ರುಚಿಕರವಾಗಿ ಇಡಬಹುದು. ಮುಂದಿನ ಬಾರಿ ಚಾಕೊಲೇಟ್ ತಂದಾಗ ಈ ಸರಳ ಸೂತ್ರಗಳನ್ನು ನೆನಪಿನಲ್ಲಿಟ್ಟುಕೊಳ್ಳಿ.
