ಬೇಸಿಗೆ ಬಂತೆಂದರೆ ಸಾಕು ಪ್ರತಿಯೊಬ್ಬರಿಗೂ ತಂಪಾದ ಪಾನೀಯಗಳನ್ನು ಕುಡಿಯುವ ಆಸೆ ಹೆಚ್ಚಾಗುತ್ತದೆ. ಅದರಲ್ಲೂ ಮಾವಿನ ಹಣ್ಣಿನ ಸೀಸನ್‌ನಲ್ಲಿ ಸಿಗುವ ಮ್ಯಾಂಗೋ ಫ್ರೂಟಿ ಎಂದರೆ ಮಕ್ಕಳಿಗೆ ಎಲ್ಲಿಲ್ಲದ ಪ್ರೀತಿ. ಆದರೆ ಮಾರುಕಟ್ಟೆಯಲ್ಲಿ ಸಿಗುವ ಪ್ಯಾಕೆಟ್ ಜ್ಯೂಸ್‌ಗಳಲ್ಲಿ ಪ್ರಿಸರ್ವೇಟಿವ್ಸ್ ಮತ್ತು ಕೃತಕ ಬಣ್ಣಗಳನ್ನು ಬಳಸುವುದರಿಂದ ಅದು ಆರೋಗ್ಯಕ್ಕೆ ಅಷ್ಟು ಒಳ್ಳೆಯದಲ್ಲ. ಹೀಗಾಗಿ ಯಾವುದೇ ರಾಸಾಯನಿಕ ಬಳಸದೆ, ಅತ್ಯಂತ ಸುಲಭವಾಗಿ ಮತ್ತು ನೈಸರ್ಗಿಕವಾಗಿ ಮನೆಯಲ್ಲೇ ಮ್ಯಾಂಗೋ ಫ್ರೂಟಿ ತಯಾರಿಸುವ ವಿಧಾನ ಇಲ್ಲಿದೆ.
ಬೇಕಾಗುವ ಸಾಮಗ್ರಿಗಳು ಮನೆಯಲ್ಲೇ ರುಚಿಕರವಾದ ಫ್ರೂಟಿ ತಯಾರಿಸಲು ಎರಡು ಮಾಗಿದ ಸಿಹಿ ಮಾವಿನ ಹಣ್ಣುಗಳು, ಒಂದು ಹಸಿ ಮಾವಿನಕಾಯಿ, ನಾಲ್ಕು ಚಮಚ ಸಕ್ಕರೆ ಮತ್ತು ಮೂರು ಕಪ್ ನೀರು ಹಾಗೂ ಐಸ್ ಕ್ಯೂಬ್ಸ್ ಇದ್ದರೆ ಸಾಕು. ಸಿಹಿ ಮಾವಿನ ಹಣ್ಣಿನ ಜೊತೆಗೆ ಸ್ವಲ್ಪ ಹುಳಿ ಇರುವ ಮಾವಿನಕಾಯಿಯನ್ನು ಬಳಸುವುದರಿಂದ ಫ್ರೂಟಿಗೆ ಮಾರುಕಟ್ಟೆಯಲ್ಲಿ ಸಿಗುವ ಪಾನೀಯದ ತರಹದ್ದೇ ಆದ ಅಸಲಿ ರುಚಿ ಸಿಗುತ್ತದೆ.
ತಯಾರಿಸುವ ಸರಳ ವಿಧಾನ ಮೊದಲಿಗೆ ಮಾವಿನ ಹಣ್ಣು ಮತ್ತು ಮಾವಿನಕಾಯಿಯನ್ನು ಚೆನ್ನಾಗಿ ತೊಳೆದು, ಸಿಪ್ಪೆ ಸುಲಿದು ಸಣ್ಣ ಸಣ್ಣ ತುಂಡುಗಳಾಗಿ ಕತ್ತರಿಸಿಕೊಳ್ಳಬೇಕು. ನಂತರ ಒಂದು ಪಾತ್ರೆಯಲ್ಲಿ ನೀರು ಹಾಕಿ ಈ ಕತ್ತರಿಸಿದ ಮಾವಿನ ಹಣ್ಣು ಮತ್ತು ಮಾವಿನಕಾಯಿ ತುಂಡುಗಳನ್ನು ಚೆನ್ನಾಗಿ ಬೇಯಿಸಿಕೊಳ್ಳಬೇಕು. ಮಾವಿನ ತುಂಡುಗಳು ಮೆತ್ತಗಾಗುವವರೆಗೆ ಚೆನ್ನಾಗಿ ಕುದಿಸುವುದು ಮುಖ್ಯ.
ಹಣ್ಣುಗಳು ಬೆಂದ ನಂತರ ಒಲೆಯಿಂದ ಇಳಿಸಿ ಸ್ವಲ್ಪ ಸಮಯ ತಣ್ಣಗಾಗಲು ಬಿಡಬೇಕು. ಮಿಶ್ರಣ ಪೂರ್ತಿ ತಣ್ಣಗಾದ ಮೇಲೆ ಅದನ್ನು ಮಿಕ್ಸಿ ಜಾರಿಗೆ ಹಾಕಿ, ಜೊತೆಗೆ ಸಕ್ಕರೆಯನ್ನು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಬೇಕು. ಈ ರೀತಿ ರುಬ್ಬಿದ ಪೇಸ್ಟ್‌ನಲ್ಲಿ ಮಾವಿನ ನಾರುಗಳು ಇರದಂತೆ ತಂತಿಯ ಜರಡಿಯಿಂದ ಚೆನ್ನಾಗಿ ಸೋಸಿಕೊಳ್ಳಬೇಕು. ಹೀಗೆ ಮಾಡುವುದರಿಂದ ಫ್ರೂಟಿ ಕುಡಿಯುವಾಗ ಮೃದುವಾದ ಅನುಭವ ಸಿಗುತ್ತದೆ.
ತಂಪಾಗಿ ಸವಿಯಿರಿ ಕೊನೆಯದಾಗಿ ಸೋಸಿಕೊಂಡ ಮಿಶ್ರಣಕ್ಕೆ ತಣ್ಣಗಿರುವ ನೀರನ್ನು ಸೇರಿಸಿ, ನಿಮಗೆ ಬೇಕಾದ ಹದಕ್ಕೆ ಅಂದರೆ ತುಂಬಾ ಗಟ್ಟಿಯೂ ಅಲ್ಲದ, ತುಂಬಾ ತೆಳುವೂ ಅಲ್ಲದ ರೀತಿಯಲ್ಲಿ ಸಿದ್ಧಪಡಿಸಿಕೊಳ್ಳಿ. ಈಗ ಇದನ್ನು ಗ್ಲಾಸ್‌ಗಳಿಗೆ ಸುರಿದು, ಮೇಲಿಂದ ಐಸ್ ಕ್ಯೂಬ್ಸ್ ಮತ್ತು ಅಲಂಕಾರಕ್ಕಾಗಿ ಪುದೀನಾ ಎಲೆಗಳನ್ನು ಹಾಕಿದರೆ ಮಾರುಕಟ್ಟೆ ಶೈಲಿಯ ಮ್ಯಾಂಗೋ ಫ್ರೂಟಿ ಸವಿಯಲು ಸಿದ್ಧವಾಗುತ್ತದೆ. ಇದನ್ನು ರೆಫ್ರಿಜರೇಟರ್‌ನಲ್ಲಿ ಇಟ್ಟು ಕೆಲವು ದಿನಗಳ ಕಾಲ ಬಳಸಬಹುದು.
