ಇತ್ತೀಚಿನ ದಿನಗಳಲ್ಲಿ ಅಧಿಕ ರಕ್ತದೊತ್ತಡ ಅತ್ಯಂತ ಸಾಮಾನ್ಯ ಆರೋಗ್ಯ ಸಮಸ್ಯೆಯಾಗಿ ಮಾರ್ಪಟ್ಟಿದೆ. ಆದರೆ, ವರ್ಷಕ್ಕೊಮ್ಮೆ ಅಥವಾ ವೈದ್ಯರ ಬಳಿ ಹೋದಾಗ ಒಮ್ಮೆ ಮಾತ್ರ ರಕ್ತದೊತ್ತಡ ಪರೀಕ್ಷಿಸಿಕೊಂಡು ತೀರ್ಮಾನಕ್ಕೆ ಬರುವುದು ಸೂಕ್ತವಲ್ಲ ಎಂದು ಹೃದ್ರೋಗ ತಜ್ಞರು ಅಭಿಪ್ರಾಯಪಡುತ್ತಾರೆ. ಮನೆಯಲ್ಲೇ ನಿಖರವಾಗಿ ರಕ್ತದೊತ್ತಡವನ್ನು ಅಳೆಯಲು ತಜ್ಞರು ವಿಶೇಷ ವಿಧಾನವೊಂದನ್ನು ಶಿಫಾರಸು ಮಾಡುತ್ತಾರೆ.
ಹೃದಯ ಶಸ್ತ್ರಚಿಕಿತ್ಸಾ ತಜ್ಞ ಜೆರೆಮಿ ಲಂಡನ್ ಅವರ ಪ್ರಕಾರ, ರಕ್ತದೊತ್ತಡವನ್ನು ಅತ್ಯಂತ ನಿಖರವಾಗಿ ತಿಳಿಯಲು ಏಳು ದಿನಗಳ ಸರಳ ನಿಯಮ ಅತ್ಯುತ್ತಮ ಮಾರ್ಗವಾಗಿದೆ. ಇದರ ಪ್ರಕಾರ, ಸತತ ಏಳು ದಿನಗಳ ಕಾಲ ದಿನಕ್ಕೆ ಎರಡು ಬಾರಿ, ಅಂದರೆ ಬೆಳಿಗ್ಗೆ ಮತ್ತು ಸಂಜೆ ರಕ್ತದೊತ್ತಡವನ್ನು ಪರೀಕ್ಷಿಸಬೇಕು. ಪ್ರತಿ ಬಾರಿಯೂ ಎರಡು ಅಳತೆಗಳನ್ನು ತೆಗೆದುಕೊಂಡು, ನಂತರ ಎಲ್ಲ ಅಳತೆಗಳ ಸರಾಸರಿಯನ್ನು ಲೆಕ್ಕ ಹಾಕಬೇಕು. ವರ್ಷಕ್ಕೊಮ್ಮೆ ಆಸ್ಪತ್ರೆಯಲ್ಲಿ ತೆಗೆಯುವ ಒಂದೇ ಅಳತೆಯ ಮೇಲೆ ಸಂಪೂರ್ಣವಾಗಿ ಅವಲಂಬಿತರಾಗುವುದು ತಪ್ಪು ಎನ್ನುತ್ತಾರೆ ತಜ್ಞರು.
ಕೇವಲ ಒಂದೇ ಅಳತೆಯಿಂದ ವ್ಯಕ್ತಿಯ ನಿಜವಾದ ರಕ್ತದೊತ್ತಡದ ಮಟ್ಟ ತಿಳಿಯಲು ಸಾಧ್ಯವಿಲ್ಲ ಎಂದು ಮುಂಬೈನ ಪ್ರಮುಖ ಆಸ್ಪತ್ರೆಯ ಹೃದ್ರೋಗ ತಜ್ಞ ಡಾ. ಪರಿನ್ ಸಂಗೋಯಿ ವಿವರಿಸುತ್ತಾರೆ. ಆತಂಕ, ಆಸ್ಪತ್ರೆಗೆ ಧಾವಿಸುವಾಗ ಉಂಟಾಗುವ ಆತುರ, ಕೆಫೀನ್ ಸೇವನೆ ಅಥವಾ ಹಿಂದಿನ ರಾತ್ರಿ ಸರಿಯಾಗಿ ನಿದ್ದೆ ಬಾರದಿರುವುದು ರಕ್ತದೊತ್ತಡದ ಮಟ್ಟವನ್ನು ತಾತ್ಕಾಲಿಕವಾಗಿ ಹೆಚ್ಚಿಸಬಹುದು. ಆಸ್ಪತ್ರೆಗೆ ಹೋದಾಗ ಕೆಲವರಿಗೆ ಆತಂಕದಿಂದ ರಕ್ತದೊತ್ತಡ ಹೆಚ್ಚಾಗುವ ಸಾಧ್ಯತೆಯೂ ಇರುತ್ತದೆ. ಇಂತಹ ಸಂದರ್ಭದಲ್ಲಿ ಏಳು ದಿನಗಳ ಕಾಲ ನಿರಂತರವಾಗಿ ಪರಿಶೀಲಿಸುವುದರಿಂದ ವ್ಯಕ್ತಿಯ ದೇಹದ ನೈಜ ರಕ್ತದೊತ್ತಡದ ಲಕ್ಷಣಗಳು ಸ್ಪಷ್ಟವಾಗಿ ತಿಳಿಯುತ್ತವೆ.
ಮನೆಯಲ್ಲೇ ರಕ್ತದೊತ್ತಡವನ್ನು ಸರಿಯಾದ ರೀತಿಯಲ್ಲಿ ಪರೀಕ್ಷಿಸಲು ಕೆಲವು ಪ್ರಮುಖ ನಿಯಮಗಳನ್ನು ಪಾಲಿಸುವುದು ಅತ್ಯಗತ್ಯ. ಪರೀಕ್ಷೆ ಮಾಡುವ ಕನಿಷ್ಠ ಮೂವತ್ತು ನಿಮಿಷಗಳ ಮುನ್ನ ಯಾವುದೇ ರೀತಿಯ ವ್ಯಾಯಾಮ, ಧೂಮಪಾನ ಅಥವಾ ಕೆಫೀನ್ ಯುಕ್ತ ಪಾನೀಯಗಳ ಸೇವನೆಯನ್ನು ತಪ್ಪಿಸಬೇಕು. ಮೂತ್ರ ವಿಸರ್ಜನೆ ಮಾಡಿ, ಕನಿಷ್ಠ ಐದು ನಿಮಿಷಗಳ ಕಾಲ ಪ್ರಶಾಂತವಾಗಿ ಕುಳಿತುಕೊಳ್ಳಬೇಕು. ಕುಳಿತುಕೊಳ್ಳುವ ಭಂಗಿಯೂ ಬಹಳ ಮುಖ್ಯವಾಗಿದ್ದು, ಬೆನ್ನಿಗೆ ಸರಿಯಾದ ಆಸರೆ ನೀಡಿ, ಎರಡೂ ಪಾದಗಳನ್ನು ನೆಲದ ಮೇಲೆ ಸಮತಟ್ಟಾಗಿ ಇರಿಸಬೇಕು. ಕೈಯನ್ನು ಹೃದಯದ ಮಟ್ಟಕ್ಕೆ ಆರಾಮವಾಗಿ ಇರಿಸಿ, ತೋಳಿಗೆ ಸರಿಯಾಗಿ ಹೊಂದುವಂತಹ ಸಾಧನದ ಪಟ್ಟಿಯನ್ನು ನೇರವಾಗಿ ಚರ್ಮದ ಮೇಲೆ ಕಟ್ಟಬೇಕು. ಪರೀಕ್ಷೆ ನಡೆಯುವ ಸಮಯದಲ್ಲಿ ಮಾತನಾಡುವುದು ಅಥವಾ ಅಲುಗಾಡುವುದನ್ನು ಸಂಪೂರ್ಣವಾಗಿ ತಪ್ಪಿಸಬೇಕು.
ದಿನದ ವಿವಿಧ ಸಮಯಗಳಲ್ಲಿ ಒತ್ತಡ, ನಿದ್ರಾಹೀನತೆ, ದೈಹಿಕ ನೋವು ಅಥವಾ ಆತುರದಂತಹ ಕಾರಣಗಳಿಂದ ರಕ್ತದೊತ್ತಡವು ಸ್ವಾಭಾವಿಕವಾಗಿಯೇ ಏರುಪೇರಾಗಬಹುದು. ಆದ್ದರಿಂದ ಪದೇಪದೇ ಪರಿಶೀಲಿಸಿ ಸರಾಸರಿ ಮಟ್ಟವನ್ನು ಗಮನಿಸುವುದು ಸೂಕ್ತ ಚಿಕಿತ್ಸೆಗೆ ನೆರವಾಗುತ್ತದೆ.
ಕೇವಲ ಒಂದೇ ಅಳತೆಯನ್ನು ನೋಡಿ ಯಾವುದೇ ಚಿಕಿತ್ಸೆಯ ನಿರ್ಧಾರಗಳನ್ನು ತೆಗೆದುಕೊಳ್ಳಬಾರದು. ವಯಸ್ಸು, ಮಧುಮೇಹ, ಮೂತ್ರಪಿಂಡದ ಆರೋಗ್ಯ ಹಾಗೂ ಹೃದಯದ ಅಪಾಯಗಳನ್ನು ಪರಿಗಣಿಸಿ ವೈದ್ಯರು ನಿರ್ಧರಿಸುತ್ತಾರೆ. ಒಂದು ವೇಳೆ ರಕ್ತದೊತ್ತಡದ ಅಳತೆಯು ಅಪಾಯಕಾರಿ ಮಟ್ಟಕ್ಕೆ ಏರಿಕೆ ಕಂಡರೆ, ಕೆಲವು ನಿಮಿಷಗಳ ನಂತರ ಮರುಪರೀಕ್ಷೆ ಮಾಡಬೇಕು. ಆದರೂ ಇಳಿಕೆಯಾಗದೆ ಎದೆನೋವು, ಉಸಿರಾಟದ ತೊಂದರೆ, ತೀವ್ರ ತಲೆನೋವು, ದೌರ್ಬಲ್ಯ ಅಥವಾ ದೃಷ್ಟಿ ಮಂದವಾಗುವಂತಹ ಲಕ್ಷಣಗಳು ಕಂಡುಬಂದರೆ ತಕ್ಷಣವೇ ತುರ್ತು ವೈದ್ಯಕೀಯ ಚಿಕಿತ್ಸೆ ಪಡೆಯುವುದು ಅತ್ಯಗತ್ಯ. ನಿಖರವಾಗಿ ಪರೀಕ್ಷಿಸುವುದು, ನಿಯಮಿತವಾಗಿ ದಾಖಲಿಸುವುದು ಮತ್ತು ಒಟ್ಟಾರೆ ಆರೋಗ್ಯದ ಪ್ರವೃತ್ತಿಯನ್ನು ಗಮನಿಸುವುದೇ ಅಧಿಕ ರಕ್ತದೊತ್ತಡ ನಿರ್ವಹಣೆಗೆ ಸರಿಯಾದ ದಾರಿಯಾಗಿದೆ.
